Read Mizo Lushai CHANCHIN ṬHA JOHANA ZIAK 7 Bible Online

CHANCHIN ṬHA JOHANA ZIAK 7 - Mizo Lushai bible

CHANCHIN ṬHA JOHANA ZIAK 7

¹Chumi zawhah chuan Isuan Galili ram a fang a; Juda-ten amah thah an tum avângin Judai ram chu a fang duh lo va ni.

³Isua unaute chuan a hnênah, “He hmun hi chhuahsan la, Judai ramah kal rawh, i zirtîrten i thiltih hi an hmuh theih nân.

⁴Tu man hmingthan duh siin a rûkin thil an ti ngai lo. Hêng thil hi i tih rau rau chuan khawvêl hmuhah intârlang rawh,” an ti a.

⁵A unaute pawh chuan amah an ring si lo.

⁶Isuan an hnênah, “Ka hun a la thleng lo, nangni hun erawh chu eng lai pawhin a thleng reng a ni.

⁷Khawvêlin a haw thei lo che u, kei erawh chu mi hua a ni, an thiltihte a ṭha lo tih ka hriattîr ṭhîn avângin.

⁸Kûtah chuan han kal rawh u. Kei chu tûnah chuan, Kûtah hian ka han kal rih lo vang; ka hun a la thlen loh avângin,” a ti a.

⁹Chutiang chuan a sawi a, Galili ramah chuan a awm ta zêl a.

¹⁰A unaute Kût hmang tûra an chhoh tâk hnu chuan ani pawh chu langsâr lovin, a rûkin a han chho ve a.

¹¹Juda-ten Kût lai chuan amah an zawng a, “Khawiah nge a awm?” an ti a.

¹²Mipui chuan a chungchâng thu an sawi sup sup a. Ṭhenkhatin, “Mi ṭha a ni,” an ti a, a ṭhenin, “Ni lo ve, mipui a hruai sual zâwk a ni,” an ti a.

¹³Juda-te an hlauh avângin a lang erawh chuan tu man a chungchâng an sawi lo.

¹⁴Kût vânglai tak chuan Isua tempulah a chho va, a zirtîr ta a.

¹⁵Juda-te chuan, “He mi hian zir si lovin engtin nge lehkha a thiam?” an ti a, mak an ti hle a.

¹⁶Isuan anni chu a chhâng a, “Ka thu zirtîr hi keima zirtîrna a ni lo va, mi tîrtu zirtîrna a ni zâwk.

¹⁷Tu pawh Pathian duhzâwng tih duh chuan, ka thu zirtîr hi Pathian hnên ata nge keima phuahchawp tih an hre mai ang.

¹⁸Mahni phuahchawp thu sawitu chuan mahni ropuina a zawng a ni. Mahni tîrtu ropuina zawngtu erawh chu a rinawm a, amahah dik lohna rêng rêng a awm lo.

¹⁹Mosian, Dân chu a pe lo che u em ni? Nimahsela, in zînga tu mahin Dân chu in zâwm si lo. Engati nge mi thah in tum?” a ti a.

²⁰Mipui chuan an chhâng a, “Ramhuai i zâwl a nih hi; tuin nge thah tum che?” an ti a.

²¹Isuan anni chu a chhâng a, “Thil pakhat ka ti a, in za-in mak in ti a.

²²Mosian serh tan thu a pêk che u avângin (Mosia tihchhuah a ni lo va, in thlahtute tihchhuah a nih zâwk kha,) sabat ni pawhin serh in tan ṭhîn.

²³Mosia Dân bawhchhiat loh nân sabat ni pawha serh tan a nih chuan, engah nge sabat nia mi ka tihdam tâk avânga ka chunga in thinur bîk?

²⁴Pâwn lam lan dân ngawt enin thu peih mai suh u; a nih dân dik tak enin rêl zâwk rawh u,” a ti a.

²⁵Jerusalem-a mi ṭhenkhatte chuan, “He mi hi thah an tum chu a ni lâwm ni?

²⁶En teh u, vântlâng hriatin thu a sawi a, tu mahin an kalh si lo. Hotute hian amah hi Krista chu ni ngeiin an hre ta tihna em ni ang?

²⁷He mi hi khawia mi nge a nih kan hre si a; Krista chu a lo kal hun chuan khawia mi nge a nih tu man an hre dâwn si lo,” an ti a.

