Read Mizo Lushai TIRHKOHTE THILTIH 18 Bible Online

TIRHKOHTE THILTIH 18 - Mizo Lushai bible

TIRHKOHTE THILTIH 18

¹Chûng hnu chuan Paulan Atheni a chhuahsan a, Korinth khuaah a kal ta a.

²Juda mi pakhat Akuila a hmu a, ani chu Ponto rama piang a ni. Rom lal Klaudian Juda zawng zawng Rom khua ata a hnawh chhuah avângin a nupui Priskili nên Itali ram aṭanga lo thleng hlim an ni. An hnênah a lêng a,

³a hna thawh ang thawk ve an nih avângin a thlen chilh a, a thawhpui ve ṭhîn a; puan in an siam ṭhîn a ni.

⁴Sabat ni apiangin sunagog-ah thu a sawi a; Juda-te leh Grik-te chu rintîr tumin a bei ṭhîn a.

⁵Sila leh Timothea chu Makedonia ram aṭanga an lo thlen thlâk chinah chuan Paula chu thuhril hnaah a inpumpêk ta a; Isua kha Krista chu a ni tih Juda-te hnênah a hrilh fiah ṭhîn a.

⁶Nimahsela, Juda-ten an dodâl a, an sawichhiat tâkah chuan Paulan a puan a thing a, “In boral pawhin nangmahni mawh a ni ta e, kei zawng ka thiang ta. Tûn achinah chuan Jentail-te lam ka hawi tawh ang,” a ti a.

⁷Chuta ṭang chuan a kal chhuak a, mi pakhat, Tita Justa inah a lût a, ani chu Pathian ngaihsak tak a ni a; a in pawh sunagog bula awm a ni.

⁸Sunagog hotu Krispa leh a chhûngte zawng zawngin Lalpa an ring a. Korinth khuaa mi tam tak pawhin an hria a, an ring a, baptisma an chang ta a.

⁹Zan khat chu Paulan inlârna a hmu a, Lalpa chuan a hnênah, “Hlau suh, ngawi lovin thu sawi zêl rawh.

¹⁰Kei i hnêna ka awm avângin tina tûr chein tu man i chungah kut an lek lo vang, he khuaah hian mi tam tak ka nei si a,” a ti a.

¹¹Paula chu an zîngah Pathian thu zirtîrin kum khat leh thla ruk a awm ta a.

¹²Galiova chu Akaia ram awptu a nih laiin Juda-ten inthurualin Paula an beih rawn a, rorêlnaah an hruai a.

¹³“He mi hian kan Dân kalh zâwnga Pathian be tûrin mi a thlêm ṭhîn a ni,” an ti a.

¹⁴Paula chuan chhân a han tum a; mahse, Galiova chuan Juda-te hnênah, “Aw Juda-te u, he thil hi thu chhia emaw, thil sual tih thu emaw ni se, in thu ka lo ngaithla tûr.

¹⁵Nimahsela, thu leh hmingte leh in Dân chungchânga in buaina thu mai a nih chuan, nangnin ngaihtuah rawh u. Kei zawngin chutiang thil chu ka ngaihtuah duh lo ve,” a lo ti a.

¹⁶Rorêlna in aṭang chuan a chhuahtîr ta a.

¹⁷Mahse, mi dang zawng zawng chuan sunagog in hotu Sosthena chu an man ta a, rorêlnaah chuan an vua a. Chu pawh chu Galiova chuan engah mah a ngai lo va.

¹⁸Paula chu ni rei tak a la châm a, chumi hnu chuan unaute chu ṭha takin a ṭhen a. Suria ram lam panin lawngin a chhuak ta a, a rual chuan Priskili leh Akuila te pawh an kal ve a. Paulan thutiam a neih avângin Kenkriai khuaah a lu a mêt a.

¹⁹Efesi khua an thleng a, chutah chuan anni chu a hnutchhiah a. Sunagog-a kalin Juda-te chu Pathian thu a chhuipui a.

²⁰Anni chuan châm deuh rih tûrin an ngên a; mahse, a remti lo va.

²¹“Pathianin rem a tih chuan in hnênah ka lo kal leh dâwn nia,” tiin ṭha takin a ṭhen a, Efesi ata chu lawngin a chhuak leh ta a.

²²Kaisari a thleng a, Jerusalem-ah a chho ta a, kohhran mite chibai a bûk a, chumi zawh chuan Antiokei-ah a haw ta a.

²³Rei fe a chawlh hnuin a kal leh a, Galatia ram leh Frugia ram a fang chhuak a, zirtîrho zawng zawngte chu a tinghet zêl a.

²⁴Tin, Juda pakhat, Apolova, Aleksandria khuaa piang chu Efesi khuaah a lo kal a, thu sawi thiam, Pathian thu hre tak a ni.

²⁵Lalpa kawng an lo hrilh tawh a, ṭhahnemngai takin Isua chanchin chiang taka sawiin mi a zirtîr ṭhîn a; mahse, Johana baptisma chauh a la hria.

²⁶Sunagog-ahte pawh huai takin thu a sawi a, a thu sawi an hriat chuan Priskili leh Akuila chuan an hruai hrang a, Pathian kawng uluk takin an hrilh fiah a.

²⁷Akaia rama kal a tum tih an hriat chuan unauten an lo puiha, amah an lo lawm theih nân zirtîrte hnênah lehkha an ziaksak a. A zuk thlen chuan ringtute chu Pathian khawngaihna azârah nasa takin a ṭanpui a.

²⁸Vântlâng hriatin Juda-te chu a hnial dang ṭhîn a: Lehkha Thu hmangin Isua chu Krista a nihzia a kawhhmuh ṭhîn.