Read Mizo Lushai TIRHKOHTE THILTIH 14 Bible Online

TIRHKOHTE THILTIH 14 - Mizo Lushai bible

TIRHKOHTE THILTIH 14

¹Chutiang bawk chuan Ikonion-ah pawh Juda-te sunagog-ah tirhkohte chu an inkhâwm a, an thu sawi avângin Juda leh Grik tam takin an ring a.

²Ring duh lo Juda-te chuan Jentail-te an fuihpawrh a, unaute chu an huattîr a.

³Mahse, tirhkohte chu rei fe an châm a, Lalpa thu chu huai takin an hril ṭhîn a. A khawngaihna thu an hril ṭhin chu nemngheh nân Lalpan anmahni hmangin chhinchhiahna leh thil mak tam tak a ti a.

⁴Khuaa mipuite chu an inṭhen a, a ṭhenin Juda-te an ṭan a, a ṭhenin tirhkohte an ṭan a.

⁵Jentail-te leh Juda-te leh an rorêltute chuan, sawisak hrepa lunga den an tum tih

⁶tirhkohten an hriatin, Lukaoni rama Lustra khuaah te, Derbe khuaah te leh a vêl ramah te an tlânsan ta a.

⁷Chûngahte pawh chuan Chanchin Ṭha an hril zêl a.

⁸Tin, Lustra-ah chuan piangsual pakhat, ṭhu reng hi a awm a, a pian tirh ata kein a la kal ngai lo va.

⁹Chu mi chuan Paula thu sawi chu a ngaithla a, Paulan ani chu a en reng a, damna tûra rinna a nei tih a hriatin,

¹⁰ring takin, “I kein ding chhuak rawh,” a ti a. Ani chu a zuang tho va, kein a kal thei ta a.

¹¹Mipuiten Paula thiltih chu an hmuhin, Lukaoni ṭawngin ring takin, “Pathiante chu mihring angin kan zîngah an lo chhuk ta a nih hi!” an ti a.

¹²Barnaba chu Zeusa an ti a, Paula chu thusawitu ber a nih avângin Hermea an ti a.

¹³An Pathian Zeusa Tempul chu kawtchhuahah a awm a, chuta puithiam chuan bâwngpa leh pangpâr ṭhite khaw kulh kawngkaah chuan a rawn la a; mipuite nên chuan tirhkohte hnêna inthawina hlan an tum ta a.

¹⁴Tirhkoh Barnaba leh Paulan chu chu an hriat chuan, an puan an pawtthlêr a, mipui zîngah chuan an zuang lût a, an au va,

¹⁵“Pute u, hêng thil hi engah nge in tih? Keini pawh nangmahni ang mihring bawk kan nih hi. Hêng thil lawilo hi in hawisana, vân te, lei te, tuifinriat te leh a chhûnga thil awm zawng zawng siamtu Pathian Nung lam in hawi theihna tûrin Isua Chanchin Ṭha kan rawn hrilh che u a ni.

¹⁶Pathian chuan tûn hmain hnam tin anmahni dân anga an awm a phal a.

¹⁷Chuti chung pawhin chhui chhuah theih loh tûrin amah a inthup ngai lo; a thil ṭha tihin a inhriattîr a, vân aṭangin ruah a pe che u a, a hun tê-ah in thlaite a rahtîr a, ei tûr a pe che u a, in rilru a tihlim êm êm ṭhîn a ni,” an ti a.

¹⁸Chûng thu chu sawiin mipuite chu an hnêna inthawina hlân lo tûrin an khap thei ta hrâm a.

¹⁹Nimahsela, Antiokei leh Ikonion aṭangin Juda ṭhenkhat an lo kal a, mipuite chu an rawn hmin a, Paula chu lungin an dêng a, a thi emaw tiin khua ata an hnûk chhuak a.

²⁰Mahse, zirtîrten an din hual laiin ani chu a lo tho va, khuaah chuan a lût leh ta a. Tin, a tûkah chuan Barnaba nên Derbe-ah an kal ta a.

²¹Chu khuaah chuan Chanchin Ṭha an hril a, mi tam tak zirtîrah an siam hnuin Lustra-ah an kîr leh a, Ikonion-ah te, Antiokei-ah te an kal zêl a.

²²“Hrehawm tam tak tuarin Pathian ramah kan lût tûr a ni rêng a ni,” tiin zirtîrte rilru an tinghet a, rinna chu vuan tlat tûrin an fuih a.

²³Kohhran tinah upate an ruat zêl a, chaw ngheiin an ṭawngṭai a, an rin Lalpa hnênah an kawltîr zêl a.

²⁴Pisidia ram chu an fang chhuak a, Pamfulia an lo thleng leh a.

²⁵Perga-ah thu an hril a, Atalia khuaah an chhuk a;

²⁶lawngin an kal a, Antiokei an thleng leh ta a. He khua hi an hna thawh tâk thawk tûra unauten Pathian khawngaihnaa an kawltîra, an zin chhuah ṭanna kha a ni.

²⁷An thlen chuan kohhran mite chu an ko khâwm a, Pathianin anmahni hmanga thil a tih zawng zawng leh Jentail-te tân pawh Isua rinna kawng a inhawn thu te an hrilh a.

²⁸Zirtîrte hnênah chuan rei fe an châm ta a.