Read Mizo Lushai TIRHKOHTE THILTIH 26 Bible Online

TIRHKOHTE THILTIH 26 - Mizo Lushai bible

TIRHKOHTE THILTIH 26

¹Agripa chuan Paula hnênah, “I thiam thu i sawi thei e,” a ti a. Chu veleh Paula chuan a kut a phar a, a thiam thu a sawi ta a.

²“Lal Agrip, vawiinah hian i hmaah Juda-te mi hêkna zawng zawnga ka thiam thu ka sawi dâwn avângin vânnei ka inti hle mai.

³Juda-te khawsak dân leh an inkhin ṭhin dânte i hriat êm avângin vânnei ka inti lehzual a ni. Chuvângin, dawhthei taka ka thu mi ngaihthlâksak tûrin ka ngên a che.

⁴Ka tleirâwl tirh aṭang tawhin ka chipuite zîngah leh Jerusalem-a ka awm dân chu a tîr ata Juda-te zawng zawngin an hria e.

⁵An sawi duh chuan hmân aṭanga kan sakhaw pâwl khermei ber Farisai zînga mi ka nih te pawh an hria ang.

⁶Min thlahtute hnêna a thutiam kha Pathianin a hlen ka beisei thu-ah tûnah hian rorêlna hmaah ka ding a nih hi.

⁷Chu thutiam chu hmuh beiseiin kan hnam sâwm leh pahnihte chuan a chhûn a zânin ṭhahnemngai takin rawng an bâwl ṭhîn a ni. Aw, Lal Agrip, chutiang beiseina avâng chuan Juda-te hian mi hêk a ni.

⁸“Nangni hian engtizia nge Pathianin mitthite a kaihthawh in rin loh?

⁹Kei ngei pawhin Nazaret Isua hming kalh zâwnga theihtâwp chhuah tûr niin ka lo inngai a.

¹⁰Chutiang chuan Jerusalem-ah ka ti ṭhîn a, puithiam lalte hnên aṭanga thu lain mi thianghlimte zînga mi tam tak tân inahte ka khung a, tihhlum an tum pawhin ka remtihpui bawk ṭhîn.

¹¹Sunagog tinah Isua sawichhiattîr tumin ka hrem fo va, an lakah ka kawlh êm êm a, ram dang khaw thleng thlengin ka tiduhdah ṭhîn.

¹²“Chutiang ti tûr chuan puithiam lalte hnên aṭanga thu hmu leh an thupêk kengin Damaska ka pan a.

¹³Tichuan, Lal Agrip, kawnga kan kal lai chuan chhûn laiah vân aṭanga êng, ni aia êng ka hmu a, chu chuan kei leh ka kalpuite chu min rawn chhun a.

¹⁴Leiah kan tlu ta vek a, awin Hebrai ṭawngin, ‘Saula, Saula, engati nge mi tihduhdah? Chhunna tiang khen hi i tân a na thlâwn mai mai a ni,’ mi rawn tiin ka hria a.

¹⁵“Kei chuan, ‘Lalpa, tu nge i nih?’ ka ti a. Lalpa chuan, ‘Isua, i tihduhdah hi ka ni.

¹⁶Tho la, i kein ding rawh; ka rawngbâwltu atâna ruat tûr chein i hnênah ka rawn inlâr a ni. Mi hmuh thu leh thil ka la entîr tûr che hi mite i hrilh tûr a ni.

¹⁷Juda-te leh Jentail-te hnênah ka tîr ang che a, an lak ata ka chhan chhuak ang che.

¹⁸Kei mi rin avânga an sualte ngaihdam an nih theih nân leh, mi thianghlimte zînga rochan an neih ve theihna tûrin. An mit tivârtu tûr te, thim ata eng lama hawi kîrtîr tûr leh Setana thuhnuai ata Pathian lama hawi kîrtîr tûra ruat i ni e,’ mi ti a.

¹⁹“Chuta ṭang chuan, Lal Agrip, vân inlârna chu ka zâwm ta a.

²⁰Tichuan, Damaska mite hnêna sawi ṭanin, Jerusalem-a mite hnênah te, Judai rama mi zawng zawng leh Jentail-te hnênah sima Pathian lam an hawia, an sim takzet a ni tih a lan nâna thil an tihna tûrin thu ka hril ṭhîn a ni.

²¹Chumi avâng chuan Tempula ka awm laiin Juda-ten mi man a, mi thah an tum a.

²²Nimahsela, Pathianin mi ṭanpui avângin vawiin thleng pawh hian mi lian leh mi tête hnêna thu hril tûrin ka la ding thei a ni. Zâwlneite leh Mosian thil lo thleng tûr an sawi bâk eng mah ka sawi lo.

²³‘Krista chuan a tuar ang a, mitthi zîng ata thawh hmahruaitu a ni ang a, Juda-te leh Jentail-te hnênah êng thu a hriattîr ang,’ tia an sawi loh hi chu eng mah dang ka sawi lo,” a ti a.

²⁴Chutianga thiam thu a sawi lai chuan Festa chu ring takin a au va, “Paula, i â ta a ni e, i zir tam hi i ât phah a ni,” a ti a.

²⁵Nimahsela, Paula chuan, “Festa zahawm ber, ka â lo asin; thu dik tak leh thu fing tak ka sawi zâwk a ni.

²⁶Hêng thil hi lal pawhin a hria e, a hnênah pawh huai takin ka sawi hi; a hriat loh pakhat mah a awm lo tih ka hria; hêng thil hi a rûka tih a ni si lo va.

²⁷Lal Agrip, zâwlneite thu i ring em? I ring tih ka hria e,” a ti a.

²⁸Agripa chuan Paula hnênah, “Rei lo te chhûnga Kristiana mi siam i tum a ni maw?” a ti a.

²⁹Paulan, “Rei se, rei suh se, nang chauh ni lovin, vawiina ka thu ngaithlatute zawng zawng pawh hi keimah anga awm tûrin Pathian hnênah ka dîl a ni, kawl erawh hi chu bun ve lovin,” a ti a.

³⁰Tichuan, lal te, Ramawptu te, Berniki te leh an ṭhutpuite chu an tho va.

³¹An kal hrang a, an inbia a, “He mi hian thihna khawp emaw, tânna khawp emaw eng mah zawng a tih loh hi,” an ti a.

³²Agripa chuan Festa hnênah, “He mi hian Kaisara hnêna thlen dîl lo sela chuan chhuah mai theih a nih hi,” a ti a.