Read Mizo Lushai TIRHKOHTE THILTIH 13 Bible Online

TIRHKOHTE THILTIH 13 - Mizo Lushai bible

TIRHKOHTE THILTIH 13

¹Tin, Antiokei kohhran mite zîngah chuan zâwlneite leh zirtîrtute an awm a. Chûngte chu: Barnaba te, Sumeona, Nigera an tih te, Kurini mi Lukia te, lal Herodan unauva a neih Manaina te, Saula te an ni a.

²Chaw ngheia Lalpa an biak ho laiin Thlarau Thianghlimin, “Barnaba leh Saula hi anmahni ka ruat chhan ti tûrin mi tihhransak rawh u,” a ti a.

³Chutichuan, chaw an nghei a, an ṭawngṭai a, an chungah kut an nghat a, an tîr chhuak ta a.

⁴Chutichuan, Thlarau Thianghlim tirh chhuahin Selukai khuaah an chhuk a, chuta ṭang chuan Kupra thliarkârah lawngin an kal a.

⁵Salamis khua an thlen chuan Juda-ho sunagog-ahte Pathian thu an hril a. Johana pawh anmahni ṭanpuitu atân an hruai ve a.

⁶Thliarkâr chu a pumin, Pafos khaw thlengin an fang chhuak a. Dawithiam, zâwlnei der, Juda mi pakhat, Bar-Isua an hmu a.

⁷Chu mi chu Ramawptu fing tak Sergia Paula hnêna awm a ni. Chu Ramawptu chuan Barnaba leh Saula chu lêngah a sâwm a, Pathian thu hriat a duh a.

⁸Eluma, dawithiam (chu chu a hming awmzia a ni) chuan Ramawptu chu rinna thu chu awih lohtîr a tum a, anni chu a lo dodâl a.

⁹Saula, Paula an tih bawk chu, Thlarau Thianghlimin a khat a, ani chu a en reng a,

¹⁰“Nang bumna tinrêng leh suahsualna tinrênga khatpa, nang Diabola fapa, nang thil ṭha zawng zawng dodâltu, Lalpa kawng tluang tihbuai i bâng lo vang maw?

¹¹Hre rawh, tûnah Lalpa kut i tuar dâwn a ni, i mit a del ang a, khaw êng i hmu rih lo vang,” a ti a. Chu veleh chhûm leh thimin amah chu a bawh a, kaitu tûr zawngin a phar ta ruai a.

¹²Ramawptu chuan chu chu a hmuhin a ring ta a, Lalpa thu an zirtîrna chuan a hneh hle a ni.

¹³Paula leh a ṭhiante chu Pafos aṭang chuan lawngin an chhuak a, Pamfulia rama Perga khua an thleng a. Johana khân anni chu a hawsan a, Jerusalem-ah a kîr leh ta a.

¹⁴Perga aṭang chuan Pisidia rama Antiokei khuaah an kal zêl a, sabat niin sunagog-ah inkhâwmin an ṭhu ve a.

¹⁵Dân bu leh Zâwlnei Lehkhabu chhiar hnu chuan sunagog hotute chuan mi an tîr a, “Unaute u, min fuihna tûr thu eng emaw in neih chuan sawi rawh u,” an va ti a.

¹⁶Tichuan, Paula chu a ding a, kutin a zâp a, a sawi ta a: “Nangni Israel mite leh Pathian ṭihtute u, ngaithla rawh u.

¹⁷Hêng Israel mite Pathian hian kan pute kha a thlang a, an mikhualna Aigupta rama an awm chhûng khân hnam ropui takah a din a, chuta ṭang chuan a thiltihtheihna ropui tak hmangin a hruai chhuak a.

¹⁸Kum sawmli chhûng lai thlalêrah dawhthei takin a hruai a.

¹⁹Tin, Kanan rama hnam sarih a tihtlâwm hnu khân an ram chu a luahtîr a.

²⁰Chûng chuan kum zali leh sawmnga chhûng lai a awh a. Chûng hnuah chuan rorêltute a pe ṭhîn a, zâwlnei Samuela thleng khân.

²¹Chumi hnu chuan lal an dîl a, Pathianin Benjamina chi a mi, Kisa fapa Saula, kum sawmli chhûng atân a pe leh a.

²²A lalna a tihtâwp hnuah Pathianin Davida a laltîr a, ‘Ka mi duhzâwng tak, Jesaia fapa Davida ka chhar ta, ani chuan ka duhzâwng apiang a ti ang,’ a ti a.

²³Chu mi thlahte zîng aṭang chuan, Pathianin a thutiam ang zêlin, Israel-ho hnênah Chhandamtu Isua a rawn pe ta a.

²⁴Isuan rawng a bâwl ṭan hmain Johanan, sima baptisma chan tûr a nih thu Israel mi zawng zawng hnênah a lo hril hmasa a.

²⁵Johana chuan, a rawngbâwlna a hlen chhuah dâwn lai khân, ‘Nangnin tu-ah nge mi ruat? Ani chu ka ni lo ve. Ngai teh u, ka hnungah a lo kal mêk a ni, a pheikhawk phelhsak tlâk pawh ka ni lo ve,’ a ti a.

