Read Mizo Lushai TIRHKOHTE THILTIH 4 Bible Online

TIRHKOHTE THILTIH 4 - Mizo Lushai bible

TIRHKOHTE THILTIH 4

¹Petera leh Johanan mipuite hnêna thu an sawi lai chuan, puithiam chu Tempul pulis hotupa nên, Sadukai-hote nên an hnênah an lo kal a.

²Isua thawhlehna thu sawiin mitthi thawhlehna thu mipui an zirtîr avâng chuan an lungni lo êm êm a.

³Tichuan, an man a, tlai lam a nih avângin a tûk thlengin tân inah an khung ta a.

⁴Nimahsela, an thu ngaithlatute zînga tam tak chuan an ring ve ta a, an za chuan sângnga lai an tling a.

⁵A tûkah chuan Juda hotu te, upa te, Dân zirtîrtu te Jerusalemah an inkhâwm a;

⁶chûng chu Puithiam lalber Ana te, Kaiafa te, Johana te, Aleksandara te, puithiam lal thlahho te nên an ni.

⁷Petera leh Johana chu a laiah an dintîr a; “Engtia tidam thei nge in niha, tu hmingin nge he thil hi in tih?” tiin an chhâl a.

⁸Tichuan, Petera chu Thlarau Thianghlimin a khat a, an hnênah, “Mipui hotute leh upate u,

⁹vawiinah hian kebai tihdam thu-ah engtia dam nge a nih min zâwt a ni bawk a,

¹⁰nangni zawng zawng leh Israel mi zawng zawngin hre teh u; Nazaret Isua Krista, in khenbeh, Pathianin mitthi zîng ata a kaihthawh leh tâka hming khân he mi hi tihdam a ni a; tûnah hetah in hmaah dam varin a ding ta a nih hi.

¹¹Ani hi alâwm, nangni in satuten in duh loh lung kha, a kil lung pawimawh ber a lo ni ta si a.

¹²Tu dang hnênah mah chhandamna a awm lo, vân hnuaia mihring hming sak zîngah min chhandam thei hming dang rêng rêng a awm lo,” a ti a.

¹³Petera leh Johana huaizia chu an hmuhin, lehkha thiam lo leh mi mâwl mai an nih an hriatin, mak an ti hle a; Isua hnêna awm ṭhîn an ni tih an hre ta a.

¹⁴Tin, an mi tihdam, an kianga ding chu an enin eng mah sawisêl tûr a awm si lo.

¹⁵Tichuan, Sanhedrin ata an chhuahtîr hnu chuan an inrâwn a,

¹⁶“Hêng mite hi engtin nge kan tih tâk ang? An thil mak tih hi Jerusalem-a awm zawng zawngin an hriat tâk hi; keini pawhin kan hnial thei si lo.

¹⁷Amaherawhchu, miin an hriat darh lehzual loh nân tu hnênah mah he hminga thu sawi leh tawh lo tûrin i vau ang u,” an ti a.

¹⁸Tichuan, anni chu an ko leh a, Isua hminga thu sawi lo tûr leh zirtîr tawh tawp lo tûrin thu an pe a.

¹⁹Nimahsela, Petera leh Johana chuan an hnênah, “Pathian mit hmuhah Pathian thu zawm aiin mihring thu zawm chu a dik zâwk dâwn emaw chu, ngaihtuah teh u.

²⁰Keini zawng thil kan hmuh leh kan hriat hi sawi lovin kan awm thei lo,” an ti a.

²¹Tin, anni chuan nasa takin an vau va, an chhuah ta a. An thiltih avânga mi zawng zawngin Pathian an chawimawi ṭheuh si avângin hremna remchâng an hmu lo va ni.

²²Mak taka an tihdam chu kum sawmli aia upa zâwk mah a ni.

²³Petera te chu an chhuak a, an ṭhiante hnênah an va kal a, puithiam lalte leh upaten an hnêna an sawi chu an hrilh vek a.

²⁴An thu ngaithlatute chuan a rualin ring takin Pathian an au va, “Aw Lalber, nang, vân te, lei te, tuifinriat te leh a chhûnga thil awm zawng zawng siamtu,

²⁵Thlarau Thianghlimin min thlahtu i chhiahhlawh Davida kâin hêng thu hi i sawi a: ‘Jentail-te engati nge an thinur? Mipuiin engati nge thil sâwt lo an rêl?

²⁶Lei lalten an er a, hotute pawh a chungah an inrâwn khâwm a, Lalpa leh a hriak thiha chungah chuan,’ tiin.

²⁷“Chutiang tak chuan he khuaah hian i chhiahhlawh thianghlim Isua, i hriak thiha chungah chuan, Heroda leh Pontia Pilata te chu Jentail-te leh Juda-te nên an inthurual ta ngei a.

²⁸Nangin i ruat lâwk ang thlentîr i tum chu tihlawhtling tûrin an pung khâwm a lo ni.

²⁹Lalpa, ngai teh, tûna an mi vau dân hi, i thu hril ngam tûrin i bawihte hi huaisenna pe ang che.

³⁰Mite tidam tûrin i kut phar la, i chhiahhlawh thianghlim Isua hmingin chhinchhiahna te leh thil makte tihtîr bawk ang che,” an ti a.

³¹Chutia an ṭawngṭai zawh chuan an awmkhâwmna hmun chu a lo nghîng a, an za-in Thlarau Thianghlimin an khat a, huai takin Pathian thu an hril ta a.

³²Ringtuho chu thinlung hmun khat leh rilru hmun khat puin an awm a, an zînga tu mahin an thil neihte chu, ‘ka ta bîk a ni,’ an ti lo, engkim an inṭâwm zâwk a.

³³Tirhkohte chuan thiltihtheihna nasa tak neiin Lalpa Isua thawhlehna thu an hril ṭhîn a, an za-in Pathian duhsak an hlawh a.

³⁴An zînga tu mah tlachham an awm lo. In emaw, ram emaw nei apiangin an hralh a, a man chu an rawn keng a.

³⁵Tirhkohte hnênah an hlân a, an châkkhai daih ṭheuhvin an insem ṭhîn.

³⁶Tin, Josefa, tirhkohten Barnaba an tih (chu chu ‘Thlamuanna fa,’ tihna a ni), Levia chi, Kupra thliarkâra mi pawh chuan,

³⁷ram a nei a, a hralh a, a man chu rawn kengin tirhkohte hnênah a hlân a.