Read Mizo Lushai TIRHKOHTE THILTIH 10 Bible Online

TIRHKOHTE THILTIH 10 - Mizo Lushai bible

TIRHKOHTE THILTIH 10

¹Tin, Kaisari khuaah mi pakhat, Kornelia a awm a, Itali Sipai pâwl an tiha sipai za hotu a ni.

²Ani chu Pathian ngaihsak mi a ni a, a chhûngte zawng zawng nên Pathian ṭih mi an ni. Juda mi retheite hnêna phal taka thilpêk pe ṭhîn mi a ni a. Pathian hnênah a ṭawngṭai fo ṭhîn.

³Ni khat chu tlai dâr thum vêlah fiah takin inlârna a hmu a. Pathian tirh Vântirhkoh pakhat a hnênah a lo lût a, “Korneli,” a rawn ti a.

⁴Kornelia chuan ani chu a en reng a, a hlau va, “Lalpa, eng nge ni?” a ti a. Vântirhkoh chuan, ‘I ṭawngṭaina leh i thil pêkte kha Pathianin a hre reng a.

⁵Tûnah hian Joppa-ah mi tîr la, mi pakhat, Simona, Petera an tih chu kohtîr rawh.

⁶Tuipui kamah, savun siamtu Simona inah a thleng a ni,” a ti a.

⁷A betu Vântirhkoh chu a kal veleh, Kornelia chuan a chhiahhlawhte zînga mi pahnih leh sipai pakhat, Pathian ngaihsak tak, a tirhkah bîk ṭhinte zînga mi chu a ko va.

⁸Thil awmzia zawng zawng chu a hrilh a, Joppa-ah chuan a tîr ta a.

⁹Tin, a tûk chhûn laiah chûng miten khua an thlen dâwn chuan, Petera chu ṭawngṭai tûrin in chung zâwlah a lâwn chho va.

¹⁰A ril a ṭâm hle a, chaw ei a duh a; mahse, ei tûr an siam lai chuan zêlin a awm ta a.

¹¹Vân inhawng a hmu a, bâwm, puan hlai tak ang, a kil li-a hlin hi leia lo uai thla a hmu a.

¹²Bâwm chhûngah chuan ran ke pali nei te, bawkvâka kal leh tleng chi te, chunglêng sava tinrêngte a awm a.

¹³Aw hian, “Peter, tho rawh, talh la, ei rawh,” a rawn ti a.

¹⁴Petera erawh chuan, “Ni lo ve, Lalpa, thiang lo leh bawlhhlawh eng mah ka ei ngai hlei nêm,” a ti a.

¹⁵Aw chuan, “Pathianin a tihthianghlim tawh chu nangin bawlhhlawh ti suh,” a rawn ti leh a.

¹⁶Chutiangin vawi thum a rawn ti a. Bâwm chu vâna khai chhoh a ni leh ta a.

¹⁷Peteran a thil hmuh chu a ngaihna hre lova a awm lai chuan, Kornelia mi tirhte kha Simona in zâwt chhuakin, a kawt kawngkhâr bulah an lo ding a,

¹⁸“Hetah hian Simon Petera a thleng em?” tiin an lo zâwt a.

¹⁹Peteran a inlârna hmuh chu a ngaihtuah laiin, Thlarauvin a hnênah, “Mi pathumin an zawng a che.

²⁰Tho la, chhuk rawh, eng mah ringhlel lovin anmahni zui ang che; anni chu ka tirh an ni e,” a ti a.

²¹Chutichuan, Petera chu a chhuk a, mite hnênah chuan, “In zawn chu ka ni e. Eng nge in lo kal chhan?” a ti a.

²²Anni chuan, “Pathian ṭih mi, Juda hnam zawng zawngin an fak, sipai za hotu fel tak Kornelia chu vântirhkoh thianghlimin a bia a, i thu sawi a ngaihthlâk theih nân, a ina kala sâwm tûr chein a hrilh a, keini hi min rawn tîr a ni,” an ti a.

²³Chu mite chu a ko lût a, a riahtîr ta a. A tûkah chuan Petera chu a tho va, chu mite chu a zui ta a, Joppa-a unau ṭhenkhatte pawhin Petera chu an zui ve a.

²⁴A tûk lehah chuan Kaisari chu an thleng ta a. Kornelia chuan a laichîn unaute leh a ṭhian ṭhate a lo sâwm khâwm a, Petera te chu an lo nghâk reng a.

