Read Mizo Lushai TIRHKOHTE THILTIH 15 Bible Online

TIRHKOHTE THILTIH 15 - Mizo Lushai bible

TIRHKOHTE THILTIH 15

¹Judai ram aṭangin mi ṭhenkhat an lo chhuk a, “Mosia Dân anga serh in tan kher loh chuan chhandam in ni thei lo vang,” tiin unaute chu an rawn zirtîr a.

²Chutichuan, Paula leh Barnaba te nên nasa takin an inhnial a, an inkalh tlat avângin Paula leh Barnaba leh an zînga mi ṭhenkhat, Jerusalem-a tirhkohte leh upate hnêna kal chhova, chu thu chu sawi tûrin an ti ta a.

³Tichuan, kohhran mite chuan an thlah a, Foiniki ram leh Samari ram an fang chhuak a, chûnga unau awmte hnênah chuan Jentail-ten Pathian thu an awih tâk thu chu an sawi zêl a; chu chuan a tilâwm hle hlawm a.

⁴Jerusalem an han thlen chuan kohhran mite, tirhkohte leh upate chuan an lo lâwm a; Pathianin anmahni hmanga thil a tih zawng zawng an hnênah an hrilh a.

⁵Nimahsela, Farisai pâwla mi, ringtu ṭhenkhat an ding chhuak a, “Jentail-te chu an serh tan tûr a ni a, Mosia Dân pawh zâwm tûrin phût tlat tûr a ni,” an ti a.

⁶Chu thu ngaihtuah tûr chuan tirhkohte leh upate chu an inkhâwm a;

⁷Rei tak an ngaihtuah hnuin Petera a ding a, an hnênah, “Unaute u, Jentailten keima ka aṭanga Chanchin Ṭha an hriata an rinna tûrin Pathianin hmâna in zîng ata mi thlan kha in hria e.

⁸Rilru hretu Pathian chuan keini min pêk ang bawka an hnêna Thlarau Thianghlim pein, Jentail-te pawh a duh a ni tih a tihlan kha.

⁹Keini leh anni a thlei hrang lo va, an rin avângin an rilru a tithianghlim a.

¹⁰Chutichuan, min thlahtute leh keini zawh tawh loh nghâwngkawl kha, tûnah zirtîrte kova bah luihtîr tumin engati nge Pathian in hnial le?

¹¹Anmahni ang bawkin keini pawh Lalpa Isua khawngaihna avânga chhandam tûr niin kan inring si a,” a ti a.

¹²Tichuan, mipui zawng zawng chu an ngawi ta a, Barnaba leh Paula chuan anmahni hmanga Jentail-te zînga chhinchhiahna leh thil mak Pathianin a tihte an sawi chu an ngaithla ṭhuap a.

¹³An ngawih tâk hnu chuan Jakoban a sawi ve a, “Unaute u, ka thu hi ngaithla rawh u.

¹⁴Sumeona khân Pathianin Jentail-te ngaihsakin ama hming pu tûra an zînga mi a lâk chhuah ṭan thu a sawi a.

¹⁵Chu thu leh zâwlnei thu ziak hi a inrem a ni:

¹⁶‘Chûng hnu chuan ka kîr leh ang a, Davida bâwkte chim kha ka tungding leh ang; A chhe laite ka siam ṭha ang a, ka din thar leh ang.

¹⁷Tichuan, mi dangte pawhin Lalpa an zawng ang a, Jentail ka hming pu zawng zawngte nên.

¹⁸Hmasâng aṭanga hêng thu hriattîrtu Lalpa chuan a ti a ni,’ tih hi.

¹⁹“Chuvângin, hetiang hian ti ila ka ti a ni: Jentail-te zînga Pathian thu awihte chu tibuai lo ila;

²⁰milem biakna thil bawlhhlawh laka inthiarfihlîm tûr te, inngaih bânsana, sa rehhlum sa leh sa thisen ei lo tûrin lehkha i thawn zâwk ang u.

²¹Mosia Dân chu hmasâng aṭangin khaw tinah an puang a, sunagog-ah te sabat ni apiangin an chhiar ṭhîn,” a ti a.

²²Tichuan, tirhkohte leh upate chuan, kohhran mi zawng zawng nên, an zîng ata mi thlan chhuaha, Paula leh Barnaba ruala Antiokeia tirh nghâl ṭhain an hria a. Juda, Barsaba an tih leh Sila an thlang a, anni chu unaute zînga hruaitu deuhte an ni.

²³Hetiang hian lehkha an ziak a, an kentîr a: “Tirhkohte leh upate leh in unaute hian, Antiokeia mi te, Suria rama mi te, leh Kilikia rama Jentail unau awmte chu chibai kan bûk e.

²⁴Kan zînga mi ṭhenkhat in hnêna lo kalin, kan thu hmu si lovin an tibuai che u a, in rilru an timangang tih kan lo hria a.

²⁵Kan duh tak Barnaba leh Paula, kan Lalpa Isua Krista hming avânga thih huamte rual hian,

²⁶thukhat vuain, kan aiawh kan thlante in hnêna rawn tirh ṭhain kan hria a.

²⁷Tichuan, Juda leh Sila hi kan rawn tîr a ni; anni pawhin hêng thu bawk hi ṭawngkain an hrilh ang che u.

²⁸Thlarau Thianghlim leh keinin hêng thil pawimawh zual lo hi chu in chungah phurrit dang nghat lo ila ṭhain kan hria.

²⁹Milem biakna thil ei lo ula, sa thisen leh sa reh hlum sa ei lo ula, inngaih bânsan bawk ula kan ti: hêng thil lakah hian in inthiar fihlîm chuan in tân a ṭha ang, Dam takin,” tiin an ziak a.

³⁰Tichuan, an kaltîr ta a, Antiokei an thleng thla a, mipui an ko khâwm a, lehkha chu an pe a.

³¹An han chhiar a, fuihna thu avâng chuan an lâwm ta hle a.

³²Juda leh Sila chu zâwlnei an ni bawk a, unaute chu thu tam takin an fuih a, an tinghet a.

³³Rei fe an châm hnuin, anmahni tîrtute hnêna thlamuang taka kîr leh tûrin unaute chuan an hâwntîr ta a.

³⁵Paula leh Barnaba erawh chu Antiokei-ah chuan mi dang tam takte nên an awm ta reng a, Lalpa thu an hril a, an zirtîr ṭhîn a.

³⁶Ni eng emaw zât hnuah chuan Paulan Barnaba hnênah, “Kal leh ila, Lalpa thu kan hrilhna khaw tina unau awmte kha tlawh ila, engtin nge an awm tâk i kan teh ang,” a ti a.

³⁷Barnaba chuan Johan Marka kha hruai leh a duh a.

³⁸Paula erawh chuan, Pamfulia ram aṭanga anmahni a kîrsana, an hnathawhnaa a kal ve zêl tâk loh avâng khân ani chu hruai leh mi niin a ngai lo va.

³⁹Tichuan, hmaisen khawpa an inhnial tâk avângin anni pawh chu an lo inṭhen ta a. Barnaba chuan Marka chu a hruai a, Kupra thliarkâr lamah lawngin an kal ta a.

⁴⁰Paula erawh chuan Sila a thlang a, unauten Lalpa khawngaihnaa an kawltîr hnuin an zin chhuak ve ta a.

⁴¹Suria ram leh Kilikia ram chu an fang chhuak a, kohhran mite chu an tinghet zêl a.