²⁸Isuan chutia Tempula a zirtîr lai chuan aw ring takin, “Kei mi hria a, khawia mi nge ka nih pawh in hria e. Nimahsela, mahni thu-a lo kal ka ni lo. Mi tîrtu erawh chu mi dik tak a ni, ani chu in hre lo.

²⁹Kei chuan ka hria, mi tîr a, a hnên aṭanga lo kal ka nih avângin,” a ti a.

³⁰Tichuan, man an tum a, nimahsela, a hun a la thlen loh avângin tu man an khawih lo.

³¹Mipui zînga mi tam takin amah an ring a, “Krista a lo kal hunah he mi tih aia tam zâwk chhinchhiahna thil mak a rawn ti dâwn chuang em ni?” an ti a.

³²Farisai-te chuan a chungchâng mipuiin an sawi rûk sup sup chu an hria a, puithiam lalte leh Farisai-te chuan Isua man tûrin vêngtute an tîr ta a.

³³Tichuan, Isuan, “Rei lo tê in hnênah ka la awm rih ang a, chumi hnu chuan mi tîrtu hnênah ka kal ang.

³⁴Nangnin mi zawng ang a, mi hmu lo vang, ka awmna tûrah chuan in kal thei dâwn si lo va,” a ti a.

³⁵Juda-te chuan, “Khawiah nge maw kal a tuma, kan hmuh theih dâwn loh chu le? Grik-ho zînga Juda awm darhte hnêna kala, Grik-hote zirtîr a tum em ni ang le?

³⁶‘Mi zawng ang a, mi hmu lo vang, ka awmna tûrah chuan in kal thei dâwn si lo va,’ a tih te hi eng tihna nge ni ang?” an inti hlawm a.

³⁷Kût ni hnuhnûng ber, ni ropui berah chuan Isua a ding a, aw ring takin a au va, “Tuihâl apiang chu ka hnênah lo kal sela, in rawh se.

³⁸Lehkha Thu-in a sawi angin, tu pawh kei mi ring chu a kawchhûng aṭangin tui nung luite a lo chhuak ang,” a ti a.

³⁹Chu chu amah ringtuten Thlarau an la chan tûr thu a sawina a ni; Isua chawimawia a la awm rih loh avângin Thlarau chu pêk a la ni rih lo va ni.

⁴⁰Mipui zînga ṭhenkhatin chûng thute chu an hriat chuan, “He mi hi zâwlnei chu a ni ngei mai,” an ti a.

⁴¹Mi dangin, “Krista chu a ni,” an ti a. Ṭhenkhat erawh chuan, “Krista chu Galili ram aṭangin a lo kal ang maw?

⁴²‘Krista chu Davida thlah, Davida awmna khua Bethlehem-a lo piang tûr a ni,’ Lehkha Thu-in a ti a ni lâwm ni?” an ti a.

⁴³Tichuan, amah avângin mipui zîngah inṭhenna a lo awm ta a.

⁴⁴An zînga ṭhenkhatin amah man an duh a; nimahsela, tu man an khawih lo.

⁴⁵Vêngtu sipaite chu puithiam lalte leh Farisai-te hnênah chuan an kîr leh a, anni chuan, “Engati nge in rawn hruai loh?” an lo ti a.

⁴⁶Vêngtu sipaite chuan an chhâng a, “He mi sawi ang hian tu man thu an la sawi ngai lo,” an ti a.

⁴⁷Farisai-te chuan an chhâng a, “Nangni pawh a lo bum ve che u elo?

⁴⁸Hotute leh Farisai-te zînga pakhat mahin amah an ring lo tih in hre na nge?

⁴⁹Hêng mipui Dân hre loho hi ânchhe dawng an ni e,” an ti a.

⁵⁰An zînga pakhat, Nikodema, Isua hnêna kal tawh khân, an hnênah,

⁵¹“Kan Dân ang chuan mi a thiamthu sawitîra, eng nge a tih hriat chian hma chuan thiam loh chantîr mai loh tûr a ni lâwm ni?” a ti a.

⁵²Ani chu an chhâng a, “Nang pawh Galili mi i ni ve elo maw? Lehkha Thu ngun takin chhiar la, Galili ram aṭangin zâwlnei an chhuak ngai lo tih i hre mai ang,” an ti a.

⁵³Tichuan, mi tin mahni inah an haw ta ṭheuh va.