Read Mizo Lushai TIRHKOHTE THILTIH 25 Bible Online

TIRHKOHTE THILTIH 25 - Mizo Lushai bible

TIRHKOHTE THILTIH 25

¹Festa chuan ram a awp aṭanga ni thum hnuah chuan Kaisari aṭangin Jerusalem-ah a han kal a.

²Puithiam lalte leh Juda-te chuan Paula nêna an thubuai chu an lo hrilh a.

³“Khawngaih takin Jerusalemah han hruaitîr rawh,” tiin an lo ngên a, kawng laka lo chân rûka thah an tum a ni.

⁴Festa chuan, “Paula chu Kaisari lung inah a awm reng a, kei pawh ka haw thla thuai dâwn a,

⁵sualna a neih chuan in hotuten mi zui thla sela, hêk rawh se,” a ti a.

⁶An zîngah chuan ni riat emaw, ni sâwm emaw vêl a châm a. Kaisari-ah a haw thla leh ta a. A tûkah chuan rorêlna ṭhutthlêngah a ṭhu a, Paula chu a hruaitîr a.

⁷A lo thlen chuan Jerusalem aṭanga Juda lo chhukte chu a vêlah an ding a, thu lian fe fe tam takin an hêk a; mahse, an hêknate chu a dik a ni tih an finfiah thei si lo.

⁸Paula chuan a thiam thu a sawi ve a, “Juda-te Dân ka bawhchhe lo va, Tempul ka tibawlhhlawh lo va, Kaisara pawi eng mah ka sawi hek lo,” a ti a.

⁹Festa chuan Juda-te lakah tlâktlum a duh a, Paula hnênah chuan, “Jerusalem-a chhohva ka hmaa in thu hi rem i duh em?” a ti a.

¹⁰Paula erawh chuan, “Kaisara rorêlna ṭhutthlêng hmaah ka ding a, hetah ngei hian rêlsak tûr ka ni. Juda-te chungah thil eng mah ka tisual lo tih nangmah ngeiin chiang takin i hria a.

¹¹Thil sual ka tiha, thihna khawp meuh thil ti ka nih chuan thih ka hnial lo ve. Nimahsela, hêngho mi hêkna hi engmahlo mai a nih si chuan, anni lâwm nân an hnênah tu man mi pe tûr a ni lo. Kan thu hi Kaisara hnêna thlen ka ngên e,” a ti a.

¹²Festa chuan a rorêlpuite a biakrâwn hnu chuan, “Kaisara hnêna thlen i duh chuan Kaisara hnênah kal ang che,” a ti a.

¹³Ni eng emaw zât a ral hnu chuan Lal Agripa leh Berniki chu Kaisari-ah Festa lâwm tûrin an lo kal a.

¹⁴Ni tam tak an châm a, Festa chuan Paula chungchâng thu chu lal a hrilh a, “Felika khân mi tâng pakhat a hnutchhiah a,

¹⁵Jerusalem-a ka han kalin Juda Puithiam lalte leh an upaten a thu chu mi lo hrilh a, thiam loh chantîr tûrin mi lo ngên a.

¹⁶Kei chuan an hnênah, ‘Mi tu mah, amah hêktute nên inhmatawna an inchhâl hmaa thiam loh chantîr mai chu Rom sawrkâr dân a ni lo ve,’ ka ti a.

¹⁷Hetah an lo chhuk a, muang lovin a tûkah rorêlna ṭhutthlêngah ka ṭhu a, chu mi chu ka kohtîr a.

¹⁸A hêktute chu a kiangah an ding a, ka rin ang he huin eng mah thu pawi an sawi ta mang si lo va.

¹⁹Anmahni sakhaw thu leh mi pakhat thi tawh, Paulan a nung leha a sawi, Isua chungthu-ah an buai a lo ni lek a.

²⁰Keiin chûng thu chu ka ngaihtuah thiam zâwng pawh niin ka hre lo va, Jerusalem-a han kala, an thu chu han rêlsak a duh leh duh loh ka zâwt a.

²¹Nimahsela, Paulan amah ṭha taka vên leh an thu Lalber hnêna thlen a ngên ta zâwk a. Chuvângin, Kaisara hnêna ka tirh theih hma chu vêng ṭha tûrin thu ka pe a ni,” a ti a.

²²Agripa chuan Festa hnênah, “Kei pawh chu mi thu sawi chu ngaihthlâk ka duh asin,” a ti a. Ani chuan, “Naktûkah i ngaithla dâwn nia,” a ti a.

²³A tûkah chuan Agripa leh Berniki chu ropui takin an lo kal a, thusawina inah an lût a, sipai hotu liante leh khuaa mi pawimawh deuh deuhte pawh an tel ve a. Festa thupêkin Paula chu an rawn hruai lût a.

²⁴Festa chuan, “Lal Agripa leh heta kan zînga awm zawng zawngte u, Juda mipui zawng zawngten ‘Nung tlâk a ni lo ve,’ tia an au va, Jerusalem-ah leh heta a chungchâng thu ka hnêna an sawi chu he mi in hmuha hi a ni.

²⁵Nimahsela, kei chuan thihna khawp meuh eng mah a tih ka hmu lo va, amahin Lalber hnêna thlen a duh avângin tirh ka tum ta a ni.

²⁶Amaherawhchu, Lalber hnêna thlen tûr thu mumal tak eng mah ziak tûr ka hre si lo va; chuvângin, in hmaah ka rawn hruai chhuak a ni; Lal Agrip, i hnêna han hruai bîk deuh ka ni a, chhâl a nih hnua eng emaw ziak tûr ka hriat theih nân.

²⁷Amah an hêkna chiang taka ziak lova lalber hnêna mi tâng tirh chu âwmin ka hre si lo va,” a ti a.