Read Mizo Lushai TIRHKOHTE THILTIH 3 Bible Online

TIRHKOHTE THILTIH 3 - Mizo Lushai bible

TIRHKOHTE THILTIH 3

¹Chawhnu dâr thum, ṭawngṭai hun pangngaiah chuan Petera leh Johana chu Tempulah an chho va.

²Pa pakhat, a pian tirh ata kebai hi an rawn zâwn a. Tempula kalte hnêna kut lo dawh tûrin kawngkhâr, ‘Mawi,’ an tih bulah ni tin an dah ṭhîn a.

³Chu mi chuan Petera leh Johana Tempula lût tûr chu a hmu a, kut a lo dawh a.

⁴Anni chuan an en reng a, Petera chuan a hnênah, “Min han en teh,” a ti a.

⁵Ani chuan eng emaw dawn beiseiin a han en a.

⁶Petera chuan, “Tangka leh rangkachak eng mah ka nei lo; nimahsela, ka neih chhun ka pe ang che, Nazaret Isua Krista hmingin kein kal tawh rawh,” a ti a.

⁷A kut ding lam a vuan a, a kai tho va, a ke leh a kheimit te chu a lo chak ta nghâl a.

⁸Tichuan, ani chu a zuang tho va, a ding a, kein a kal ta a. Kea kala zuangin Pathian fak chung zêlin Tempulah chuan an rualin a lût ve ta a.

⁹Mipui zawng zawngin kea a kal leh Pathian a fak an hmuh chuan,

¹⁰Tempul kawngkhâr, Mawi bula kutdawh ṭhu ṭhîn kha a ni tih an hria a, a chunga thil thleng chu mak an ti êm êm a, a ngaihna an hre lo va.

¹¹Tin, ani chuan Petera leh Johana a la vawn reng laiin mipui chu Solomona hulhliap an tihah chuan an lo tlân khâwm a, mak an ti êm êm a.

¹²Peteran chu chu a hmuhin mipui hnênah chuan, “Nangni Israel mite u, engati nge hei hi mak in tih? He mi hi keimahni theihna emaw, kan ṭhat bîk vâng emawa kan kaltîr ang êm chuan engati nge min en reng?

¹³Abrahama Pathian, Isaka Pathian, Jakoba Pathian, min thlahtute Pathian chuan a chhiahhlawh Isua a chawimawi ta a nih hi. Ani chu in mantîr a, rorêltu Pilatan chhuah a tum pawhin in hnial tlat a nih kha.

¹⁴Mi thianghlim leh fel tak kha in duh lo va, tual that kha chhuahsak che u in ngên ta zâwk a.

¹⁵Nunna petu chu in thahtîr a; nimahsela, Pathianin ani chu mitthi zîng ata a kaitho leh ta a, chumi thuhretute chu kan ni.

¹⁶“Isua hminga thiltihtheihna leh chu hming rinna chuan in hmuh leh in hriat ṭhina hi a tidam ta a; amah rinna avâng chuan he mi hi in zaa in hmuh ang hian a dam ta viah a.

¹⁷Tûnah hian unaute u, nangni leh in hotute pawhin in thiltih kha in hre tak tak lo a ni tih ka hria e. Krista chuan a tuar tûr a ni tih

¹⁸Pathianin a zâwlnei zawng zawng hmanga a lo sawi lâwk kha hetiang hi a thlentîr dân a lo ni.

¹⁹Chuvângin, in sualte sim ula, hawi kîr leh rawh u.

²⁰Chutichuan, Lalpa hnên ata harhtharna hun a lo thleng ang a, in tâna a ruat Mesia, Isua chu, a rawn tîr ang.

²¹Amaherawhchu, engkim siam thar hun a thlen hma chuan vânah ani chu a awm rih tûr a ni; siamtharna thu chu Pathianin a zâwlnei thianghlimte kâa hmasâng ata a sawi daih tawh kha.

²²“Mosia pawh khân, ‘Lalpa in Pathianin keimah ang hi in unaute zînga mi, zâwlnei pakhat a dinsak ang che u; eng pawh in hnêna a sawi apiang in zâwm tûr a ni.

²³Chu zâwlnei thu ngaithla lo apiang chu Pathian mite zîng ata tihboral zêl tûr a ni,’ a tih kha.

²⁴Samuela leh a hnua zâwlnei zawng zawngte khân tûnlai chanchin hi a ni an lo hrilh lâwk ni.

²⁵“Zâwlneite thu leh in thlahtute hnêna thuthlung rochungtute in ni asin. Abrahama hnênah chuan, ‘I thlahah chuan khawvêla hnam tinin malsâwmna an dawng ang,’ a tih kha.

²⁶Pathianin a chhiahhlawh chu a thlang a, in sualte hawisantîr ṭheuh tûr che u leh malsâwm tûr che uin in hnênah a rawn tîr hmasa a nih hi,” a ti a.