Read Mizo Lushai CHANCHIN ṬHA JOHANA ZIAK 4 Bible Online

CHANCHIN ṬHA JOHANA ZIAK 4 - Mizo Lushai bible

CHANCHIN ṬHA JOHANA ZIAK 4

¹Farisai-ten Johana aiin Isuan zirtîr tam zâwk a siam a, a baptis tih an hria tih Isuan a hriat chuan,

²Isua tak chuan a baptis lo va, a zirtîrten an baptis zâwk a ni.

³Judai ram a chhuahsan a, Galili ramah a kîr leh ta a.

⁵Samari rama khaw pakhat, Sukar an tih chu a va thleng a, chu chu Jakoban a fapa Josefa ram a pêk kianga awm a ni.

⁶Jakoba tuichhunchhuah pawh chutah chuan a awm a. Isua chu a kal hah êm avângin tuichhunchhuah sîrah chuan a ṭhu chawt a. Chhûn lai tak a ni.

⁷Samari hmeichhia tui chawi tûrin a lo kal a. Isua chuan, “In tûr mi pe rawh,” a lo ti a.

⁸A zirtîrte chu ei tûr leiin khuaah an kal tawh a ni.

⁹Hmeichhia chuan, “Nang Juda mi i ni a, kei Samari hmeichhia ka ni a, engtiziaa in tûr mi dîl nge maw i nih le?” a ti a (Juda-te leh Samari miten eng mah an inhman ṭâwm ngai lo va).

¹⁰Isuan a chhâng a, “Pathian thilpêk leh i hnêna, ‘In tûr mi pe rawh,’ titu hi hria ni la chuan, a hnênah i dîl zâwk ang a, ani chuan tui nung a pe tûr che a ni,” a ti a.

¹¹Hmeichhia chuan, “Ka pu, khai chhuahna tûr eng mah i nei si lo va, tuichhunchhuah a thûk vei nên, khawi ata nge tui nung chu i neih?

¹²Kan pu Jakoba aiin i ropui zâwk em ni? Ani chuan he tuichhunchhuah hi min pe a, amah leh a fate leh a ran rualte pawhin heta mi hi an in ṭhîn,” a ti a.

¹³Isuan, “Tu pawh he tui in apiang an tuihâl leh ang;

¹⁴tu pawh an hnêna ka pêk tûr tui in erawh chu an tuihâl leh tawh lo vang. An hnêna ka pêk tûr chu, an kawchhûngah tuihnaah a lo chang ang a, chatuan thlengin a kang lo vang,” a ti a.

¹⁵Hmeichhia chuan, “Ka pu, chu tui chu mi pe rawh, ka tuihâl tawh loh nân leh hêng thleng thlenga tui chawi tûra ka lo kal tawh loh nân,” a ti a.

¹⁶Isuan, “I pasal va ko la, hetah lo kîr leh ang che,” a ti a.

¹⁷Hmeichhia chuan, “Pasal ka nei hlei nêm,” a ti a. Isuan, “ ‘Pasal ka nei hlei nêm,’ i tih hi i ti dik e;

¹⁸Pasal panga i nei tawh a, tûna i neih lai hi i pasal a ni lo rêng a ni. I sawi chu a dik e,” a ti a.

¹⁹Hmeichhia chuan, “Ka pu, zâwlnei i ni tih ka hre ta.

²⁰Min thlahtute chuan he tlângah hian Pathian chibai an bûk ṭhîn a, nangni erawh chuan, ‘Miten Jerusalem-ah ngei Pathian chibai an bûk tûr a ni,’ in ti a,” a ti a.

²¹Isuan, “Hmeichhia, ka thu awih rawh, he tlângah kher lo pawh, Jerusalem-ah kher lo pawh Pa chibai in bûk hun a thleng dâwn.

²²Nangnin in hriat loh chibai in bûk ṭhîn, keinin kan hriat chu chibai kan bûk ṭhîn; chhandamna chu Juda-te hnên ata lo chhuak a ni si a.

²³Nimahsela, a hun a thleng dâwn, tûnah pawh a thleng tawh mêk, Pathian chibai bûktu tak takten thlarau leh thutakin Pa chibai an bûk tawh ang. Chutiang mi chu Pain amah chibai bûk tûrin a zawng a ni.

²⁴Pathian chu thlarau a ni a, amah chibai bûktuten thlarau leh thutakin chibai an bûk tûr a ni,” a ti a.

²⁵Hmeichhia chuan, “Mesia, Krista an tih chu, a lo kal dâwn tih ka hria. A lo kal hun chuan engkim min la hrilh ang,” a ti a.

²⁶Isuan a chhâng a, “Kei, a betu che hi amah chu ka ni,” a ti a.

