Read Mizo Lushai CHANCHIN ṬHA JOHANA ZIAK 8 Bible Online

CHANCHIN ṬHA JOHANA ZIAK 8 - Mizo Lushai bible

CHANCHIN ṬHA JOHANA ZIAK 8

²A tûk zîng takah chuan Tempulah a lût leh a. Mipui zawng zawng a hnênah an lo kal a; tin, a ṭhu a, anmahni a zirtîr ta a.

³Dân zirtîrtute leh Farisai-te chuan hmeichhia, a uire lai man an rawn hruai a, a laiah an dintîr a.

⁴Isua hnênah, “Zirtîrtu, he hmeichhia hi a uire lai taka man a ni a.

⁵Kan Dân, Mosia min pêkah chuan hetiang hmeichhia hi lunga den hlum tûr tih a ni a. Nangin engtin nge i ngaih le?” an ti a.

⁶Chu chu amah fiah nân an ti a ni. Isua chu a kûn a, a kut zungṭangin leiah a ziak a.

⁷Chutia an zawh sek sek tâkah chuan a han dâk a, an hnênah, “In zînga sual nei lovin lungin dêng hmasa rawh se,” a ti a.

⁸A kûn a, leiah a ziak leh ta a.

⁹Chu chu an hriat chuan pakhat khatin a upa bera ṭanin an chhuak fai ta vek a, hmeichhia a awmna ngaia awm nên chauh chuan an awm ta a.

¹⁰Isua chu a han dâk a, a hnênah, “Hmeichhia, khawiah nge an awm tâk? Tu man thiam loh an chantîr na che nge?” a ti a.

¹¹Ani chuan “Chantîr lo, Lalpa,” a ti a. Isuan a hnênah, “Kei pawhin thiam loh ka chantîr lo va che; kal la, tûn chinah chuan sual leh tawh suh,” a ti a.

¹²Isuan an hnênah thu a sawi leh a, “Kei khawvêl êng ka ni. Tu pawh mi zui chu thimah an lêng tawp lo vang a, nunna êng an nei zâwk ang,” a ti a.

¹³Farisai-ten, “Mahni thu i hriattîr a ni; i thu hriattîr hi a dik lo ve,” an ti a.

¹⁴Isuan, “Mahni thu hriattîr ka nih pawhin ka thu hriattîr chu a dik a ni, ka lo chhuahna leh ka kalna tûr ka hre si a; nangni zawngin ka lo chhuahna leh ka kalna tûr in hre si lo.

¹⁵Nangnin tisa dânin in rêl a, kei zawngin tu ma thu ka rêl ve lo.

¹⁶Rêl pawh ni ila, ka thu rêl chu a dik ang a, a rêltu chu keimah mai ni lovin, kei leh Pa, mi tîrtu kan ni dâwn si a.

¹⁷In Dânah pawh mi pahnih thu hriattîr chu a dik a ni, tih ziak a nih kha.

¹⁸Kei hi mahni thu hriattîrtu ka ni a, Pa mi tîrtu chuan ka thu mi hriatpui bawk a ni,” a ti a.

¹⁹Anni chuan, “Khawiah nge i pa chu?” an ti a. Isuan, “Nangnin mi hre lo, ka Pa in hre hek lo. Kei mi hria ni ula, ka Pa pawh in hre tawh tûr,” a ti a.

²⁰Chûng thu chu Tempul thawhlâwm bâwm dahna hmuna a zirtîr laiin a sawi a ni. Tu man amah an man si lo, a hun a la thlen loh avângin.

²¹Isuan an hnênah, “Ka kal bo dâwn a, nangnin mi zawng ang, nimahsela, in sualnaah chuan in thi ang; ka kalna tûrah in lo kal thei lo vang,” a ti leh a.

²²Juda-te chuan, “Amah a intihlum dâwn em ni ang? ‘Ka kalna tûrah in lo kal thei lo vang,’ a tih hi?” an ti a.

²³Isuan an hnênah, “Nangni hnuai lam aṭanga lo chhuak in ni, kei zawng chung lam aṭanga lo chhuak ka ni; nangni chu he khawvêl ata lo chhuak in ni a; kei zawng he khawvêl ata lo chhuak ka ni lo.

²⁴Chuvâng chuan a ni, ‘in sualnaah chuan in thi ang,’ ka tih che u ni. ‘Ka ni’ ka tih hi in awih loh chuan, chu in sualnaah chuan in thi ang,” a ti a.

²⁵Anni chuan, “Tu nge i nih?” an ti a. Isuan, “A tîrin in hnênah ka sawi tawh a ni lâwm ni?

²⁶In chungchângah hian sawi tûr leh rêl tûr tam tak ka nei; eng pawh ni se, mi tîrtu chu mi dik tak a ni, a hnên aṭanga ka hriat chauh khawvêl hnênah ka sawi ṭhîn,” a ti a.

²⁷An hnênah Pa thu a sawi tih an hre lo.

²⁸Isuan an hnênah, “Mihring Fapa hi in khai kân hunah keimah ka ni tih leh, keima thuin eng mah ka ti lo va, Pain mi hrilh ang zêl chauh ka sawi zâwk tih in la hria ang.

²⁹Mi tîrtu chu ka hnênah a awm a, keimah chauhva awm tûrin mi kalsan ngai lo; a lâwmzâwng hlîr ka tih ṭhin avângin,” a ti a.

