Read Mizo Lushai TIRHKOHTE THILTIH 22 Bible Online

TIRHKOHTE THILTIH 22 - Mizo Lushai bible

TIRHKOHTE THILTIH 22

¹“Unaute leh pute u, tûna in hnêna ka thiam thu sawi hi ngaithla teh u,” a han ti a.

²Hebrai ṭawngin thu a sawi tih an hriat chuan an ngawi lehzual a. Ani chuan,

³“Juda mi, Kilikia rama Tarsa khuaa piang ka ni; nimahsela, he khawpuia sei lian hi ka ni. Gamaliela hnênah min thlahtute Dân khermei taka zawm ka zir a, vawiina nangniho ang bawk hian Pathian tân ṭhahnem ka ngai ṭhîn a.

⁴He kawnga mite hi tihlum hial khawpin ka tiduhdah ṭhîn a, a hmei a pain ka man a, tân inah ka khung ṭhîn.

⁵Puithiam lalber leh upate rorêl ṭhu khâwm pawhin mi hriatpui alâwm. An hnên aṭangin Damaska khuaa unaute pêk tûr lehkha ka la a, chuta awmte chu hrem atân phuar chunga Jerusalem-a rawn hruai tûrin ka kal a.

⁶“Tichuan, ka kal a, Damaska ka thlen dâwn ruai chuan, chhûn lai tak a ni a, vân aṭangin êng nasa tak mai ka vêlah a lo êng ta phut a.

⁷Leiah ka tlu a, aw ka hria a, aw chuan, ‘Saula, Saula, engah nge mi tihduhdah?’ mi ti a.

⁸Keiin, ‘Lalpa, tu nge i nih?’ ka ti a. Ani chuan ‘Isua, i tihduhdah hi ka ni,’ a ti a.

⁹Ka ṭhiante chuan êng chu an hmu na a, mi betu aw erawh chu an hre lo.

¹⁰Tin, keiin, ‘Lalpa, eng nge ka tih ang?’ ka ti a. Lalpa chuan, ‘Tho la, Damaska-ah lût rawh, tah chuan thil engkim i tih tûra ruatte chu an lo hrilh ang che,’ a ti a.

¹¹Chu êng ropui avâng chuan khua rêng ka hmu thei ta lo va, ka ṭhianten mi kai a, Damaska-ah kan lût ta a.

¹²Mi pakhat, Anania, Dân ang thlapa Pathian be mi, chu khuaa Juda zawng zawngten an fak chu

¹³ka hnênah a lo kal a, ka kiangah a ding a, ka hnênah, ‘Unau Saul, i mit lo vâr rawh se,’ mi ti a. Chu veleh ka hmu leh thei ta a, amah ka han en a.

¹⁴“Ani chuan, ‘Min thlahtute Pathianin a duhzâwng hriaa, Mi Feltak chu hmua, a aw ngei hre tûrin a thlang ta a che.

¹⁵I thil hmuh leh hriat thu-ah khân mi zawng zawng hnênah thuhretu i ni dâwn si a.

¹⁶Muangchâng lovin tho la, a hming lamin baptisma chang la, i sualte tlêng fai rawh,’ mi ti a.

¹⁷“Tin, Jerusalem-a ka haw leha, Tempula ka ṭawngṭai laiin, zêlin ka awm a.

¹⁸Lalpa ka hmu a, ani chuan, ‘Hmanhmawh la, Jerusalem hi chhuahsan rawh; ka chanchin i hril an pawm dâwn lo ve,’ mi ti a.

¹⁹Keiin, ‘Lalpa, sunagog tina lûta, nangmah ringtute ka vuaka, tân ina ka khung ṭhin kha anmahni ngeiin an hre si a.

²⁰I thuhretu Stefana thisen an chhuah lai khân, kei pawh an zîngah ka ding a, ka remtihpui a, a thattute puan ka lo vênsak bawk a,’ ka ti a.

²¹Ani chuan ‘Kal rawh, hla takah Jentail-te hnênah ka tîr dâwn che a ni,’ mi ti ta a,” a ti a.

²²Chumi a sawi thleng chuan an ngaithla a, ring takin, “Mi hetiang hrep hi khawvêl ata tiboral rawh u, nung tlâk a ni lo ve,” an ti a.

²³An au va, an puante an hlîp a, vaivut an vawrh a.

²⁴Sipai hotu lalber chuan Paula chu kulhbîngah a hruai luhtîr a, a chunga chuti taka an au chhan chu a hmuh chhuah theih nân hruihruala vuaka, dâwp tûrin thu a pe a.

²⁵Vuak tûra savun hruia an phuar zawhin, Paulan a kianga ding sipai za hotu hnênah, “Rom mi, thiam loh chantîr pawh la ni si lo hi vuak a thiang em ni?” a ti a.

²⁶Sipai za hotu chuan chu thu chu a hriat veleh, sipai hotu lalber hnênah a kal a, “Engtin nge i tih dâwn? He mi hi Rom mi a lo ni reng mai,” a ti a.

²⁷Sipai hotu lalber chu a lo kal a, a hnênah, “Rom mi i ni maw? Mi hrilh rawh,” a ti a. Ani chuan, “Ni e,” a ti a.

²⁸Sipai hotu lalber chuan, “Kei chuan Rom mi nihna nei tûrin sum tam tak ka sêng asin,” a ti a. Paula erawh chuan, “Kei zawng Rom mi rênga piang ka ni,” a ti a.

²⁹Tichuan, sawisa chunga dâwp tumte chuan Paula chu an ṭînsan ta nghâl a, sipai hotu lalber pawh chuan Rom mi a lo phuar mai tih a han hriatin a hlauthâwng hle a.

³⁰A tûkah chuan Juda-ten Paula chungah thu eng nge an neih hriat chian tumin, sipai hotu lalber chuan puithiam lalte leh Sanhedrin mite inkhâwm tûrin thu a pe a. Paula chu a phelh a, a hruai chhuk a, an hmaah a dintîr a.