Read Mizo Lushai TIRHKOHTE THILTIH 12 Bible Online

TIRHKOHTE THILTIH 12 - Mizo Lushai bible

TIRHKOHTE THILTIH 12

¹Tin, chutih lai chuan lal Herodan kohhranho zînga mi ṭhenkhat a tiduhdah ṭan ta a.

²Jakoba, Johana unaupa chu, khandaihin a sât hlum a.

³Chu chuan Juda-te a tilâwm tih a hriatin Petera pawh chu man a tum leh ta zêl a (Chu chu Chhang dawidim telh loh Kût lai a ni).

⁴Petera chu a man a, tân inah a khung a, sipai pâwl li, pali zêla inchhâwkin a vêntîr a. Kalhlên kût zawha mipui hmaa hruai chhuah a tum a ni.

⁵Nimahsela, ani chu Kohhran miten ṭhahnemngai takin Pathian hnênah an ṭawngṭaisak a.

⁶Herodan hruai chhuah a tum dâwn zân chuan Petera chu a bân khing hniha hlinin sipai pahnih kârah a muhîl a. A dangte chuan kawngkhâr bula dingin an vêng tlat bawk a.

⁷Ngai teh, Lalpa tirh Vântirhkoh pakhat a lo ding a, rip chhûng chu a lo êng ta a; Petera chu a nâkah a bêng harh a, “Tho thuai rawh,” a ti a. Khaidiat pawh chu a bân ata a tla ta a.

⁸Vântirhkoh chuan “Insiam la, i pheikhawk bun rawh,” a ti a. Chutiang chuan a ti a. Vântirhkoh chuan “I kawr ha la, mi zui rawh,” a ti leh a.

⁹Petera chuan a zui chhuak ta a. Vântirhkoh thiltih chu a tak a ni tih a hre lo va, zêla awm emaw a inti a ni.

¹⁰Vêngtu hmasa ber leh a dawttu chu an kal pêl a, khawpui lama kal chhuahna tûr thîr kawngkhâr chu an va thleng a, chu kawngkhâr chu amahin a inhawng ta a, an kal chhuak a, kawtthlêr pakhata an kal laiin vântirhkoh chuan a kalsan ta a.

¹¹Petera chu a lo harh chiang a, “Lalpan a vântirhkoh a rawn tîr a, Heroda kut ata leh Juda-ten ka chunga thleng ngei tûra an ngaih lak ata mi chhan chhuak a ni tih tûnah ka hre chiang ta,” a ti a.

¹²Thil awmzia a hriat fiah hnu chuan, Johan Marka nu Mari inah chuan a va kal a, chutah chuan mi tam tak an awm khâwm a, an lo ṭawngṭai a.

¹³Petera chuan kawngkhâr chu a kik a, nula pakhat, Rodi chu kawng hawng tûrin a va kal a.

¹⁴Petera aw a hriat chuan a lâwm lutuk a, kawng hawng lovin a tlân lût leh a, kawngkhâr bulah Petera a ding tih a va hrilh a.

¹⁵Anni chuan, “I â ta a nih hi,” an lo ti a. Ani chu a ṭang tlat a; mahse anni chuan, “Amah vêngtu Vântirhkoh a nih chu,” an ti leh zêl a.

¹⁶Petera chuan kawngkhâr chu a kik leh ṭhîn a. Kawng an han hawn chuan amah chu an hmu ta a, mak an ti êm êm a.

¹⁷Ani chuan anniho chu ngawi tûrin a kutin a zâp a, Pathianin tân in ata a hruai chhuah dânte chu a hrilh ta a. “Hêng thu hi Jakoba leh unaute va hrilh rawh u,” a ti a. A chhuak a, hmun dangah a kal ta a.

¹⁸Khua a lo vâr chuan vêngtu sipaite chu, “Khawiah nge Petera a awm tâk?” tiin an buai chhe ta mai a.

¹⁹Heroda pawhin a zawng chiam a; mahse, a hmu si lo va; vêngtute chu a chhuahchhâl a, anni chu tihhlum tûrin thu a pe a. Heroda chu Judai ram ata Kaisari-ah a kal chhuk a, chutah chuan a châm ta reng a.

²⁰Heroda chu Tura leh Sidon mite chungah a thinur hle a. Anni chu thu khat vuain amah be tûrin an lo kal a, lal upa Blasta chu lamṭangah an siam a. An ramin Heroda rama pûr chaw ṭhîn an nih avângin inrem an ngên a.

²¹Inbiakna tûr ni-ah chuan Heroda chu lal kawr ha-in lalṭhutthlêngah a ṭhu a, an hnênah thu a sawi a.

²²“Pathian aw a ni, mihring aw a ni lo,” tiin mipuite chu an lo au ṭhîn a.

²³Ani chuan chawimawina chu Pathian hnêna a pêk loh avângin Lalpa tirh vântirhkohvin chawplehchilhin a man a, rûlhûtin a ei a, a thi ta a.

²⁴Pathian thu erawh chu a darh a, ringtu an pung ta zêl a.

²⁵Barnaba leh Saulan an rawngbâwl hna an zawh chuan Johan Marka hruaiin Jerusalem aṭangin an kîr leh ta a.