Read Mizo Lushai TIRHKOHTE THILTIH 27 Bible Online

TIRHKOHTE THILTIH 27 - Mizo Lushai bible

TIRHKOHTE THILTIH 27

¹Tin, Itali rama lawnga kal tûra min tih veleh, Paula leh mi tâng dang ṭhenkhatte chu Augasta Sipai pâwl an tiha mi sipai za hotu Julia kutah an hlân a.

²Adramuteno khaw lawng, tuifinriat kama Asia ram khuate tlawh tûrah chuan kan chuang a, kan kal ta a; Makedonia rama Thesalonika khaw mi Aristarka pawh a tel ve a.

³A tûkah chuan Sidon khua kan thleng a, Julia chuan Paula chu a tiṭha hle a, a ṭhiante hnêna lênga a châkkhai lam te a phalsak a.

⁴Chuta ṭangin lawng chuan kan kal zêl a, thliin a ni lo zâwnga min nem avângin Kupra thliarkâr phên thli ûp lamah kan kal a.

⁵Kilikia ram leh Pamfulia ram dep tuipui kan pelh hnuin, Lukia rama Mura khua kan thleng a.

⁶Chutah chuan sipai za hotu chuan Aleksandria khaw lawng, Itali rama kal tûr a hmu a, chu lawngah chuan min chuantîr a.

⁷Ni rei tak zawi zawiin kan kal a, harsa takin Nido khaw zâwn kan thleng hrâm a. A lêt zâwnga thliin min nem avângin Kret thliarkâr phên thli ûp lamah kan kal kual a. Kret thliarkâr hmâwr zum Salmoni an tih chu kan pêl a.

⁸Harsa takin vaukam kan hrût a, hmun pakhat, lawng chawlh hmun Mawi, an tih chu kan thleng a, chu chu Lasai khaw kianga awm a ni.

⁹Ni rei fe kan châm hnu chuan Chawnghei hun a pêl ta bawk a, lawnga kal zêl a hlauhawm hle tawh avângin anni chu Paulan thu a râwn a,

¹⁰an hnênah, “Pute u, tûna kan kal zêl chuan chhiatna nasa tak kan tâwk dâwn tih ka hria; lawng leh a bungraw phurh chauh ni lovin, keini lawnga chuangte tân pawh boral a hlauhawm a ni,” a ti a.

¹¹Nimahsela, sipai za hotu chuan Paula thu sawi ai chuan lawngpu leh lawng neitu thu chu a awih ta zâwk a.

¹²Thlasik tuar nân chu lawng chawlhna chu a remchân loh avângin mi tam zâwkin kal chhuaha, Foiniki khua thlen hrâm a, chuta thlasik tuar chu an duh a. Foiniki khua chu Kret thliarkâra lawng chawlhna pakhat a ni, chhimthlang leh hmârthlang hawi zâwnga awm a ni.

¹³Chhim thli a lo tleh hiau hiau va, an duh ang tak an hmu ta emaw an ti a, thîrchakai chu an khai chhuak a, Kret thliarkâr chu a kam hnaih thei ang berin kan hrût a.

¹⁴Nimahsela, rei lo tê-ah khawmual lam aṭangin thlipui na tak a lo tleh chhuk ta phut a, chu thli chu Eurakulo an vuah a.

¹⁵Lawng chu a rawn chhêm vir nawk a, thli lam hawia kar her rual ni ta hek lo, a duh duha len tûrin kan awm ta a, min lên min lên ta mai a.

¹⁶Thliakâr tê tak tê, Kauda an tih phên thli ûp lamah min lên a, harsa tak chungin lawnglêng chu kan hum thei hrâm a.

¹⁷Lawngah an khai chhuak a, lawng chu hruiin an phuar ta tlat a. Libua kam ṭiaudûpa min len luh an hlauh avângin lawng puanzâr chu an tihniam a; tichuan, min lên min lên leh ta a.

¹⁸Thli leh tuifâwn chuan min vawrh reng avângin, a tûkah chuan lawng bungraw phurh chu an paih ṭan ta a.

¹⁹Ni thum ni chuan anmahni kut meuhvin lawng thawmhnaw pawh an paih chhuak leh ta a.

²⁰Ni rei tak, ni pawh, arsi pawh a lang lo va, thli lah chuan nasa takin min nuai reng a, dam rêng kan inbeisei tawh lo.

