Read Mizo Lushai TIRHKOHTE THILTIH 28 Bible Online

TIRHKOHTE THILTIH 28 - Mizo Lushai bible

TIRHKOHTE THILTIH 28

¹Kan kai zawh chuan thliarkâr chu Meliti a ni tih kan hre ta a.

²Chu thliarkâra mite chuan min lo khawngaih êm êm a. Ruah a sûr avâng leh a vawh êm avângin meipui an chhêm a, kan za-in min lo lâwm a.

³Paulan thing têl khat a fawm a, meiah a tuah a, a sat avângin rûl a lo chhuak a, a kutah a zem ta tlat a.

⁴Chuta mite chuan a kuta rûl bet reng an hmuh chuan, “He mi hi tualthat a ni phawt mai, tuifinriat aṭangin tlân chhuak mah sela, dik taka Rorêltua chuan a nun a awih tawh lo a nih hi,” an ti a.

⁵Nimahsela, ani chuan rûl chu meiah a thing thla a, engtin mah a awm ta chuang lo va.

⁶Anni chuan a vûn emaw, thâwklehkhata a tlûka a thih nghâl emaw an ring a. Rei fe an nghâk a, eng mah a ti lo tih an hmuh chuan an rilru an lamlêt a, “Pathian a nih hi,” an ti leh ta zâwk a.

⁷Chumi kiang lawkah chuan chumi thliarkâr lal Poplia huan a awm a. Ani chuan min lo lâwm a, ni thum lai lâwm takin min thleng a.

⁸Poplia pa chu khawsik leh santên veiin a lo mu reng a. Paula chuan a en a, a luah kut nghatin a ṭawngṭai a, a tidam ta a.

⁹Chumi hnu chuan, chu thliarkâra mi dang na nei apiang chu an lo kal a, an dam ta a.

¹⁰Anni chuan nasa takin min chawimawi a, kan kal leh dâwn pawh chuan kan mamawh apiang lawngah an lo dah a.

¹¹Thla thum hnuah chuan lawng pakhat, thlasik laia chu thliarkâra lo châm tawh chuan kan kal leh ta a. Chu lawng chu Diaskuro an vuah a, Aleksandria khaw lawng a ni.

¹²Surakus khua kan thleng a, ni thum kan châm a.

¹³Chuta ṭang chuan lawngin kan kal kual a, Regium khua kan thleng a. Ni khat hnuah chhim thli a lo tleh a, a tûk lehah Puteoli khua kan thleng a.

¹⁴Chutah chuan unaute kan hmu a, an hnêna kâr khat châm tûrin min ngên a, chutiang chuan Rom khua kan thleng ta a ni.

¹⁵Rom khuaa unaute chuan kan chanchin an hriat veleh, ‘Appia Dâwr’ leh ‘Khualbûk Pathum’ thlengin min hmuak tûrin an lo kal a. Paulan chu mite chu a hmuhin Pathian hnênah lâwmthu a sawi a, a thlamuan phah ta hle a.

¹⁶Rom kan thlen chuan Paula chu sipai vên chunga amaha a awm an phalsak a.

¹⁷Ni thum hnuah chuan Paulan chuta Juda hotute chu a ko khâwm a, an lo kal chuan an hnênah, “Unaute u, kan mite chungah emaw, min thlahtute Dân lakah emaw eng mah ka tisual lo chung pawhin, Jerusalem-ah mi man a, Rom sawrkâr kutah mi hlân a.

¹⁸Anni chuan mi chhâl a, thihna khawp meuh eng mah ka tihsual an hmuh loh avângin mi chhuah an tum a.

¹⁹Nimahsela, Juda-ten an hnial tlat avângin Kaisara hnêna thlen lo thei ka ni ta lo va ni; Mahse, ka chipuite hêk tûra ti ka ni awzâwng lo ve.

²⁰Chuvâng chuan, hmuh leh biak che u duhin ka ko khâwm che u a ni; Israel-ten an beisei ṭhin, kha mi avâng khân he khaidiat hi ka bun a nih hi,” a ti a.

²¹Anni chuan, “Judai ram aṭangin i chanchin sawina lehkha eng mah kan hmu lo va, unaute zînga mi tu mahin i chanchin a chhe lam emaw, a ṭha lam emaw sawi tûr an lo kal hek lo.

²²He pâwl hi hmun tinah sawichhiat niin kan lo hria a, i ngaih dân pawh hriat kan duh e,” an ti a.

²³Tichuan, ni an tiam a, chumi ni chuan a awmna inah mi tam takin an rawn pan a, zîng aṭangin zân thlengin Pathian ram thu a sawi a, a hrilh fiah a; Mosia dân bu leh zâwlneite lehkhabu aṭangin Isua chungchâng anmahni awihtîr tumin a hrilh a.

²⁴A ṭhenin a thu sawi chu an ring a, a ṭhenin an ring lo va.

²⁵An thu a inhmu ta lo va, Paulan thu a sawi zawh chuan an chhuak ta a. A thu sawi chu hei hi a ni: “Thlarau Thianghlimin zâwlnei Isaia kâa in thlahtute hnêna a sawi kha a dik ngawt mai,

²⁶‘He chite hnênah hian kal la, va sawi rawh. In ngaithla in ngaithla ang a, a ngaihna in hre si lo vang. In en in en ang a, in hmu fuh si lo vang.

²⁷He mite thinlung hi a lo chawlawl ta a, An bengte an chhu ngawng a, An maimitchhîng bawk a, Chuti ni lo se an mitin an hmu ang a, an bengin an hria ang a, An thinlungin an hre bawk ang a, An hawi kîr leh anga, Anmahni ka lo tidam tûr!’ a tih kha.

²⁸“Pathian chhandamna chu Jentail-te hnênah pêk a ni tih hre rawh u; anni zawngin ngaih pawh an ngaithla ang,” a ti a.

³⁰Kum hnih pumhlûm Paula chu ama in luahah chuan a awm a, a hnêna lo lêng apiang a lo lâwm a.

³¹Pathian ram thu a hrilh a, Lalpa Isua Krista thu huai takin mi a zirtîr a, tu man an khap lo.