Read Mizo Lushai TIRHKOHTE THILTIH 16 Bible Online

TIRHKOHTE THILTIH 16 - Mizo Lushai bible

TIRHKOHTE THILTIH 16

¹Derbe khua tlawhin Lustra an thleng a, chutah chuan zirtîr pakhat Timothea a awm a, a nu chu ringtu Juda a ni a, a pa erawh chu Grik mi a ni.

²Lustra leh Ikonion-a unaute chuan ani chu an fak hle a.

³Paulan zinpui atân a duh a, a pa chu Grik mi a ni tih an hre vek a, chûng lai vêla Juda-te avâng chuan a serh a tansak a.

⁴Khaw tinah an kal pahin Jerusalem-a tirhkohte leh upate thu rêl kha zâwm tûrin an hrilh zêl a.

⁵Tichuan, kohhran mite chu rinnaah an tinghet a, ni tin an pung deuh deuh a.

⁶Asia rama thu hril lo tûrin Thlarau Thianghlimin a tih avângin Frugia leh Galatia inrina lai vêl chu an fang chhuak a.

⁷Musia ramri an thleng a, Bithunia rama luh an tum a, chu pawh chu Isua Thlarauvin a phal lo va.

⁸Tichuan, Musia ram chu an kal tlang a, Troas khua an thleng thla a.

⁹Paulan zânah inlârna a hmu a, Makedonia rama mi pakhat dingin, “Makedonia ramah lo kai la, min pui rawh,” tiin a lo ngên a.

¹⁰Chu inlârna chu a hmuh zawh chuan Makedonia rama kal kan tum ta nghâl a, an hnêna Chanchin Ṭha hril tûrin Pathianin min ko niin kan hre ta a.

¹¹Troas aṭang chuan lawngin kan chhuak a, tluang takin Samothraki khua kan thleng a, a tûkah Neapolis khua kan thleng leh a.

¹²Chuta ṭang chuan Filipi khuaah kan kal a. Chu khua chu Makedonia ram bial khaw pawimawh tak, Rom sawrkâr khua a ni. Chutah chuan ni eng emaw zât kan châm a.

¹³Sabat ni chuan kulh kawngkhâr pâwn lui kamah ṭawngṭaina hmun nia kan rinah chuan kan kal a; hmeichhe lo kal khâwmho hnênah chuan ṭhuin thu kan sawi a.

¹⁴Thuatira khuaa mi nu pakhat, Ludi, Pathian ṭih, puan senduk zuartu chuan kan thu sawi a ngaithla ve a. Paula thusawite zâwm tûrin Pathianin a rilru a hawnsak a.

¹⁵A chhûngte nên baptisma an chang a, “Lalpa ring takzeta mi ruat chuan, ka inah lo thleng rawh u,” tiin min ngên a, min chelh ta a.

¹⁶Ni khat chu ṭawngṭaina hmuna kan kal lai chuan bawih nula pakhat, ramhuai pai, aien thiam hian min tâwk a. A aien thiam chu a pute chuan an hlâwkpui hle a.

¹⁷Chu mi chuan Paula leh keini chu min zui a, “Hêng mite hi Pathian Chungnungbera bawihte an ni a, chhandamna kawng an rawn hrilh che u a nih hi,” tiin a au a au va.

¹⁸Chutiang chuan ni tam tak a ti a, Paula chuan a ngaithei ta lo va, a hawi a, ramhuai hnênah chuan, “Isua Krista hmingin thu ka pe a che; a kawchhûng ata lo chhuak rawh,” a ti a. Chutih lai tak chuan a lo chhuak ta nghâl a.

¹⁹A pute chuan an sum hnâr a chat ta tih an hriatin Paula leh Sila chu an man a; hotute hmaah, vântlâng pun khâwmnaah chuan an hnûk lût a.

²⁰Tichuan, rorêltute hnênah an hruai a, “Hêng mite hi Juda an ni a, kan khua an rawn tibuai a ni.

²¹Keini Rom mite zawm ve leh tih ve thiang lo dân dang an hril a ni,” an ti a.

²²Tichuan, mipuite pawh chu tirhkohte bei tûrin an lo thawk ve a; rorêltute chuan an kawrte an hlihsak a, tianga vuak thu an pe a.

²³An vuak nek hnuah tân inah an khung a, vêngtu hnênah chuan anni chu him taka vêng tûrin thu an pe a.

²⁴Chuti taka thu an pêk khauh avâng chuan anni chu tân in chhûngrilah a khung a, an keahte thing kawl a buntîr a.

²⁵Zânlai vêlah chuan Paula leh Sila chu Pathian hnênah an ṭawngṭai a, hla an sa a, mi tângten an ngaithla a.

²⁶Thâwklehkhatah lîr nasa takin a lo nghîng a, tân in lungphûmte lamin a nghîng a, kawngkhâr zawng zawngte a inhawng a, tângho kawl bunte pawh chu a inphelh nghâl ta vek a.

²⁷Tân in vêngtu chu a lo harh a, mi tângte chu an tlân chhuak ta vek emaw a ti a, a ngûnhnâm a phawi a, intihhlum a tum a.

²⁸Paula chu ring takin a au va, “Eng mah intih suh, kan za-in hetah kan la awm vek alâwm,” a ti a.

²⁹Chu veleh êng a lam a, a zuang lût a, hlauva khûr chungin Paula leh Sila hmaah chuan a bawkkhup a.

³⁰Anni chu pâwnah a hruai chhuak a, “Pute u, chhandam ka nih theih nân eng nge ka tih tûr?” a ti a.

³¹Anni chuan, “Lalpa Isua ring la; tichuan, chhandam i ni ang, nang leh i chhûngte nên,” an ti a.

³²Amah leh a ina awm zawng zawng chu Lalpa thu an hrilh a.

³³Chumi zân, chumi dârkâr la la chuan Paula te chu a hruai a, an vuakna hliamte chu a silsak a, an chhûngin baptisma an chang ta nghâl a.

³⁴Tin, a inah a hruai a, ei tûr a hlui a, Pathian an rin tâk avângin an chhûngin an hlim ta êm êm a.

³⁵A tûk zîngah rorêltuten, “Kha mite kha chhuah rawh,” tia hrilh tûrin tân in vêngtu hnênah pulis an tîr a.

³⁶Tân in vêngtu chuan an thu chu Paula a hrilh a, “Rorêltute chuan chhuah tûr che uin mi an rawn tîr a, tûnah lo chhuak ula, thlamuang takin kal rawh u,” a ti a.

³⁷Nimahsela, Paula chuan an hnênah, “Rom mi kan ni a, thiam loh chang pawh kan ni si lo va, vântlâng hmuhin min vua a, tân inah min khung a. Tûnah a rûkin min chhuah an tum vei em ni? A ni tawp lo vang, anmahni ngei lo kal sela, min va hruai chhuak rawh se,” a ti a.

³⁸Pulis-te chuan chûng thu chu rorêltute an va hrilh a. Rom mi an ni tih an hriat chuan an hlau ta a.

³⁹An va kal a, thupha an chawi a, an hruai chhuak a, an khua ata kal chhuak tûrin an ngên a.

⁴⁰Tichuan, tân in ata chu an chhuak a, Ludi inah an kal a, unaute chu an hmuh chuan an thlamuan a, an chhuak ta a.