Read Mizo Lushai CHANCHIN ṬHA JOHANA ZIAK 3 Bible Online

CHANCHIN ṬHA JOHANA ZIAK 3 - Mizo Lushai bible

CHANCHIN ṬHA JOHANA ZIAK 3

¹Mi pakhat, a hming Nikodema a awm a, Juda-te hotu, Farisai pâwla mi a ni.

²Zân khat chu Isua hnênah a lo kal a, a hnênah, “Rabi, Pathian tirh zirtîrtu i ni tih kan hria, Pathian an hnêna a awm loh chuan tu man chhinchhiahna thil mak i tih ang hi an ti thei lo vang,” a ti a.

³Isuan a chhâng a, “Thu dik tak ka hrilh ang che, mi tu mah, piangthar lo chuan Pathian ram an hmu thei lo vang,” a ti a.

⁴Nikodema chuan, “Putar pui tawh engtin nge a pianthar theih ang? A nu pumah lûtin a piang nawn leh thei awm si lo va?” a ti a.

⁵Isuan, “Thu dik tak ka hrilh ang che, tuiah leh thlarauva piang lo chu tu mah Pathian ramah an lût thei lo vang.

⁶Tisa chuan tisa a hring a, thlarau chuan thlarau a hring a ni.

⁷‘I piangthar tûr a ni,’ ka tih hi mak ti suh.

⁸Thli khawiah pawh a duh duhin a tleh ṭhîn, a ri i hria e; nimahsela, khawi aṭanga lo kal nge tih leh, khawiah nge a kal dâwn tih i hre si lo. Tu pawh Thlarauva piang chu chutiang chu an ni,” a ti a.

⁹Nikodeman, “Chu chu engtin nge a nih theih?” a ti a.

¹⁰Isuan, “Nang, Israel-te zirtîrtu i ni a, chu chu i hre lo maw?

¹¹Thu dik tak ka hrilh ang che; kan hriat chu kan sawi a, kan hmuh chu kan hriattîr ṭhîn, tu man kan thu hriattîr in pawm duh chuang si lo.

¹²Khawvêl thil ka hrilh che u mah in awih si lo va, vân thil lek phei chu hrilh che u ila engtin nge in awih ang?

¹³Tu mah vânah an lâwn ngai lo, Mihring Fapa, vân aṭanga lo chhuka chauh lo hi chu,” a ti a.

¹⁴Mosian thlalêra rûl a khai kân ang khân Mihring Fapa hi khai kânin a awm bawk tûr a ni,

¹⁵amah ring apiangin chatuan nun an neih nân.

¹⁶Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.

¹⁷Pathian chuan khawvêl thiam loh chantîr tûrin a Fapa khawvêlah a tîr si lo, amah azâra khawvêl chhandama an awm theih nân a tîr a ni zâwk.

¹⁸Tu pawh Pathian Fapa ring chu thiam lohvin an awm lo va, tu pawh ring lo chu thiam lohvin an awm tawh reng a ni; Pathian Fapa mal chu an rin loh avângin.

¹⁹Thiam loh an chan dân chu hetiang hi a ni: êng chu khawvêlah a lo kal a; nimahsela, miten êng ai chuan thim an duh zâwk, thil sual an tih avângin.

²⁰Thil sual ti apiangin êng an haw ṭhîn a, êngah pawh an lo kal lo, an thiltihte a lan loh nân.

²¹Thil dik ti apiang êngah an lo kal ṭhîn, an thiltihte chu Pathian thu zâwma ti an nih a lan nân.

²²Chumi hnu chuan Isua leh a zirtîrte chu Judai ramah an kal a. Chutah chuan eng emaw chen a châm a, baptisma a chantîr a.

²³Johana pawhin Salim bula Ainon hmunah a baptis a, chutah chuan tui a tam avângin. Mi an lo kal ṭhîn a, a lo baptis zêl a.

²⁴Johana chu tân ina khung a la ni si lo va.

²⁵Johana zirtîr ṭhenkhatte leh Juda pakhat sil fai thu-ah an lo inhnial ta a.

²⁶Johana hnênah an kal a, “Zirtîrtu, Jordan râla i hnêna awm, a chanchin i sawi khân tûnah hian a baptis ve a, mipuiin an pan ruih ruih mai,” an ti a.

²⁷Johanan a chhâng a, “Pathianin a pêk loh chuan tu man eng mah an dawng thei lo.

²⁸‘Kei chu Krista ka ni lo va, a hmaa kal tûra tirh ka ni,’ ka tih kha nangmahni ngei ka thuhretute in ni alâwm.

²⁹Mo pasal chu moneitu chu a ni, mo neitu ṭhian, a thu lo ngaichâng rengtu chuan moneitu aw a hriatin a hlim ṭhîn. Chutiang chuan kei pawh ka lâwm a kim ta a ni.

³⁰Ani chu ropui tial tial tûr a ni a, kei erawh chu tê tial tial tûr ka ni,” a ti a.

³¹Chung lam aṭanga lo chhuka chu mi zawng zawng aia ropui a ni. Lei aṭanga lo chhuaka chu lei mi a ni a, lei thil a sawi ṭhîn; vân aṭanga lo chhuk chu engkim chunga mi a ni. Vân aṭanga lo chhuk chuan,

³²thil a hmuh leh a hriatte chu a sawi a; nimahsela, tu man a thuhriattîr chu an pawm si lo.

³³Tu pawh a thu hriattîr pawm chuan Pathian chu a dik tih an tilang chiang ṭhîn a ni.

³⁴Pathian tirha chuan Pathian thu a sawi ṭhîn a, Pathianin Thlarau chu teh kherin a pe si lo va.

³⁵Pain Fapa a hmangaih a, a kutah engkim a dah tawh.

³⁶Tu pawh Fapa ring chuan chatuan nun an nei tawh; Fapa thu awih lo chuan nun an nei lo vang a, an chungah Pathian thinur chu a awm reng zâwk a ni.