Read Mizo Lushai TIRHKOHTE THILTIH 19 Bible Online

TIRHKOHTE THILTIH 19 - Mizo Lushai bible

TIRHKOHTE THILTIH 19

¹Apolova Korinth-a a awm hlânin Paulan tlângram bial kal tlangin Efesi a lo thleng a, zirtîr ṭhenkhatte a rawn hmu a.

²An hnênah, “Ringtu in nih tirh khân Thlarau Thianghlim in chang em?” a ti a. Anni chuan, “Chang lo, Thlarau Thianghlim a awm tih pawh kan hre hlei nêm!” an ti a.

³Ani chuan, “A nih leh eng baptisma nge in chan le?” a ti a. Anni chuan, “Johana baptisma kha,” an ti a.

⁴Paula chuan, “Johana khân sim entîr nân baptisma a chantîr ṭhîn a, a hnunga lo kal tûr Isua chu lo ring tûrin Israel mite a hrilh ṭhîn a nih kha,” a ti a.

⁵Chu chu an hriatin Lalpa Isua hmingin baptisma an chang ta a.

⁶Chutia Paulan an chunga kut a nghah lai chuan Thlarau Thianghlim an chungah a lo thleng a, ṭawnghriatlohvin an ṭawng a, Pathian thu te an sawi ta a.

⁷An vaiin patling sâwm leh pahnih lai an ni.

⁸Paula chu sunagog-ah a inkhâwm ṭhîn a, thla thum lai huai takin thu a sawi a; Pathian ram thu a chhuipui a, hmin a tum hlawm a.

⁹Ṭhenkhat erawh chu an khauh hle a, an ring duh lo va. Mipui hmaa kawng thu an sawichhiat tâkah chuan a kalsan a, zirtîrhote chu a hruai hrang a, ni tin, Turana sikulah Pathian thu a chhuipui ṭhîn a.

¹⁰Chutiang chuan kum hnih lai a ti a; chuvâng chuan, Asia rama mi zawng zawng, Juda-te leh Grik-te chuan Lalpa thu an hre ta a.

¹¹Pathianin Paula kut hmangin thil mak tam tak a ti ṭhîn a.

¹²Chutichuan, a inhrûkna leh a puan sin lai te chu damlote hnênah an keng a, an lo dam ta a, an kawchhûng ata ramhuai bawlhhlawhte pawh an chhuak a.

¹³Tin, thiam zuara vâk vâk Juda ṭhenkhatten, “Paula hril ṭhin Isua hmingin chhuak tûrin thu kan pe a che,” tiin ramhuai paite chungah Lalpa Isua hming an lam vei ṭhîn a.

¹⁴Juda puithiam lal pakhat Skeva chuan chutiang ti ve ṭhîn fapa pasarih a nei a.

¹⁵Ramhuai bawlhhlawh chuan an hnênah, “Isua ka hria, Paula pawh ka hria e; nangni hi tute nge maw in nih le?” a ti a.

¹⁶Ramhuai bawlhhlawh pai chuan anni chu a zuan a, an za chuan a hneh ta a; a sawisa a, chu in aṭang chuan saruak leh hliam phungin an tlân chhuak ta a.

¹⁷Chu thu chu Efesi mi zawng zawng, Juda-te leh Grik-ten an lo hriat chuan an za-in an hlau va, Lalpa Isua hming chu an chawimawi ta a.

¹⁸Ringtute zînga tam tak chuan an sual rawn inpuangin an thil lo tih ṭhinte an sawi chhuak a.

¹⁹Dawithiam tam tak pawhin an lehkhabute an rawn la khâwm a, mi zawng zawng hmaah an hâl a, a man an chhût a, chêng sîng nga niin an hria.

²⁰Chuti kauva nasa chuan Lalpa thu chu a darh a, a hneh ta zêl a.

²¹Chûng hnuah chuan Paulan Makedonia ram leh Akaia ram fan chhuah zeta, Jerusalem-a kal a rilrûk a. “Chuta ka kal zawhah Rom khua pawh ka tlawh bawk tûr a ni,” a ti a.