²⁶“Ka unau, Abrahama thlahte leh nangni Pathian ṭih zawng zawngte u, chu Chhandamtu chanchin chu kan zaa hnênah a lo thleng ta a ni.

²⁷Jerusalem-a awmte leh an rorêltuten ani chu an hre lo va, sabat ni apianga an chhiar ṭhin zâwlneite thu an hriatthiam loh avângin ani chu thiam loh an chantîr a, zâwlneite thu chu an thlen kimtîr ta a ni.

²⁸Thihna khawp meuh a chungah eng mah an hmuh loh pawhin tihlum tûrin Pilata an ngên a.

²⁹A chanchin ziak zawng zawng kha a thlen zawhin kraws ata an la thla a, thlânah an phûm a.

³⁰Nimahsela, Pathianin ani chu mitthi zîng ata a kaitho leh ta a.

³¹Galili ram aṭanga Jerusalem-a ama ruala chho vete hnênah ni rei tak chhûng a inlâr ṭhîn a; chûng mite chu tûnah hian Israel mite hnêna a thuhretute an ni.

³²Keini pawh hi Pathianin min thlahtute hnêna a lo tiam Chanchin Ṭha chu hriattîr tûr che u-in kan lo kal a ni,

³³keini an thlahte hnêna Isua kaithova a rawn hlen tâk thu hi. pahnihnaah: ‘Nang zawng ka fapa i ni e, Vawiin hian fa-ah ka neih ta a che,’ tih ang khân.

³⁴Tin, a ruang pawh ṭawih lova a kaihthawh tûr thu: ‘Davida hnêna ka thutiam thianghlim, Thlâwn lo tûr chu ka pe ang che,’ tia a sawi ang khân.

³⁵Chuvângin, hmun dangah pawh, ‘I mi thianghlim hi a ṭawih i phal lo vang,’ a ti bawk a.

³⁶Davida zawng a dam chhûngin Pathian duhzâwnga rawng a bâwl hnuah a muhîl a, a thlahtute bulah an phûm a, a ṭawih ral tawh alâwm.

³⁷Pathianin a kaihthawha erawh kha chu a ṭawih ve lo.

³⁸Chutichuan, unaute u, hre rawh u; amah avânga sual ngaihdamna thu hi kan rawn hrilh che u a ni. Mosia Dâna thiam in chan theih lohna zawng zawngah khân,

³⁹Isua ringtu apiang thiam chantîr an ni ta.

⁴⁰Chuvângin, fîmkhur rawh u, chutilo chuan, zâwlneite lehkhabua sawi kha in chungah a thleng dah ang e:

⁴¹‘Pathian hmusittute u, en rawh u, mak ti ula, boral rawh u. In dam chhûngin thil kawng khat ka tih hi; chu thil chu miin hrilh che u mah sela, in awih chuang tawp lo vang,’ tih hi,” a ti a.

⁴²An inkhâwm bâng lo chhuak chuan sabat leha chûng thu chu sawi leh tûrin an ngên a.

⁴³Inkhâwm an ṭîn fel hnu chuan, Juda tam tak leh Juda saphun Pathian ngaihsak tam takin Paula leh Barnaba chu an zui a, anni chuan Pathian khawngaihnaa awm reng tûrin an lo fuih a.

⁴⁴Sabat lehah chuan Lalpa thu ngaithla tûrin a khua thawin an rawn inkhâwm a.

⁴⁵Nimahsela, Juda-ten mipui an hmuh chuan an îtsîk ta êm êm a; Paula thu sawi chu an hnial kalh a, nasa takin an sawichhia a.

⁴⁶Paula leh Barnaba chuan huai takin, “Pathian thu hi nangni hnêna hril hmasak tûr rêng a ni; nimahsela, in hnar a, chatuan nun nei tlâk lova in inngaih ahnu chuan, hre rawh u, Jentail-te lam kan hawi ang.

⁴⁷Chutianga ti tûrin Lalpan thu min pe a ni: ‘Jentail-te êng atân ka ruat a che, kâwlkil thlenga mite chhandamna atân,’ tih ziak ang khân,” an ti a.

⁴⁸Jentail-ten chu thu chu an hriat chuan an lâwm a, Lalpa chu an fak a, chatuan nun nei tûra ruat apiang chuan an ring ta a.

⁴⁹Lalpa thu chu chumi ram pumah chuan a darh ta a.

⁵⁰Nimahsela, Juda-te chuan miliannuho Pathian ngaihsakte leh khuaa mi pawimawhte chu an fuihpawrh a, Paula leh Barnaba chu an bei a, an ram ata an hnawt chhuak ta a.

⁵¹Anmahni an demzia tihlan nân tirhkohte chuan an kephah ata vaivut an thing thla a, Ikonion khuaah an kal ta a.

⁵²Zirtîrhote chu Thlarau Thianghlimin an khat a, an lâwm ta êm êm a.