²¹Chaw ei lova ni tam tak an awm hnuin Paula chu an zîngah a ding a, “Pute u, ka thu kha awihin Kret thliarkâr aṭang khân chhuak lo ila chuan hetiang hrehawmna leh hlohnate hi kan tâwk lo tûr.

²²Nimahsela, tûnah hian thlamuang taka awm tûrin ka ngên a che u. In zîngah tu mah in thi lo vang, lawng erawh hi chu a chhe dâwn a ni.

²³A ta ka ni a, a rawng ka bâwl ṭhin, Pathian chuan vântirhkoh pakhat nizân khân a rawn tîr a, ka kiangah a lo ding a,

²⁴‘Paula, hlau suh, Kaisara hmaah i ding tûr a ni. Ngai teh, lawnga i zinpuite zawng zawng kha nangmah avângin Pathianin a hum dâwn a ni,’ mi rawn ti a.

²⁵Chuvângin pute u, thlamuang takin awm rawh u. Pathian ka ring a, mi hrilh ang chu a thleng ngei ang.

²⁶Thliarkâr khawiah emaw min lên chhuak tûr a ni,” a ti a.

²⁷A zan sâwm leh zan li zânah chuan thliin Mediteranean tuipuiah chuan min lên zêl a, zanlai vêlah chuan lawng miten khawmual eng emaw thleng dâwnin an inhria a.

²⁸Tichuan, tui thûk lam an teh a, hlam sawmhniha thûk a lo ni a, rei lo te hnuah an teh leh a, hlam sâwm leh pangaa thûk a ni ta a.

²⁹Lung chhe hmuna min len chhuah an hlauh avângin lawng mei lamah chuan thîrchakai pali an thlâk a, khawvâr hlân an nghâkhlel hle a.

³⁰Lawng mite chuan lawng hnâr lama thîrchakai thlâk tûr ni âwm takin lawnglêng chu tuifinriatah an thlâk a, lawng chu tlânsan an tum a ni.

³¹Chu veleh, Paula chuan sipai za hotu leh sipaite hnênah chuan, “Hêngho hi lawnga an awm reng loh chuan in him thei lo vang,” a ti a.

³²Tichuan, sipaite chuan lawnglêng hruite chu an zai chat a, an len botîr ta a.

³³Khawvâr dâwn ṭêpah Paula chuan lawnga mi zawng zawng chu chaw ei tûrin a ngên a, “Vawiin hi eng mah ei lova in awm ni sâwm leh ni lina a lo ni ta a.

³⁴Chuvângin, chaw ei tûrin ka ngên a che u, in nunna tûr a ni e; in zînga tu ma samzai pakhat tê mah a boral lo vang,” a ti a.

³⁵Chûng thu a sawi zawh chuan chhang a la a, an zaa hmaah chuan Pathian hnênah lâwmthu a sawi zawhin a phel a, a ei ṭan ta a.

³⁶Tichuan, an za-in thlamuang takin an ei ta a.

³⁷Lawnga mi chu kan vaiin zahnih leh sawmsarih leh paruk kan ni a.

³⁸An ei kham vek hnu chuan lawng tizâng tûrin an buh phurhte chu tuipuiah an paih chhuak leh ta a.

³⁹Khua a lo vâr chuan khawi lai vaukam nge an thlen an hre lo va, litengsâwla ṭiaupho an hmuhin lawng chu a theih chuan ṭiauphova khalh chhuah an tum a.

⁴⁰Thîrchakai hruite chu an zai chat a, tuipuiah an hnutchhiah ta a; chumi rual chuan a kar herna phuarnate chu an phelh a, hma lam puanzâr chu thli chhêm tûr zâwngin an tisâng a, ṭiaupho chu an pan ta a.

⁴¹Nimahsela, tuizangkhauh pahnih intawhnaah kan lût a, lawng hnâr lam chu a insu bûr ta tlat a, tihchêt rual lohvin a tâng ta a; tuifâwn a nasat êm avângin lawng mei lam pawh chu a keh ṭan ta a.

⁴²Sipaite chuan tânghote chu thah vek an rawt a, tui hleuh kaite an awm ang a, an tlân bo vang tih an hlau va ni.

⁴³Nimahsela, sipai za hotu chuan Paula chhanhim a duh a, an thil rawt chu a khap a; tui hleuh thiam apiang chu tuipuia zuang thlaa khawmuala lo kai hmasa tûr leh,

⁴⁴mi dang zawng chu thingphel chungah emaw, lawng keh them chungah emaw kai tûrin thu a pe ta a. Chutiang chuan kan za-in khawmualah him takin kan kai ta vek a.