²²Makedonia lamah chuan amah puitu pahnih, Timothea leh Erasta chu a kaltîr a, ani erawh chu Asia ramah chuan a la awm ta rih a.

²³Chûng lai chuan Kawng avângin an buai ta êm êm a.

²⁴Demetria, tangkaraw chher mi, tangkaruaa pathiannu Artemi Tempul lem siamtu chuan mi themthiam tam tak a ruai ṭhîn a, an hlâwk êm êm a.

²⁵Anni chu an thawh ang thawk ve mi dangte nên a ko khâwm a, an hnênah, “Pute u, he hna hi kan sum hnâr a ni tih in hria a.

²⁶Efesi-ah chauh hian ni lovin, Asia ram zawng zawng deuhthawah he Paula hian, ‘Kuta siam pathiante chu Pathian an ni lo ve,’ tiin mipui tam tak a hneh a, a hruai kawi zo ta tih nangni ngeiin in hmuin in hre bawk a.

²⁷Tichuan, kan hna thawh hi a lân ang tih a hlauhawm chauh a ni lo va, pathian ropui tak Artemi Tempul hi miten an rawn ngainêp ang a, Asia ram pum leh khawvêlin an biak ṭhin hi, a ropui tehlul nên, a tlâwm ang tih a hlauhawm bawk a ni,” a ti a.

²⁸Chûng thu chu an hriat chuan an thin a rim ta êm êm a, “Efesi-a Artemi hi ropui tak a ni,” tiin an au va.

²⁹Tichuan, a khuain an buai ta a, Gaia leh Aristarka, Makedonia ram mi, Paula zinpuite chu an man a, inthurualin ennawm siamna hmunah an tlânpui a.

³⁰Paulan mipui zînga zuan luh ve a tum a; mahse, zirtîrhoten an phal lo va.

³¹Asia ram hotu liante zînga ṭhenkhat chu Paula ṭhiante an ni a, anni pawh chuan mi an rawn tîr a, ennawm siamna hmuna kal ve lo tûrin an rawn ngên bawk a.

³²Mipuite lah chu a ṭhen thu khatin an au va, a ṭhen thu dangin an au va, an kal khâwm chu an buai zo ta a, mi tam tak phei chuan an inkhâwm chhan pawh an hre lo va.

³³Juda-te chuan Aleksandara chu hma lamah an nawr phei avângin mipui zînga ṭhenkhat chuan amah avâng emaw an ti a. Aleksandara chuan ngawi tûrin kutin a han zâp a, mipui hnênah chuan an thiam thu sawi a tum a.

³⁴Nimahsela, ani chu Juda a ni tih an hriat veleh, dârkâr hnih dâwn lai, “Efesi-a Artemi hi ropui tak a ni,” ti hlîrin an au ta dual dual a.

³⁵Khawpui ziaktu chuan mipuite a ngawihtîr hnu chuan, “Efesi mite u, Artemi ropui tak leh a lim thianghlim vân aṭanga lo tla Tempul enkawltu chu Efesi khaw mite hi in nih tu nge hai awm?

³⁶Hêng thil hi hnial rual a nih loh ahnu, ngawi ula, thu hnu dâwn lovin eng mah ti suh u.

³⁷Hêng in mi rawn hruaite hi Tempul rawk hmang an ni lo va, kan pathiannu sawichhetu lah an ni hek lo.

³⁸Demetria leh a ṭhianten tu lakah pawh thu pawi an neih chuan thubuai sawina a inhawng reng a, Ramawptute pawh an awm a, an thubuai chu rawn thlen ang hmiang.

³⁹Chu bâk sawi tûr in neih chuan inkhâwm pângngaiah sawi fel tûr a ni.

⁴⁰Vawiin thil hi hel tuma buaina siamah min puh pawh a hlauhthâwnawm alâwm, kan pun khâwm chhan sawi tûr mumal pawh kan hre si lo,” a ti a.

⁴¹Chûng thu a sawi zawh chuan pungkhâwmte chu a ṭîntîr ta a.