²⁷Chumi lai chuan zirtîrte chu an lo thleng tawh a, hmeichhia a bia an rawn hmuh chuan mak an ti hle a. Nimahsela, tu mahin, “Eng nge i duh?” emaw, “Engah nge hmeichhia i biak?” emaw an ti lo.

²⁸Hmeichhia chuan a tuibêl a kalsan a, khuaah a kîr a, khuaa mite hnênah chuan,

²⁹“Mi pakhat, ka thiltih apiang mi hrilh thei vektu a awm a, lo kal ula, va en teh u, Krista a ni thei âwm emaw,” a ti a.

³⁰Tichuan, khua ata chu an chhuak a, Isua hnênah an kal ta a.

³¹Chumi hlân chuan zirtîrte chuan, “Zirtîrtu, ei rawh,” tiin an ngên a.

³²Ani lah chuan, “In hriat loh chaw ei tûr ka nei e,” a ti mai si a.

³³Zirtîrte chuan, “Tuten emaw chaw an rawn pe em ni chu le?” tiin an inzâwt ta hlawm a.

³⁴Isuan an hnênah, “Mi tîrtu duhzâwng tih leh a hna thawh zawh chu ka chaw a ni.

³⁵‘Thla li-ah buh seng a hun ang,’ in ti ṭhîn a ni lâwm ni? Dâk chhuak ula, lote en vêl rawh u, buhte chu seng mai theihin a êng tawh tih ka hrilh che u hi.

³⁶Buh sengtu chuan hlawh a hmu nghâl tawh a, chatuan nun atân a seng khâwm mêk a ni, a phuntu leh a sengtu chu an hlim dun theih nân.

³⁷‘Mi pakhatin a tuh a, mi dangin a seng a,’ tih thu hi a dik a ni.

³⁸In thawhrim rah ni lo seng tûrin ka tirh che u hi, mi dangin an thawk a, an thawhrim rah in seng a ni,” a ti a.

³⁹Hmeichhiain, “Ka thiltih apiang mi hrilh thei vek,” a tih avâng khân chumi khuaa Samari mi tam takin Isua an ring ta a.

⁴⁰Samari mite Isua hnên an lo thlen chuan an hnênah châm tûrin an ngên a, chu khuaah chuan ni hnih a châm ta a.

⁴¹A thu an hriat chuan mi dang tam tak pawhin an ring ta a.

⁴²Tin, hmeichhe hnênah chuan, “Tûnah zawng i thu sawi avânga ring kan ni ta lo, keimahni ngeiin a thu sawi kan hria a, he mi hi khawvêl chhandamtu a ni ngei tih kan hre ta,” an ti a.

⁴³Ni hnih hnu chuan chuta ṭangin Galili ramah a kal ta a.

⁴⁴Amah Isua ngeiin, “Zâwlnei chu ama ram lamah chawimawiin a awm lo,” a lo ti tawh si a.

⁴⁵Galili ram a va thlen erawh chuan, Galili mite chuan an lo lâwm hle a; Jerusalem-a Kalhlên Kût chhimin an han kal a, kût laia a thiltih engkim an han hmuh avângin.

⁴⁶Isua chuan Galili rama Kana, tui uaina a chantîrna khua kha a va thleng leh a. Kapernaum-ah sawrkâr milian tak pakhat fapa damlo a awm a.

⁴⁷Chu mi chuan Isua, Judai ram aṭangin Galili ramah a lo kal tih a hriatin a hnênah a han kal a, a fapa thi lek lek tidam tûrin Kapernaum-a chhukah a sâwm a.

⁴⁸Isuan a hnênah, “Chhinchhiahna leh thil mak tih in hmuh loh chuan in ring tawp lo vang,” a ti a.

⁴⁹Chu mi chuan, “Ka pu, ka fapa chu a thih hmain lo kal hrâm rawh,” a ti a.

⁵⁰Isuan, “Kal mai rawh; i fapa chu a dam ta,” a ti a. Ani chuan Isua thu sawi chu a ring a, a kal ta a.

⁵¹A zu haw chu kawngah a chhiahhlawhten an lo hmuak a, “I fapa chu a dam ta e,” an lo ti a.

⁵²A fapa lo dam leh ṭan hun chu a zâwt hlawm a. Anni chuan, “Nimin chhûn dâr khatah khân a khawsikin a thlah ta a ni,” an ti a.

⁵³Naupang pa chuan chumi lai tak chu Isuan, “I fapa chu a dam ta,” a hnêna a tih hun kha a ni tih a hre ta a. Tichuan, an chhûngin an ring ta a.

⁵⁴Chu chu Isua Judai ram aṭanga Galili rama a kal hnua chhinchhiahna thil mak a tih vawi hnihna a ni.