Read Mizo Lushai CHANCHIN ṬHA JOHANA ZIAK 6 Bible Online

CHANCHIN ṬHA JOHANA ZIAK 6 - Mizo Lushai bible

CHANCHIN ṬHA JOHANA ZIAK 6

¹Chumi hnu chuan Galili dîl, Tiberia dîl an tih râlah a kal ta a,

²dam lote chunga chhinchhiahna thil mak a tihte an hmuh avângin mipui nasa takin an zui a.

³Isua chu tlângah a chho va, a zirtîrte nên an ṭhu a.

⁵Isua chu a han hawi vêl a, mipui nasa takin amah an rawn pan chu a hmu a, Filipa hnênah, “Hêngho hraina daih tûr chhang khawiah nge kan lei ang?” a ti a.

⁶Chu chu Filipa fiah nân a sawi a ni; a tih tûr chu amahin a hre vek si a.

⁷Filipan a chhâng a, “Mi tinin tlêm têa an chan ṭheuh tûr pawh duli zahnih man chhangin a daih lo vang,” a ti a.

⁸A zirtîrte zînga pakhat, Andria, Simon Petera unaupa chuan,

⁹“Hetah hian mipa naupang pakhat barli chhang tlang nga leh sangha pahnih nei a awm; nimahsela, hêng zozai tân hian chu chu eng tham nge ni ang?” a ti a.

¹⁰Isuan, “Mipuite hi ṭhuttîr rawh u,” a ti a. Chu laiah chuan hlobet hmun a awm duai a. Patlingte chu an ṭhu a, sângnga lai an ni a.

¹¹Isuan chhang chu a la a, lâwmthu a sawi a, chuta ṭhuhote chu a sem ta a; an duh tâwk an chang ṭheuh va.

¹²An kham hnu chuan a zirtîrte hnênah, “Eng mah rîral awm lo tûrin sem bâng kha dah ṭha rawh u,” a ti a.

¹³Tichuan, an la khâwm a, barli chhang tlang nga eitute hnêna sem bâng chu bâwm sâwm leh pahnih a la khat a.

¹⁴Mipuiten chhinchhiahna thil mak a tih chu an hmuh chuan, “He mi hi zâwlnei, khawvêla lo kal tûra chu a nih ngei hi!” an ti a.

¹⁵Isuan amah mana lala siam luih tumin an lo kal dâwn tih a hria a; chuvângin, tlângah amah chauhvin a kal hrang leh ta a.

¹⁶Tlai a lo nih chuan a zirtîrte chu dîlah an chhuk a;

¹⁷lawngah an chuang a, Kapernaum lam panin dîl chu an kân dâwn a. Khua a lo thim ta a, Isua lah chu an hnênah a lo la thleng si lo.

¹⁸Thli na tak a tleh avângin tui a lo fâwn nasa ta hle a.

¹⁹Km. li vêl lawng an kar hnu chuan, Isuan tui chunga kala lawng a rawn pan chu an hmu a; tichuan, an hlau ta a.

²⁰Isuan an hnênah, “Keimah ka ni alâwm, hlau suh u,” a ti a.

²¹Lawnga chuan luhtîr an duh a, nimahsela, lawng chuan an pan khawmual chu a thleng ta nghâl mai a.

²²A tûkah chuan, dîl râla mipui la awmte chuan lawng pakhat chauh lo chu lawng dang a awm lo tih an hmu a, Isua chu a zirtîrte hnênah lawngah a chuang ve lo va, a zirtîrte chu anmahni chauhvin an kal tih an hria a.

²³Lalpan lâwmthu a sawi zawha chhang an eina hmun kiangah khân, Tiberi khua aṭanga lo kal lawng dangte chu a lo thleng hlawm a.

²⁴Mipuiten Isua leh a zirtîrte chutah chuan an awm tawh lo tih an hmuh chuan, lawngahte chuan an chuang a, Isua zawngin Kapernaum-ah an kal ta a.

