Read Mizo Lushai TIRHKOHTE THILTIH 2 Bible Online

TIRHKOHTE THILTIH 2 - Mizo Lushai bible

TIRHKOHTE THILTIH 2

¹Pentikos ni a lo thlen chuan an za-in an awm khâwmna inah chuan an inkhâwm a.

²Thâwklehkhatah vân ata thlipui thâwm ang ri a lo thleng ta phut a, an ṭhutna inah chuan a ri ta hum hum a.

³Meialh, lei ang tak insem darh an hmu a, an chungah a fu ta ṭheuh va.

⁴An za-in Thlarau Thianghlimin an khat ta vek a, Thlarauvin a ṭawngtîr angin ṭawng dangtein an ṭawng ta hlawm a.

⁵Vân hnuaia hnam hrang hrang zînga chêng, Pathian ngaihsak Juda-te chu Jerusalemah an châm a.

⁶Chu thâwm chu hriain mi tam tak an lo kal khâwm a, an thu sawi chu mi tinin mahni ṭawng ang ṭheuhvin an hre thei a.

⁷Mak an ti êm êm a, “En teh u, hêng thu sawitu zawng zawng hi Galili mi an ni lâwm ni?

⁸Engtin nge kan zaa mahni ṭawng ang maia an thu sawi kan hriat theih?

⁹Ṭhenkhat Parthai mi te, Medai mi te, Elamitai mite kan ni a; ṭhenkhat Mesapotamia rama awm te, Judai rama awm te, Kapadokia ram te, Ponto leh Asia ram te,

¹⁰Frugia leh Pamfulia ram te, Aigupta leh Libua rama Kurini khaw chhehvêla awm te kan ni a; ṭhenkhat Rom khua aṭanga lo kal,

¹¹Juda-te leh Juda saphun te kan ni a; ṭhenkhat Kret thliarkâra mi leh Arab rama mi kan ni si a; nimahsela, Pathian thiltih ropuite an sawi mahni ṭawng ang ṭheuhva kan hriat hi!” an ti a.

¹²An vaiin a ngaihna hre lovin mak an ti a, “Hei hi eng nge ni ta ngai!” an ti a.

¹³Ṭhenkhat erawh chuan an nuihsan a, “Eng uain emaw an rui a nih hi,” an ti a.

¹⁴Petera chu Sâwmpakhatte nên an ding za a, mipui hnênah chuan ring takin thu a sawi a, “Nangni Juda unaute leh Jerusalem-a awm zawng zawngte u, ka thu hi ngun takin ngaithla teh u.

¹⁵Hêngho hi in ngaih angin an rui lo ve, zîng dâr kua chauh a la nih hi.

¹⁶He thil hi zâwlnei Joela sawi kha a ni zâwk:

¹⁷Pathianin, ‘Ni hnuhnûngahte chuan hei hi ka ti dâwn a ni: Mi zawng zawng chungah ka Thlarau ka leih ang a, In fanu in fapaten ka thu an hril ang In tlangvâlten inlârnate an hmu ang a, In upaten mumangahte an mang ang.

¹⁸Chûng ni-ah te chuan ka rawngbâwltute a hmei a pain, an chungah Ka thlarau ka leih ang a, ka thu an hril ang.

¹⁹Chung lam vânah thil mak te, Hnuai lam leiah chhinchhiahna te ka hmuhtîr ang, Thisen te, mei te, meikhu ngun ngun te nên;

²⁰Ni tihthim a ni ang a, thla thisen angin a sen khuih bawk ang, Lalpa ni ropui leh pawimawh tak a lo thlen hmain.

²¹Tichuan, Lalpa hming lam apiang chu chhandam an ni ang,’ a ti, a tih kha.

²²“Nangni Israel mite u, ngaithla teh u; in hriat ṭheuh angin Pathianin Nazaret Isua hmangin thil ropui tak tak te, thil mak te leh chhinchhiahna te in zîngah ngei tiin a mi ruat a nihzia chiang takin a tihlan kha.

²³Ani chu Pathian tum lâwk leh rêl lâwk angin in hnênah pêk a ni a. Nangnin hnam dang mite hmangin krawsah in khêngbet a, in tihlum a.