²⁵Peteran in a luh dâwn chuan Kornelia chuan a lo hmuak a, a ke bulah a bawkkhup a, chibai a bûk a.

²⁶Petera chuan ani chu a kai tho va, “Tho rawh, kei pawh mihring mai ka nih hi,” a ti a.

²⁷Inbe zêl chungin an lût a, mi tam tak awm khâwm chu a va hmu a.

²⁸An hnênah chuan, “Juda-te tân hnam dang zînga chêttlat leh anmahni tlawh a thian lohzia nangni ngeiin in hria e. Nimahsela, tu mah thiang lo leh bawlhhlawh ka ti tûr a ni lo tih Pathianin chiang takin mi hriattîr a ni.

²⁹Chuvângin, mi rawn sâwm veleh hnial lovin ka lo kal a nih hi. Eng nge mi rawn sâwm chhan le?” a ti a.

³⁰Kornelia chuan, “Vawiin hi a ni lina a ni ta, tûn ang hun tlai dâr thumah ka ṭawngṭai laiin, ngai teh, mi pakhat puan vâr sin ka bulah a lo ding a,

³¹‘Korneli, i ṭawngṭaina leh i thil pêkte Pathianin a hre reng e.

³²Chutichuan, Joppa-ah mi tîr la, Simon Petera kohtîr rawh. Tuipui kamah savun siamtu Simona inah a thleng a ni,’ a ti a.

³³Chuvângin, i hnênah mi ka rawn tîr ta nghâl a ni; i lo kal thei hi a ṭha e. Tûnah hian Lalpan thu a pêk apiang che ngaithla tûrin Pathian hmaah kan za hian kan lo awm khâwm a nih hi,” a ti a.

³⁴Petera chuan, “Pathianin mi duhsak bîk a neih lohzia ka hre chiang ta.

³⁵Hnam tin zîngah tu pawh amah ṭiha, thil dik taka ti apiang a lâwm zâwng mi an ni.

³⁶Israel fate hnênah Pathian chuan thu a rawn thlen a, remna Chanchin Ṭha chu Isua Krista hmangin a rawn puang ngei a; mahse, Isua chu mi zawng zawng Lalpa a ni.

³⁷Johanan baptisma thu a hril hnua Galili rama inṭan, Judai ram puma thil lo thleng thu kha in lo hre tawh phawt ang a.

³⁸Nazaret Isua chu Pathianin Thlarau Thianghlim leh thiltihtheihnain a thuam a, Pathian chuan a awmpui reng a, thil ṭha tia zin vêlin Diabola sawisak zawng zawng a tidam zêl a.

³⁹Judai ram leh Jerusalem-a a thil tih zawng zawng hretute kan ni; ani chu krawsa khêngbetin an tihlum a nih kha.

⁴⁰Mahse, Pathianin ni thum ni-ah a kaitho leh a, a inlârtîr a.

⁴¹Mi tin hmuhah erawh chuan a inlâr lo, Pathianin hretu atâna a lo ruat lâwk keiniho chauh hian kan hmu; a thawhleh hnu khân kan eiin kan in ho va.

⁴²Chu chu tlângaupui tûr leh, Ani chu mi nung leh mitthi chunga rorêltua Pathian ruat chu a ni tih mite hriattîr tûrin thu min pe a ni.

⁴³Zâwlnei zawng zawng pawhin, amah ring apiang a hming avângin an sual ngaihdam a ni ang tih an lo hril ṭhîn a nih kha,” a ti a.

⁴⁴Peteran chûng thu chu a sawi laiin, a ngaithlatu zawng zawng chungah chuan Thlarau Thianghlim a lo thleng a.

⁴⁵Serh tanho zînga ringtu, Petera rawn zuitute chuan, Thlarau Thianghlim thilpêk, Jentail-te hnênah pawh pêk a ni ve chu mak an ti êm êm a:

⁴⁶ṭawng hriat lohtea thu an sawi leh Pathian an fak chu an hre si a.

⁴⁷Peteran, “Hêng mite hian kan dâwn ang bawk khân Thlarau Thianghlim an dawng si a, tui hmanga baptisma an chan tuin nge khap thei ang?” a ti a.

⁴⁸Tichuan, Isua Krista hminga baptisma chan tûr thu a pe a. Chûng zawhah chuan châm rih tûrin an ngên a.