²⁵Mipuiten Isua chu râl lehlama an va hmuh chuan, “Zirtîrtu, eng laiin nge heta i lo thlen?” an ti a.

²⁶Isuan a chhâng a, “Thu dik tak ka hrilh a che u, chhinchhiahna thil makte in hmuh avânga mi zawng in ni lo va, chhang in ei puar avâng zâwk khân a nih hi.

²⁷Chaw dangral mai ûmin phe phe suh u, chatuan nun daih tûr chaw chu ûmin phe zâwk rawh u. Chu chaw chu Mihring Fapain a pe ang che u, Pa Pathianin amah a chhinchhiah tawh si a,” a ti a.

²⁸Tichuan annin, “Pathian hna kan thawh theih nân eng nge kan tih tûr?” an ti a.

²⁹Isuan, “Pathian hna in thawh tûr chu hei hi a ni, a mi tirh hi ring rawh u,” a ti a.

³⁰Anni chuan, “Kan hmuha kan rin theih nân eng chhinchhiahna thil mak nge i tih ang? Eng nge i tih dâwn le?

³¹Min thlahtuten thlalêrah manna kha an ei a, Lehkha Thu-in, ‘Vân aṭangin anni chu ei tûr a pe,’ a tih ang khân,” an ti a.

³²Isuan, “Thu dik tak ka hrilh a che u, vân aṭanga chhang Mosian a pe lo che u; ka Pa zâwkin chhang tak, vân ata chu, a pe che u a ni.

³³Pathian chhang pêk chu vân aṭanga lo chhuka, khawvêl hnêna nun petu hi a ni,” a ti a.

³⁴Anni chuan, “Lalpa, chu chhang chu min pe fo rawh,” an ti a.

³⁵Isuan, “Kei hi nunna chhang chu ka ni; ka hnêna lo kal tawh phawt chu an rilṭâm lo vang, kei mi ring chu an tuihâl ngai lo vang.

³⁶Nangnin mi hmuh hnu pawhin mi la ring si lo tih ka hrilh che u hi.

³⁷Pain mi pêk apiang ka hnênah an lo kal ang a, ka hnêna lo kal tawh phawt chu ka hnawt chhuak lo vang.

³⁸Mahni duh zâwng ti tûr ni lovin, mi tîrtu duhzâwng ti tûr zâwkin vân aṭanga lo chhuk ka ni si a.

³⁹Mi tîrtu duhzâwng chu hei hi a ni: anin mi pêk zawng zawng tu mah hloh lovin ni kin ni-ah kaitho zâwk ila.

⁴⁰Ka pa duhzâwng chu hei hi a ni: Fapa hmua amah chu ring apiangin chatuan nun nei sela, anni chu ni kin ni-ah ka kaitho vang,” a ti a.

⁴¹“Vân aṭanga chhang lo chhuk chu ka ni,” a tih avângin Juda-te chu a chungah an phunnawi ta a.

⁴²“He mi hi Josefa fapa Isua a ni lo vem ni? A nu leh pa pawh kan hria alâwm. Engtizia nge ‘Vân aṭanga lo chhuk ka ni,’ a tih tâk ni?” an ti a.

⁴³Isuan a chhâng a, “Phunnawi tawh suh u.

⁴⁴Pa, mi tîrtuin a hîp loh chuan tu mah ka hnênah an lo kal thei lo; keiin ni kin ni-ah a lo kala chu ka kaitho vang.

⁴⁵Zâwlneiten, ‘Mi zawng zawng Pathianin a zirtîr ang,’ tiin an ziak a. Mi tin, Pa thu hriaa, a hnên aṭanga zir chu ka hnênah an lo kal ṭhîn.

⁴⁶Pa hmu tawh an awm tihna a ni lo; Pathian hnên aṭanga lo kal hi Pa hmutu awm chhun chu a ni.

⁴⁷Thu dik tak ka hrilh a che u, a ringtu chuan chatuan nun a nei tawh.