²⁴“Nimahsela, ani chu thihna chelh hlen rual a nih loh avângin Pathian chuan thihna phuarnate chu a phelh a, a kaitho ta a.

²⁵Davida pawhin a chungchâng hetianga a lo sawi kha: ‘Ka hmaah Lalpa ka hmu fo va, ka bulah a awm a, eng mahin mi tinghîng thei lo.

²⁶Chuvângin, ka thinlung a hlim a, ka lei pawh a lâwm a, ka tisa pawh hian a beisei tlat a ni.

²⁷Ka thlarau mitthi khuaah i hnutchhiah lo va, I mi thianghlim ruang a ṭawih i phal hek lo.

²⁸Nangin nunna kawng mi kawhhmuh a, I hmêl hmuin lâwmin ka khat ang,’ tiin.

²⁹“Unaute u, thlahtu Davida thu chu huai takin ka hrilh a che u, ani chu a thi tawh a, an phûm a, a thlân pawh kan bul lawkah a la awm reng alâwm.

³⁰Ani chu zâwlnei a ni a, a thlahte zînga tu emaw a lalṭhutthlêng luah tûrin Pathianin a hnênah a tiam tlat tih a hria a;

³¹‘mitthi khuaa hnutchhiah ni lovin, a ruang pawh a ṭawih loh tûr thu’ a sawi hi, Krista thawhleh tûr thu a sawi a lo ni.

³²A ni, chu Isua chu Pathianin a kaitho leh ta a, chu thu hretute chu kan za hian kan ni.

³³Pathian ding lamah chawimawi a ni ta a, Pa hnên ata Thlarau Thianghlim tiam chu a dawng a, in hmuh leh in hriat hi a thilpêk a rawn leih chu a nih hi.

³⁴Davida chu vânah a lâwn chho lo ve; amah ngeiin, ‘Lalpa chuan ka Lalpa hnênah, ka ding lamah lo ṭhu rawh,

³⁵I hmêlmate i ke nghahchhanah Ka han dah ang e,’ a ti e, a ti zâwk a nih kha.

³⁶“Chutichuan, Isua in khenbeh kha, Pathianin Lalpaah leh Kristaah a siam ta ngei tih Israel mi tinin hre ngei rawh se,” a ti a.

³⁷An thu hriat chuan an thinlung a khawih a, Petera leh tirhkoh dangte hnênah chuan, “Unaute u, eng nge kan tih tâk ang?” an ti a.

³⁸Petera chuan, “Sim ula, in sualte ngaihdam nân Isua Krista hmingin baptisma chang ṭheuh rawh u; tichuan, he thil pêk, thlarau Thianghlim hi in dawng ang.

³⁹A tiam hi in tân a ni a, in fate tân pawh a ni a, ram hla taka mi zawng zawng tân leh, Lalpa kan Pathianin a koh apiangte tân a ni e,” a ti a.

⁴⁰Thu dang tam tak sawiin a sâwm a, “Tûnlai mi sual takte lakah hian intihim rawh u,” tiin a fuih nghâl bawk a.

⁴¹A thu zâwm apiangin baptisma an chang a; chumi ni chuan mi sângthum laiin an belh ta a.

⁴²Tirhkohte thu zirtîr ngaithlaa inpâwl khâwmin, chhang phel leh ṭawngṭaiin an awm ho ṭhîn a.

⁴³Mi tinin an zah ta hle a, tirhkohte chuan thil mak leh chhinchhiahna tam tak an ti a.

⁴⁴Ringtu zawng zawngte chu an awm khâwmna inah an awm ho ṭhîn a, engkim an inṭâwm vek a.

⁴⁵A neite chuan an in leh lo te leh an thil neih te an hralh a, an châkkhai daih tâwk ṭheuhvin an zaa hnênah chuan an sem ṭhîn.

⁴⁶Ni tin Tempulah lungrual takin an inkhâwm ṭhîn a, in hrang hrangahte chhang an phel a, hlim tak leh inphal takin chaw an ei ho ṭhîn.

⁴⁷Pathian an fak a, mi zawng zawng duhsak an hlawh a, Lalpa chuan a chhandam apiangte chu ni tin an zîngah a tel belhtîr zêl a.