Read Mizo Lushai TIRHKOHTE THILTIH 1 Bible Online

TIRHKOHTE THILTIH 1 - Mizo Lushai bible

TIRHKOHTE THILTIH 1

¹Theofil, ka lehkha hmasaah khân Isua rawngbâwl ṭan aṭanga vâna lâk chhoh a nih thlenga a thil tih leh a thu zirtîr zawng zawng chanchin ka ziak tawh a;

²a tirhkoh thlante chu Thlarau Thianghlim hmangin thu a chah a.

³A thih hnuin a nung leh tih hriat nân hai rual lohvin vawi tam tak an hnênah a inentîr a, ni sawmli chhûng Pathian ram thu sawiin a inlâr ṭhîn.

⁴An zînga a awm laiin, “Jerusalem khua chhuahsan suh u, Pa thutiam ka hrilh che u kha lo nghâk rawh u.

⁵Johana chuan tuiin a baptis a, nangni erawh chu ni rei lo tê-ah Thlarau Thianghlima baptis in ni ang,” tiin a hrilh a.

⁶An lo kal khâwm chuan, “Lalpa, tûnah em ni Israel-te ram i tundinsak leh dâwn?” tiin an zâwt a.

⁷Ani chuan, “Pain a hun leh ni, ama thu thu-a awm tûra a dah chu nangni lo hriat chi a ni lo ve.

⁸Nimahsela, Thlarau Thianghlim in chunga a lo thlen hunah thiltihtheihna in la nei ang a; tichuan, Jerusalem-ah te, Judai leh Samari ram pumah te, kâwlkil thlengin ka thuhretute in ni tûr a ni,” a ti a.

⁹Chûng thu chu a sawi zawh chuan, an en reng laiin vâna hruai chhoh a ni a, chhûmin an hmuh phâk lohvah a la bo ta a.

¹⁰Chutia vâna a chho an thlîr reng lai chuan mi pahnih puan vâr sin an kiangah an lo ding a.

¹¹“Galili mite u, engati nge vân lam ena in din reng le? He Isua in hnên ata vâna lâk chhoh hi, vâna a chho in hmuh ang tak hian a lo kal leh dâwn a ni,” an ti a.

¹²Tichuan, Oliv tlâng an tih aṭang chuan Jerusalem-ah an kîr leh ta a; chu tlâng chu Jerusalem aṭanga sabat ni kal tâwk vêl a ni.

¹³Khua an luh chuan an thlenna pindan chungnungah an chho va; chûngte chu Petera te, Johana te, Jakoba te, Andria te, Filipa te, Thoma te, Bartholomaia te, Mathaia te, Alfaia fapa Jakoba te, zealot pâwla mi Simona te leh Jakoba fapa Juda te an ni.

¹⁴An za chuan hmeichhiate leh Isua nu Mari leh Isua unaute nên lungrual takin an ṭawngṭai ho ṭhîn a.

¹⁵Ni khat chu, unaute awm khâwmnaah chuan Petera a ding a, an vai chuan za leh sawmhnih vêl an ni.

¹⁶“Unaute u, Thlarau Thianghlimin Isua mantute hruaitu Juda thu Davida kâa a lo sawi lâwk, Lehkha Thu kha a lo thleng tûr rêng a ni.

¹⁷Ani chu kan zîngah a tel ve ṭhîn a, kan rawngbâwlpui a ni ṭhîn.

¹⁸Ani chuan thil sual tiha a pawisa hlawhin hmun pakhat a lei a, a tla hlum a, a rîl chhuak vek khawpin a pum a ṭet a.

¹⁹Chu thu chu Jerusalem-a awm zawng zawngin an hria a, chu hmun chu anmahni ṭawngin, ‘Akeldama,’ an ti a, chu chu ‘Thisen hmun,’ tihna a ni.

²⁰Fakna hla bu-ah hetiang hian ziak a ni: ‘A in leh lo chu ram sela, A chhûngah tu mah chêng suh se,’ tih leh, ‘A hotu nihna chu mi dangin chang rawh se,’ tih hi.

²¹Chutichuan, kan Lalpa Isua hova kan chêttlat laia kan zînga tel ve ṭhîn,

²²Baptistu Johana hun aṭanga vâna min chhohsan ni thlenga tel ṭhîn mi pakhat, a thawhlehna min hriatpuitu atân kan thlang chhuak tûr a ni,” a ti a.

²³Tichuan, mi pahnih, Josefa, Barsaba an vuah, Justa an tih bawk leh Mathia an ruat a.

²⁴“Nang, Lalpa, mi zawng zawng rilru hretu, ama hmuna awm tûra a tirhkoh nihna leh a rawngbâwl hna tlâwmsantu Juda hmun luah tûrin he mite pahnihah hian a tu zâwk nge i thlan min hriattîr ang che,” tiin an ṭawngṭai a.

²⁶An pahniha chungah chuan ai an en a, an ai en chu Mathia chungah a tla a, Mathia chu tirhkoh Sâwmpakhatte zîngah chuan chhiar tel a ni ta a.