Read Mizo Lushai TIRHKOHTE THILTIH 11 Bible Online

TIRHKOHTE THILTIH 11 - Mizo Lushai bible

TIRHKOHTE THILTIH 11

¹Judai ram tina tirhkohte leh unau awmte chuan Jentail-te pawhin Pathian thu an awih ve tih an hre ta a.

²Peteran Jerusalem a thlen chhoh leh chuan, ‘serh tan a ṭûl,’ tituten an lo sawisêl a,

³“Serh tan lohte i tlawh a, an zîngah chaw te i ei mai a,” an ti a.

⁴Nimahsela, Petera chuan a bul aṭanga indawt zêlin an hnênah a hrilh fiah a.

⁵“Joppa-ah ka awm a, ka ṭawngṭai laiin zêlin ka awm a, bâwm, puan hlai tak ang kil li-a hlin, vân ata ka bula lo uai thla ka hmu a.

⁶Ka en reng a, ka ngaihtuah a, leia mi ran ke pali nei te, ramsa te, bawkvâk leh tleng chi te, chunglêng sava te a chhûngah chuan ka hmu a.

⁷“Tin, awin, ‘Peter, tho la, talh la, ei rawh,’ mi han tiin ka hre bawk a.

⁸Kei chuan, ‘Ni lo ve, Lalpa, thiang lo leh bawlhhlawh eng mah rêng ka kaah a lût ngai lo,’ ka ti a.

⁹Vân ata aw chuan, ‘Pathianin a tihthianghlim tawh chu nangin bawlhhlawh ti suh,’ mi han ti leh a.

¹⁰Chutiang hlîr chuan vawi thum a lo awm a, a vaiin vânah khai chhoh a ni leh ta a.

¹¹Chutih lai chuan mi pathum, Kaisari aṭanga ka hnêna an rawn tirhte chu ka thlen in kawtah an lo ding reng tawh a.

¹²Thlarauvin hreh lova anmahni zui tûrin mi hrilh a. Hêng unau paruk pawh hian mi zui ve a, Kornelia inah chuan kan va lût a.

¹³Ani chuan a ina Vântirhkoh a hmuh thu leh a hnêna, ‘Joppa-ah mi tîr la, Simon Petera kohtîr rawh,

¹⁴ani chuan thu a hrilh ang chia, a thu sawi avâng chuan nang leh i chhûngte zawng zawng chhandam in ni ang,’ a tih thute mi lo hrilh a.

¹⁵Thu chu ka han sawi ṭan a, Thlarau Thianghlim chu, a tîra kan chunga a lo thleng ang bawk khân an chungah a lo thleng ta a.

¹⁶Lalpan, ‘Johanan tuiin a baptis ṭhîn a, nangni erawh chu Thlarau Thianghlima baptis in ni ang,’ a tihte kha ka hre chhuak leh ta a.

¹⁷Keini, Lalpa Isua Krista ringtute min pêk ang thilpêk thuhmun reng Pathianin an hnênah pawh a pêk ve miau si chuan, kei tehlul hian Pathian ka hnial thei dâwn em ni?” a ti a.

¹⁸Chûng thu an hriat chuan an ngawi ta a, “Chuti a nih chuan Pathianin Jentail-te pawh sima nung tûrin kawng a hawnsak ve ta a nih chu,” tiin Pathian an fak ta a.

¹⁹Stefana avânga tihduhdahte kha Foiniki ramah te, Kupra thliarkârah te, Antiokei khaw thleng tein an kal darh a. Juda-te hnênah chauh lo chuan tu hnênah mah thu an hril lo.

²⁰An zînga ṭhenkhat chu Kupra thliarkâra mi leh Kurini khaw mite an ni a. Chûng mite chuan Antiokei an thlen chuan Grik mite hnênah pawh thu an sawi a. Lalpa Isua Chanchin Ṭha an hrilh ve ta a.

²¹Lalpan anni chu a pui a, mi tam takin an ring a, Lalpa lam an hawi ta a.

²²An chanchin chu Jerusalem-a Kohhran beng a lo thleng a, anni chuan Barnaba chu Antiokei-ah an tîr ta a.

²³A zu thlen chuan Pathian khawngaihna hnathawh chu a hmu a, a lâwm hle a. Rinawm taka Lalpa vuan tlat tûrin an za-in a fuih a.

²⁴Barnaba chu mi ṭha tak, Thlarau Thianghlim leh rinnaa khat a ni. Tichuan, mi tam tak Lalpa hnênah hruai an ni ta a.

²⁵Tin, Barnaba chu Saula zawng tûrin Tarsa lamah a kal leh ta a.

²⁶A han hmuh chuan Antiokei-ah a rawn hruai a, kum khat zet kohhran mite zîngah an tel ve a, mi tam tak an zirtîr ṭhîn a. Antiokei khuaah hian a ni, zirtîrte chu, ‘Kristian,’ an tih hmasak ber ni.

²⁷Chûng lai chuan Jerusalem aṭangin zâwlnei ṭhenkhat Antiokei-ah an lo kal a.

²⁸An zînga mi pakhat Agaba chu a ding a, Thlarau hriattîrin ram tina ṭâmpui mitthi a tlâk tûr thu a hrilh lâwk a. Klaudia lal laiin ṭâm chu a tla ta a.

²⁹Zirtîrte chuan an theih ang tâwk ṭheuhva thawhin Judai rama unau awmte ṭanpuina thawn an tum a.

³⁰An tum ang chuan an ti a, upate hnênah Barnaba leh Saula kutah an thawn ta a.