Read Mizo Lushai CHANCHIN ṬHA JOHANA ZIAK 9 Bible Online

CHANCHIN ṬHA JOHANA ZIAK 9 - Mizo Lushai bible

CHANCHIN ṬHA JOHANA ZIAK 9

¹Isua chuan a kal pahin mitdel saa piang a hmu a.

²A zirtîrte chuan, “Rabi, mitdel saa a piang hi tuin nge thil sual ti, he mi hian nge a nu leh pain?” an ti a.

³Isuan a chhâng a, “He mi hian a tisual lo, a nu leh pain an tisual hek lo, amahah Pathian hnathawh a lan theihna tûr a ni.

⁴Chhûn a nih lai hian mi tîrtu hna kan thawk tûr a ni. Tu man hna an thawh theih loh hun zân a lo thleng dâwn e.

⁵Khawvêla ka awm chhûng hian khawvêl êng ka ni,” a ti a.

⁶Chu chu a sawi zawhin leiah chil a chhâk a, chu chuan hlum a siam a, a mitah hlum chu a bel a,

⁷“Siloam dîlah va sil rawh,” a ti a. Siloam chu, ‘tîrh,’ tihna a ni. Tichuan, a va kal a, a sil a, mit vârin a lo kîr leh ta a.

⁸A ṭhenawmte leh tûn hmaa a kutdawh hmu ṭhînte chuan, “He mi hi kutdawha ṭhu reng ṭhîn kha a ni lo vem ni?” an ti a.

⁹Ṭhenkhatin, “Kha kha a ni,” an ti a. Mi dangin, “Ni lo, a anpui a ni zâwk,” an ti a. Ani chuan, “Kha mi kha ka ni e,” a ti a.

¹⁰Anni chuan, “Engtin nge i mit a lo vâr tâk?” an ti a.

¹¹Ani chuan, “Mi pakhat, Isua an tih khân hlum a siam a, ka mitah a tât a, ‘Siloam dîlah va sil rawh,’ mi ti a. Tichuan, ka va sil a, ka lo hmu thei ta mai a ni,” a ti a.

¹²Anni chuan, “Khawiah nge a awm?” an ti a. “Ka hre lo,” a ti a.

¹³Chutichuan, mitdel ni ṭhîna chu Farisai-te hnênah an hruai a,

¹⁴Isuan hlum a siam a, a mit a tihvâr ni chu sabat a ni a.

¹⁵Farisai-te chuan a lo hmuh theih tâk dân chu an lo zâwt leh a. Ani chuan, “Ka mitah hlum a dah a, ka sil a, ka hmu ta mai a ni,” a ti a.

¹⁶Farisai-te zînga mi ṭhenkhatin, “He mi hi Pathian hnên aṭanga lo chhuak a ni lo, sabat a serh loh avângin,” an ti a. Ṭhenkhat chuan, “Mi sualin engtin nge hetiang chhinchhiahna thil mak a tih theih ang?” an ti a. An zîngah inṭhenna a lo awm ta a.

¹⁷Mitdel hnênah chuan, “Ani chu mi engah nge i ngaih, i mit a tihvârsak si che a?” an ti a. Ani chuan, “Zâwlnei a ni,” a ti a.

¹⁸Juda-te chuan khaw hmu thei ta-a nu leh pa chu an koh hma chuan, ‘mitdel a ni ṭhîn a, khua a lo hmu leh thei ta a ni’ tih an awih lo va.

¹⁹Tichuan, “He mi hi in fapa, mitdel saa piang in tih kha a ni maw? Engtin nge tûnah hian a lo hmuh theih tâk?” tiin an zâwt a.

²⁰A nu leh a pa chuan an chhâng a, “Hei hi kan fapa a ni tih leh, mitdel saa piang a ni tih kan hria;

²¹engtin nge tûnah hian a lo hmuh theih tâk erawh chu kan hre lo, a mit tihvârsaktu pawh kan hre hek lo; amah zâwt rawh u. Puitling a ni ve tawh alâwm; aman ama thu chu sawi rawh se,” an ti a.

²²A nu leh pa chuan Juda-te an hlauh avângin chutiang chuan an ti a ni; Juda-te chuan, “Ani chu Krista a ni,” tia pawm apiang chu sunagog-a hnawntîr an lo remti tlâng diam si a.

²³Chuvâng chuan a ni, a nu leh pa chuan, “Puitling a ni ve tawh alâwm, amah zâwt rawh u,” an tih ni.

²⁴Mitdel ni ṭhîna chu an ko nawn leh a, a hnênah, “Pathian chawimawi rawh. He mi hi mi sual a ni tih kan hria,” an ti a.

²⁵Ani chuan a chhâng a, “Mi sual a nih leh nih loh ka hre lo, thil pakhat ka hria, mitdel ka ni ṭhîn a, tûnah ka hmu thei ta,” a ti a.

²⁶Anni chuan, “Engtin nge a tih che? I mit engtin nge a tihvâr?” an ti a.

²⁷Ani chuan, “Ka hrilh tawh reng che u a, in hre duh si lo; engtizia nge in hriat duh leh tâk ni? Nangni pawh a zirtîrte nih ve in duh elo?” a ti a.

²⁸Anni chuan an hau ta a, “Nang hi chu pa zirtîr chu i ni a, keini zawng Mosia zirtîrte kan ni asin.

²⁹Pathianin Mosia a bia tih kan hria, he mi ve hi chu khawia mi nge a nih kan hre hrep lo ve,” an ti a.

³⁰Chu mi chuan a chhâng a, “Chu tak chu a ni, a makna chu, khawia mi nge a nih in hre lo va, ka mit a tihvâr miau si hi!

³¹Pathianin mi sual thu a ngaithla lo tih kan hria; Pathian ngaihsaka, a duhzâwng titute thu erawh chu a ngaithla ṭhîn.

³²Khawvêl awm tirh ata mitdel saa piang mit tivâr ta tu man an hre ngai lo.

³³He mi hi Pathian aṭanga lo chhuak a nih loh chuan eng mah a ti thei lo vang,” a ti a.

³⁴Anni chuan an chhâng lêt a, “Sual muhlûma piang i nih hi, mi i zirtîr tehlul ang maw?” an ti a. Tichuan, an hnawt chhuak ta a.

³⁵An hnawt chhuak tih Isuan a lo hria a, a va zawng chhuak a, “Mihring Fapa i ring em?” a ti a.

³⁶Chu mi chuan a chhang a, “Ka pu, ani chu tu nge ni le, amah ka rin theih nân?” a ti a.

³⁷Isuan, “Ani chu i hmu tawh a, be mêktu che hi a ni alâwm,” a ti a.

³⁸“Lalpa, ka ring e,” tiin chibai a bûk ta a.

³⁹Isuan, “Rorêl tûrin he khawvêlah lo kal ka ni, hmu thei loten an hmuh theiha, hmu theite chu mitdel an lo nihna tûrin,” a ti a.

⁴⁰A hnêna Farisai awmte chuan chu chu an hria a, a hnênah, “Keini pawh mitdel kan ni ve elo?” an ti a.

⁴¹Isuan an hnênah, “Mitdel in nih chuan sual in nei lo vang; tûnah, ‘Kan hmu thei e,’ in ti miau si a, in sual chu a awm reng a ni,” a ti a.