Read Mizo Lushai TIRHKOHTE THILTIH 17 Bible Online

TIRHKOHTE THILTIH 17 - Mizo Lushai bible

TIRHKOHTE THILTIH 17

¹Tin, Amfipoli leh Apolonia khua an kal tlang a, Thesalonika khua an thleng a, chutah chuan Juda-te sunagog a awm a.

²Paula chu a tih dân pângngaiin a inkhâwm ve a; sabat vawi thum Lehkha Thu aṭangtea chhuipuiin,

³Krista chu thihna tuar tûr a nihzia leh mitthi zîng ata tho leh tûr rêng a nihzia hrilh fiahin a kawhhmuh ṭhîn a. “He Isua, a chanchin kan hrilh che u hi, Krista chu a ni e,” a ti a.

⁴Tichuan, an zînga mi ṭhenkhatin an ring a, Paula leh Sila chu an pâwl ve ta a. Pathian ngaihsak Grik mi tam tak leh miliannu ṭhahnem takin an zui bawk a.

⁵Juda-te chuan an îtsîk êm êm a, khawlaia mi sual tei mai maite chu an khâwm a, a khuain an chawk buai a, tirhkohte chu vântlâng hmaa hruai chhuah tumin Jasona in an rawn ṭhâwng a.

⁶Anni chu an hmu lo va, Jasona leh unau ṭhenkhatte chu khaw hotute hnênah an hnûk lût a, “Khawvêl chawk buaitute kha hetah pawh an lo kal a,

⁷Jasona hian a lo thleng vei a. Hêngho hian an za-in, ‘Isua, lal dang a awm,’ tiin Kaisara thu kalhin thil an ti ṭhîn a ni,” tiin an au va.

⁸Chûng thu chuan khaw hotute leh mipui chu a tibuai hle a.

⁹Jasona leh mi dangte hnên aṭangin an aia hrên tûr thil an la a, an chhuah ta a.

¹⁰Unaute chuan a zân a zânin Paula leh Sila chu Beroia khuaah an kaltîr ta vat a. An va thlen chuan Juda-te sunagog-ah an inkhâwm a.

¹¹Anni chu Thesalonika mite ai chuan an lo inhawng zâwk a. Châk takin thu an dawng a, an thu sawi chu a dik leh dik loh fiah nân ni tin Lehkha Thute an chhiar ṭhîn.

¹²An zînga tam takin an ring ta a, Grik miliannu te leh mipa tam tak pawhin an ring ta bawk a.

¹³Nimahsela, Thesalonika khuaa Juda-ten Paulan Beroia khuaah pawh Pathian thu a hril tih an hriat chuan, an lo kal a, mipui an fuihpawrh a, an tibuai leh ta a.

¹⁴Chutichuan, Paula chu tuipui thlengin lawnga kal tûrin unaute chuan an hruai ta nghâl a. Sila leh Timothea erawh chu an la châm zêl a.

¹⁵Paula hruaitute chuan Atheni khua an hruai thleng a, Sila leh Timothea chu Paula chuan a rang thei ang bera a hnêna lo kal tûrin a chah a, an haw leh ta a.

¹⁶Paulan Atheni-ah a lo nghâk a, chu khua chu pathian limin a khat tih a hmuh chuan a vei ta êm êm a.

¹⁷Tichuan, sunagog-ah Juda-te leh Pathian ngaihsakte chu Pathian thu a chhuipui ṭhîn a, vântlâng punkhâwmnaa lo kalte pawh a hmuh apiang ni tin thu a sawipui bawk ṭhîn.

¹⁸Tin, Epikuria mi ṭhenkhat leh Stoik mi fing ṭhenkhatte pawhin an rawn hnial a, “He bengchhengpa hian eng nge a sawi?” an ti a. Isua thu leh thawhleh thu a sawi avângin a ṭhen chuan, “Hnam dang pathiante thuhriltu a ni âwm e,” an ti a.

¹⁹Tichuan, an hruai a, Areopagi-ah chuan an kalpui a. “He zirtîrna thar i sawi hi eng nge a nih kan ngaithla thei ang em?

²⁰Kan beng hriatah thil danglam tak i rawn sawi a, chûng thil awmzia chu hriat kan duh e,” an ti a.

²¹Atheni mi zawng zawng leh mikhualte pawh thil dang ti lo lêkin thil thar sawi leh ngaihthlâk an chîng ṭhîn rêng a.

²²Paula chu Areopagi-a mite hmaah chuan a ding a, a sawi a: “Nangni Atheni khaw mite u, engkimah sakhaw mi tak in ni tih ka hria.

²³Ka lên paha chibai in bûkate ka en laiin maichâm pakhat, a chunga, ‘Hriat loh Pathian tân, tia ziak ka hmu a. Hre lova chibai in bûk ṭhina thu chu keiin ka rawn hrilh che u a ni.

²⁴Pathian, khawvêl leh a chhûnga thil awm zawng zawng siamtu chu, lei leh vân lal a nih avângin, kuta sak tempulahte a awm lo va.

²⁵Thil tlachhama mihringte kuta rawngbâwlsak ngai lah a ni hek lo; amah ngei chu engkim hnêna nunna te, thâwkna te leh thil zawng zawng petu a ni zâwk si a.

²⁶Lei chung hmun tina awm tûrin thlahtu pakhat aṭangin hnam tin a din a, an tân hun bi te a thliahsak a, an awmna tûr rite pawh a khamsak a.

²⁷Pathian an zawna, an dap an dapa, an hmuh fuh hlauh theih nân a ti a ni; ani chuan min hlat lo ṭheuh si a.

²⁸‘Amah avângin kan nung, kan che, kan awm a ni si a,’ tia an sawi ang khân. Nangni zînga hla phuahtu ṭhenkhat pawhin, ‘Keini pawh a thlahte kan ni,’ tia an sawi ang kha a ni.

²⁹Tichuan, Pathian thlahte kan nih si chuan, Pathian chu rangkachak emaw, tangkarua emaw, lung emaw, mihring themthiam leh remruata chherte ang emaw hi ni-ah kan ngai tûr a ni lo.

³⁰Chutianga Pathian kan hriat loh laite kha ani chuan a haider a; mahse, tûnah hian hmun tina mi sim tawh tûrin a ti a ni.

³¹Khawvêl pum pui hi dik taka ro a rêlsak hun tûr nî a ruat fel tawh a; a rêltu tûr pawh a ruat tawh: mi tin hriat atân chu mi chu mitthi zîng ata a kai tho a ni,” a ti a.

³²Mitthi zîng ata thawhlehna thu an hriat chuan, a ṭhenin an nuihzat a, a ṭhenin, “He thu hi ngaihthlâk leh kan duh e,” an ti a.

³³Tichuan, Paula chu an zîng ata a chhuak ta a.

³⁴Paula chu an zui zêl a, an ring ta a. Chûng zîngah chuan Areopagi rorêltu zînga mi Dionusia te, hmeichhe pakhat Damari te leh mi dang tam tak pawh an tel a.