Read Mizo Lushai CHANCHIN ṬHA JOHANA ZIAK 21 Bible Online

CHANCHIN ṬHA JOHANA ZIAK 21 - Mizo Lushai bible

CHANCHIN ṬHA JOHANA ZIAK 21

¹Chumi hnu chuan Isua chu Tiberia dîlah a zirtîrte hnênah a inlâr leh a; hetiang hian a inlâr.

²Simon Petera te, Thoma - Phîra an tih te, Galili rama Kana khuaa mi Nathanaela te, Zebedaia fapa pahnih te, a zirtîr zînga pahnih dang te an awm khâwm a.

³Simon Petera chuan an hnênah, “Sangha man tûrin ka kal dâwn e,” a ti a. Anni chuan “Keini pawh i hnênah kan kal ve ang,” an ti a. An thawk chhuak a, lawngah an chuang ta a; mahse, chumi zân chuan eng mah an man lo.

⁴Khua a lo vâr chuan Isua chu ṭiauphovah a lo ding a; nimahsela, zirtîrte chuan Isua a ni tih an hre lo.

⁵Isuan an hnênah, “Naute u, in man em?” a ti a. Anni chuan “Man hauh lo mai,” tiin an chhâng a.

⁶Ani chuan “Lawng sîr ding lamah khân lên dêng ula, in man ang,” a ti a. Tichuan, an han dêng a, sangha a tam avângin an hnûk chhuak zo ta lo va.

⁷Zirtîr, Isuan a hmangaiha khân Petera hnênah, “Lalpa a nih saw!” a ti a. Simon Peteran Lalpa a ni tih a hriat chuan kawr a inbel a, saruakin a lo awm si a, dîlah chuan a zuang thla ta a.

⁸Zirtîr dangte erawh chuan lawng têin, lên, sanghaa khat hnûk chung chuan an rawn pan a, khawmual aṭanga hla lo tê, tawng zahnih emaw lekah an awm a ni si a.

⁹Khawmuala an chhuah chuan, meihawla mei chhêm, a chunga sangha awm leh chhang chu an hmu a.

¹⁰Tin, Isuan, “Tûna in sangha man kha a ṭhen han la teh u,” a ti a.

¹¹Simon Petera chu lawngah a va chuang a, lên chu sangha lian pui puia khatin khawmualah a hnûk chhuak a, za leh sawmnga leh pathum a ni; chuti zo zai chu awm mah sela lên chu a ṭet si lo.

¹²Isuan an hnênah, “Tûkṭhuan lo ei rawh u,” a ti a. Zirtîrte zînga tu mahin, “Tu nge i nih?” tiin an zâwt ngam lo. Lalpa a ni tih an hre si a.

¹³Isua chu a kal a, chhang a la a, an hnênah a pe a, sangha pawh chutiang bawkin a ti a.

¹⁴Chu chu Isua mitthi zîng ata a thawhleh hnua a inlâr vawi thumna a ni.

¹⁵Tûkṭhuan an ei kham chuan, Isuan Simon Petera hnênah, “Simon, Johana fapa, hêngte ai hian nangin mi hmangaih zâwk em?” a ti a. Ani chuan, “Aw, Lalpa, ka ngaina che tih i hria e,” a ti a. Isuan a hnênah, “Ka berâm note châwm rawh,” a ti a.

¹⁶A vawi hnihnaah chuan Isuan a hnênah, “Simon, Johana fapa, nangin mi hmangaih em?” a ti leh a. Ani chuan, “Aw, Lalpa, ka ngaina che tih i hria e,” a ti a. Isuan, “Ka berâmte enkawl rawh,” a ti a.

¹⁷A vawi thumnaah chuan a hnênah, “Simon, Johana fapa, nangin mi ngaina em?” a ti a. A vawi thumnaah, “Mi ngaina em?” a hnêna a tih avâng chuan Petera a lungngai a, “Lalpa, engkim i hria a, ka ngaina che tih i hria e,” a ti a. Isuan a hnênah, “Ka berâmte châwm rawh.

¹⁸“Thu dik tak ka hrilh a che, i naupan laiin incheiin i kâwng i hrêng a, i duhna apiangah i lêng ṭhîn a, i lo upat hnuah erawh chuan i kutte i phar ang a, mi dangin i kâwng an hrênsak ang chia, i duh lohna lamah an hruai ang che,” a ti a.

¹⁹Engtianga thiin nge Pathian a la chawimawi ang tih hriat nân chûng thu chu a sawi a ni; chu chu a sawi zawhin a hnênah, “Mi zui rawh,” a ti a.

²⁰Petera chu a han lehhawi a, zirtîr, Isuan a hmangaih, zanriah ei laia a âwm nghênga thle pheia, “Lalpa, a mantîrtu tûr che chu tu nge ni?” titu khân rawn zuiin a hmu a.

²¹Ani chu Peteran a han hmuh chuan, Isua hnênah, “Lalpa, ani saw engtin nge ni dâwn?” a ti a.

²²Isuan a hnênah, “Ka lo kal leh thlenga awm reng tûrin duh pawh ni ila, eng atân nge i tih? Mi zui mai rawh,” a ti a.

²³Chu zirtîr chu thi lo tûr angin unaute zîngah chuan thu a thang vêl ta a. Nimahsela, Isuan a thi lo vang tih a hnênah a sawi si lo, ‘Ka lo kal leh thlenga awm reng tûrin duh pawh ni ila, eng atân nge i tih?’ a ti mai zâwk a ni.

²⁴Chu zirtîr chu hêng thu hretu leh ziaktu hi a ni a, a thu hriattîr hi a dik a ni tih kan hria.

²⁵Thil dang tam tak Isuan a tihte a la awm a, chûng chu ziak chhuah vek ni dâwn sela, lehkhabu ziak tûr chu khawvêlah pawh hian lengin ka ring lo.