³⁰Chu thu chu a sawi laiin mi tam takin amah an ring ta a.

³¹Isuan amah ringtu Juda-te hnênah chuan, “Ka thu-a in awm reng chuan ka zirtîrte in ni tak tak ang;

³²thutak in hria ang a, thutak chuan a zalêntîr ang che u,” a ti a.

³³Anni chuan an chhâng a, “Abrahama thlahte kan ni a, tu bawihah mah kan awm ngai lo; ‘a zalêntîr ang che u,’ engtiziaa ti nge i nih?’ an ti a.

³⁴Isuan a chhâng a, “Thu dik tak ka hrilh a che u, thil sual ti apiang chu sual bawih an ni.

³⁵Bawih chu chhûngkuaah a tel kumkhua lo, fapa erawh chu kumkhuain a awm reng.

³⁶Chutichuan, Fapain a zalêntîr che u chuan in zalên tak tak tawh ang.

³⁷Abrahama thlahte in ni tih ka hria e; nimahsela, min thah in tum si, ka thuin nangmahniah hmun a neih loh avângin.

³⁸Keiin Pa hnêna ka hmuh ka sawi a, nangni erawh chuan in pa hnên aṭanga in hriat chu in ti ṭhîn,” a ti a.

³⁹Anni chuan, “Kan pa Abrahama a ni,” tiin an chhâng a. Isuan, “Abrahama fate in nih chuan Abrahama tih ang in ti ang chu.

⁴⁰Pa hnêna ka hriat thutak hrilhtu che u hi tûnah mi thah in tum si a. Abrahaman hetiang a ti ngai lo.

⁴¹In pa tih ang in ti ve a nih hi,” a ti a. Anni chuan, “Sâwn kan ni lo ve, pa pakhat kan nei, Pathian chu,” an ti a.

⁴²Isuan an hnênah, “Pathian in pa a nih chuan mi hmangaih ang, Pathian hnên ata lo kal ka ni si a. Keima thu-a lo kal ka ni si lo, amahin mi tîr zâwk a ni.

⁴³Engati nge ka thu sawi in hriatthiam loh? Ka thu in dawn fuh theih loh vâng a ni.

⁴⁴Nangni zawng in pa Diabola laka chhuak in ni a, in pa duhzâwng tih in duh a ni. Ani chu a tîr ata tualthattu a ni a, thutakah a ding ngai lo, amahah thutak a awm loh avângin. Dâwt a sawiin amaha chhuak chu a sawi a ni; dawthei a ni a, dâwt pa a nih avângin.

⁴⁵Keiin thutak ka sawi avângin mi ring lo a ni.

⁴⁶In zîngah ka sualna tu nge sawi thei awm? Thutak ka sawi a, engati nge mi rin si loh?

⁴⁷Pathian aṭanga chhuak chuan Pathian thu a ngaithla ṭhîn; nangni erawh zawngin ka thu in ngaithla lo, Pathian laka chhuak in nih loh avângin,” a ti a.

⁴⁸Juda-te chuan an chhâng a, “Samari mi i ni a, ramhuai i zâwl a ni kan tih kha kan tidik a ni lâwm ni?” an ti a.

⁴⁹Isuan, “Ramhuai zâwl ka ni lo va, ka Pa ka chawimawi a ni zâwk e, nangni lahin mi tihmingchhe si.

⁵⁰Keima ropuina tûr ka zawng lo, a zawngtu leh a ngaihtuahtu chu a awm.

⁵¹Thu dik tak ka hrilh a che u, tu pawh ka thu zâwm chuan thih ni hmêl a hmu lo kumkhua ang,” a ti a.

⁵²Juda-ten a hnênah, “Tûnah chuan ramhuai i zâwl a ni tih kan hre chiang ta; Abrahama a thi tawh a, zâwlneite pawh an thi tawh a, nang lahin, ‘Tu pawh ka thu zâwm chuan thihna a tem lo kumkhua ang,’ i ti si a.

⁵³Min thlahtu Abrahama aiin i ropui zâwk em ni? Ani pawh a thi tawh, zâwlneite pawh an thi tawh, tu-ah nge i insiam le?” an ti a.

⁵⁴Isuan, “Mahni inchawimawi ila ka mawina chu eng mah a ni lo. Ka Pa, ‘Kan Pathian a ni,’ in tiha chu mi chawimawitu a ni.

⁵⁵Ani chu in hre si lo, kei erawh chuan ka hria; ‘Ani chu ka hre lo,’ ka tih chuan, nangmahni ang bawka mi dawthei ka lo ni ang; nimahsela, amah ka hria a, a thu pawh ka zâwm a ni.

⁵⁶In thlahtu Abrahama kha ka ni hmu tûr a nih avângin a hlim êm êm a, a hmu ta ngei a, a lâwm rêng a ni,” a ti a.

⁵⁷Juda-te chuan a hnênah, “Kum sawmnga pawh la tling lo pui che, Abrahama i hmu maw?” an ti a.

⁵⁸Isuan, “Thu dik tak ka hrilh a che u, Abrahama pian hma pawhin Ka Awm tawh,” a ti a.

⁵⁹Amah den nân lung an chhar ta a; mahse, Isua a biru a, Tempul ata a chhuak ta a.