⁴⁸Kei hi nunna chhang chu ka ni.

⁴⁹In thlahtuten thlalêrah mana an ei a; mahse, an thi a.

⁵⁰Vân aṭanga chhang lo chhuk erawh hi chu a ei apiang an thi lo vang.

⁵¹Kei hi vân aṭanga chhang nung lo chhuk chu ka ni. He chhang hi tu pawhin an ei chuan kumkhuain an nung reng ang. Chhang ka pêk tûr chu ka taksa hi a ni, khawvêl nun nâna ka pêk chu,” a ti a.

⁵²Chutichuan, Juda-te chu nasa takin an inhnial ta a. “Engtin nge he pa hian a tisa ei tûrin min pêk theih ang?” an ti a.

⁵³Isuan, “Thu dik tak ka hrilh a che u; Mihring Fapa tisa in eia, a thisen in in loh chuan nangmahniin nun in nei lo ve.

⁵⁴Tu pawh ka tisa eia, ka thisen in chuan chatuan nun a nei tawh, keiin ni kin ni-ah amah chu ka kaitho bawk ang.

⁵⁵Ka tisa hi chaw tak a ni a, ka thisen hi in tûr tak a ni.

⁵⁶Tu pawh ka tisa eia, ka thisen in chu keimahah a awm reng a, kei pawh amahah ka awm reng a ni.

⁵⁷Pa, nung chuan mi tîr a, Pa avâng chuan kei pawh ka nung a, chutiang bawkin tu pawh mi ei chu keimah avângin an nung ve ang.

⁵⁸Hei hi vân aṭanga chhang lo chhuk chu a ni; in thlahtuten chhang an ei ang kha a ni lo, an thih tho kha. He chhang eitu hi chu chatuanin a nung reng ang,” a ti a.

⁵⁹Kapernaum-a sunagog-ah a zirtîr laiin Isuan he thu hi a sawi a ni.

⁶⁰A zirtîrte zînga tam takin chu chu an hria a, “Hei hi thu khirh tak a ni, tu nge hrethiam ang?” an ti a.

⁶¹Chu mi thu-ah a zirtîrte an phunnawi tih Isuan a rilruin a hria a, an hnênah, “Hei hian a tilungni lo che u elo?

⁶²Mihring Fapa hi tûn hmaa a awmnaa a kîr chho hmu ta ula, engtin nge ni ang?

⁶³Nunna petu chu thlarau a ni; tisa chu a ṭangkai lo. In hnêna thu ka sawite hi thlarau leh nunna a ni.

⁶⁴Chuti pawhin ṭhenkhatin in la ring duh si lo,” a ti a. Isuan a tîr aṭangin tute nge ring duh lo tûr leh tu nge amah mantîrtu tûr a hre reng si a.

⁶⁵“Chuvâng tak chuan a ni, in hnênah, ‘Pain kal theihna a pêk loh chuan tu mah ka hnênah an lo kal thei lo,’ ka tih kha,” a ti a.

⁶⁶Chuta chinah chuan a zuitute zînga tam takin an bânsan a, an zui ve ta lo va.

⁶⁷Tichuan, Isuan Sâwmpahnihte hnênah chuan, “Nangni pawh kal bo ve in duh em?” a ti a.

⁶⁸Simon Peteran a chhâng a, “Lalpa, tu hnênah nge kan kal ang? Chatuan nunna thu i nei alâwm,

⁶⁹Pathian mi thianghlim chu i ni tih kan ring a, hriat pawh kan hria asin,” a ti a.

⁷⁰Isuan anni chu a chhâng a, “Nangni Sâwmpahnihte hi keima thlan in ni lâwm ni? In zînga pakhat Diabola a ni lehnghâl vei nên!” a ti a.

⁷¹Simon Iskariota fapa Juda thu kha a sawi a ni, Sâwmpahnihte zînga pakhat a ni nain amah mantîrtu tûr a ni si a.