Read Mizo Lushai TIRHKOHTE THILTIH 20 Bible Online

TIRHKOHTE THILTIH 20 - Mizo Lushai bible

TIRHKOHTE THILTIH 20

¹Buai chu a reh hnuin Paulan zirtîrte a ko khâwm a, a fuih a, chibai a bûk a, Makedonia rama kal tûrin a chhuak ta a.

²Chu ram chu a fang chhuak a, zirtîrhote chu nasa taka a fuih zawhin Grik ram a thleng ta a.

³Thla thum a thang hnu chuan Suria ram lama lawnga haw an tum a; nimahsela, Juda-ten thah an tum avângin Makedonia ram tlawh kual zâwnga haw a tum leh ta zâwk a.

⁴Pura fapa Sopatera, Beroia khaw mi te, Thesalonika khaw mi Aristarka leh Sekunda te, Derbe khaw mi Gaia te, Timothea te, Asia rama mi Tukika te leh Trofima ten an zui a.

⁵Chûngho chu an kal hmasa a, Troas khuaah min lo nghâk a.

⁶Keini pawh Chhang dawidim telh loh Kût zawhah chuan Filipi khua aṭangin lawngin kan chhuak a, ni nga hnuah Troas kan thleng ve a, chutah chuan ni sarih kan châm a.

⁷Pathiannia chhang phel tûra kan inkhâwmin, Paula chuan a tûka kal a tum avângin an hnênah thu a sawi a, zanlai thlengin a sawi a.

⁸In chhâwnga pindan kan inkhâwmnaah chuan khâwnvâr tam tak a awm a.

⁹Tlangvâl pakhat, Eutuka an tih chu, tukverhah a ṭhu a, Paulan thu a sawi rei tâk êm avângin a mut a chhuak ta hle a, a muthlu a muthlu a; in chhâwng thumna aṭang chuan a tla ta a, thi-in an chhar a.

¹⁰Paula chu a tlân thla a, a bawh a, a pawm a, “Thlaphâng teh suh u, a la nung e,” a ti a.

¹¹An kal chho leh a, chhang an phel a, a ei a, rei tak, khawvâr thleng zakin thukhawchâng a sawipui a; tichuan, a kal chhuak ta a.

¹²Tlangvâl chu damin in lamah an hruai hâwng a, an thlamuang ta êm êm a.

¹³Keini chu Asso khaw panin lawngin kan lo kal hmasa a, Paula chuan kea lo kal a tum avângin Asso khuaah lawnga lo chuantîr kan tum a, chu chu ama remruat dân a ni.

¹⁴Asso khuaa min rawn fin chuan lawngah a lo chuang ve a, Mitulene khua kan thleng a.

¹⁵Chuta ṭang chuan lawngin kan kal leh a, a tûkah Kio thliarkâr zâwn kan thleng a, a tûk lehah Samo thliarkâr kan lût a, a tûk lehah chuan Mileto khua kan thleng ta a.

¹⁶Paulan Asia rama a awm rei loh nân Efesi chu lawnga kal pelh a tum a, a theih chuan Jerusalem-ah Pentikos Kût hman a tum a, a kal hmanhmawh deuh a ni.

¹⁷Mileto aṭang chuan Efesi-ah mi a tîr a, kohhran upate a kohtîr a.

¹⁸An lo thlen chuan an hnênah, “Asia ram ka luh tirh ni aṭangin in hnêna ka awm chhûng zawnga ka awm dân kha in hria e.

¹⁹Juda-ten mi phiar avânga hrehawm mi delhtu phur chungin, thuhnuairawlh tak leh mittui nên Lalpa rawng ka bâwl ṭhin kha.

²⁰In tâna sâwt tûr chu eng mah zêp lovin, vântlâng zîngah leh inahte ka hrilh ṭhîn che u a, ka zirtîr bawk ṭhin che u kha.

²¹Juda-te leh Grik-te hnênah pawh, sima Pathian lam hawi tûr leh kan Lalpa Isua ring tûrin urhsûn takin thu ka hril ṭhîn.

²²Tûnah hian hre rawh u; Thlarauvin mi tirh tlat avângin Jerusalem-ah ka kal dâwn a, chutah chuan ka chunga thil lo thleng tûr chin ka hre lo ve.

²³Amaherawhchu, Thlarau Thianghlimin lung in tân leh hrehawm tuar ka hmabâk tih chauh khaw tinah mi hrilh ṭhîn.

²⁴Lalpa Isua hnên ata ka hmuh rawngbâwl hna thawh tûr ka hmabâk, Pathian khawngaihna Chanchin Ṭha puan darh tûr hi ka hlen theih phawt chuan, ka nun pawh hi thlâkhlelh tûrah ka ngai lo.

²⁵Tûnah hian hre rawh u, nangni zawng zawng, Pathian ram thu hrila ka vah ka vah ṭhinnate hian ka hmêl in hmu leh tawh lo vang tih ka hria e.

²⁶Chuvângin, mi zawng zawng thisenah ka fihlîm tih vawiin hian ka hriattîr a che u.

²⁷Pathian remruat dân zawng zawng eng mah zêp lovin ka hrilh vek tawh che u kha.

²⁸Pathian kohhran, ama tâna thisena a lei chu châwm tûrin nangmahni leh in berâmte tân fîmkhur rawh u; Thlarau Thianghlimin an chunga hotu-ah a dah che u hi.

²⁹Ka kal hnuin chinghne kawlhte in zîngah an lo lût ang a, berâmte chu an zuah lo vang tih ka hria.

³⁰Nangni zînga mi ngei pawh hi zirtîrhote mahni lama ṭantîr tumin thu hran sawi in la awm ang.

³¹Chuvângin, invêng ngun rawh u, kum thum meuh a chhûn a zâna mittui nên mi tin ka zilh ṭhin che u kha hre reng rawh u.

³²Tûnah hian Pathian hnênah leh a khawngaihna thu-ah ka hlân a che u; chu chuan a tipuitling thei che u a, mi thianghlimte zîngah rochan a neihtîr thei bawk ang che u.

³³Tu ma tangka emaw, rangkachak emaw, silhfên emaw ka awh ngai loh kha.

³⁴Hêng kutte hian keimah leh ka ṭhiante mamawh a thawh chhuah ṭhin kha nangmahni ngeiin in hria e.

³⁵Chutianga thawkrimin mi chak lote in ṭanpui tûr a ni tih kawng engkimah ka tihhmuh ṭhin che u kha; kan Lalpa ngeiin, ‘Lâk aiin pêk a hlâwk zâwk,’ a tih kha hre reng rawh u,” a ti a.

³⁶Chûng thu a sawi zawh chuan an za-in a ṭhingṭhitpui a, an ṭawngṭai a.

³⁷An vaiin an ṭap ta a, Paula nghâwngah an kuah a, an fâwp ngawih ngawih a.

³⁸An lung tichhetu ber chu a hmêl an hmuh leh tawh loh tûr thu a sawi chu a ni. Tichuan, lawng thlengin amah chu an thlah ta a.