Read Mizo Lushai TIRHKOHTE THILTIH 5 Bible Online

TIRHKOHTE THILTIH 5 - Mizo Lushai bible

TIRHKOHTE THILTIH 5

¹Mi dang pakhat, a hming Anania a awm a, a nupui chu Sapfiri a ni. Ram a hralh a,

²a man chu a nupui hriatpuiin anmahni tân an dah hrang a, a ṭhen chauh rawn kengin tirhkohte hnênah a rawn hlân a.

³Nimahsela, Peteran, “Anani, Thlarau Thianghlim bum tûr leh ram man a ṭhen zêp tûrin engati nge Setanan i thinlung a luah le?

⁴I hralh hma zawng khân i ta a ni a, i hralh hnu pawhin a man chu i thu thu-a i tih tûr a ni lâwm ni? Engati nge hetiang thil ti tûra rilru i put le? Mihring i bum a ni lo va, Pathian i bum a ni zâwk e,” a ti a.

⁵Ananian chûng thu chu a hriat chuan a tlu a, a thi ta a. A hria apiangin an hlau ta êm êm a.

⁶Tlangvâlho an lo thawk a, an tuam a, an zâwn chhuak a, an phûm ta a.

⁷Dârkâr thum lai hnuah chuan a nupui chu thil awmzia hre lovin a lo lût ve a.

⁸Petera chuan a hnênah, “Mi hrilh teh, ram chu heti zât chiah hian maw in hralh?” a ti a. Ani chuan, “Ni e, heti zât chiah hian,” a ti a.

⁹Petera chuan, “Engati nge Lalpa Thlarau fiah tuma in inthurual ni? Ngai rawh, i pasal phûmtute pawh kawngka bul an lo thlen leh tawh saw; nang pawh an zâwn chhuak ang che,” a ti a.

¹⁰Tichuan, thâwklehkhatah a ke bulah chuan a tlu a, a thi ve ta mai a. Tlangvâlte chu an lo lût a, ani chu thi-in an rawn hmu a, an zâwn chhuak a, a pasal kiangah an phûm ve ta a.

¹¹Kohhran mi zawng zawngte leh chûng thu hria apiangte chuan an hlau ta êm êm a.

¹²Tirhkohte chuan mipui zîngah chhinchhiahna leh thil mak tam tak an ti zêl a. Anniho chu an za-in lungrual takin Solomona hulhliapah an inkhâwm ṭhîn a.

¹³An zîngah chuan tu mah mi dang an tel ve ngam lo nâ a, mite chuan an ngaisâng êm êm a.

¹⁴Lalpa ringtute erawh chu, a hmei a pa, an zînga tel an pung tial tial a.

¹⁵Chutichuan, dam lote pawh kawtthlêrahte an zâwn chhuak a, khumah te, mutphahah te an muttîr a. Petera hlim chuan a kal vêl pahin an zînga ṭhenkhat tal a hliah theih nân an ti a ni.

¹⁶Jerusalem kiang vêl aṭang pawhin mi an lo kal a, damlo te, ramhuai bawlhhlawh man te an rawn hruai a, chûngho zawng zawng pawh chu an lo dam ta zêl a.

¹⁷Tin, Puithiam lalber leh a hote zawng zawng, Sadukai pâwla mite chu an lo thawk a; tirhkohte chu an îtsîk êm êm a,

¹⁸an man a, vântlâng tân inah an khung a.

¹⁹Nimahsela, zânah Lalpa tirh Vântirhkoh pakhatin tân in kawngkhâr chu a rawn hawng a, a hruai chhuak a; an hnênah,

²⁰“Kal ta ula, Tempulah va ding ula, mipuite hnênah hêng nunna thu leh a awmzia zawng zawng hi va sawi tawh u,” a ti a.

²¹Chu thu chu an hriatin an kal a, zîngah chuan Tempulah an lût a, mi an zirtîr ta a. Puithiam lalber leh a hote chuan Israel upate, Sanhedrin mi zawng zawng an khâwm a, tirhkohte chu va hruai tûrin tân inah mi an tîr a.

²²An tirhte chu an va kal a; mahse, tân inah chuan anni chu an hmu si lo. An lo kîr leh a,

²³“Tân in chu him taka inkhârin, a vêngtute pawh kawngkhâr bula dingin kan hmu a; nimahsela, kan han hawng a, a chhûngah tu mah kan hmu si lo,” tiin an rawn sawi a.

²⁴Tempul pulis hotu leh puithiam lalten an hriat chuan, “Engtizia nge ni ta le?” tiin an buai hle a.

²⁵Chutih lai chuan mi pakhat a lo kal a, an hnênah, “Ngai teh u, tân ina mi in khungte khân Tempulah sâwn mi an zirtîr ka ti,” a rawn ti a.

²⁶Tichuan, Tempul pulis hotu chu a hote nên an va kal a, tirhkohte chu tilui lovin an rawn hruai a, an man luih mai chuan mipuiin lungin an dêng ang tih an hlau a ni.

²⁷An rawn hruai thlen chuan Sanhedrin hmaah chuan an dintîr a. Puithiam lalber chuan an hnênah,

²⁸“He hming hian zirtîr tawh hauh lo tûrin thu kan pe che u a; ngai teh u, in thu zirtîrin Jerusalem in tihkhah vek tawh hi; chu pa thisen mawh chu kan chunga bel in tum a nih hi le!” tiin a chhâl a.

²⁹Petera leh tirhkohte erawh chuan, “Mihring thu aiin Pathian thu kan zâwm zâwk tûr a ni.

³⁰Min thlahtute Pathian chuan, thinga khai kânga in tihhlum tâk Isua kha a kaitho leh ta a.

³¹Israel-te sual simtîra ngaihdam an nih theih nân Amah ngei kha Pathianin Lal leh Chhandamtu atân a ding lamah a chawimawi ta a.

³²A thu zâwmtute hnêna Pathian pêk Thlarau Thianghlim leh keini hi chûng thuhretutechu kan ni,” tiin an chhâng a.

³³Chûng an thu hriat chuan an thin a khei ta riau va, tirhkohte chu tihhlum an tum ta a.

³⁴Nimahsela, Farisai pakhat, a hming Gamaliela, Dân zirtîrtu, mi zawng zawng ngaihsân tak chu Sanhedrin-ah chuan a ding a, tirhkohte chu chhuahtîr rih tûrin vêngtute chu a hrilh a.

³⁵Rorêltute hnênah chuan, “Israel mite u, he mite chunga in thil tih tumah hian fîmkhur rawh u.

³⁶Hmân deuh tawhah khân Theuda chu mi ropui tak nia inchhâlin a lo kal a, mi zali vêl laiin an zui a. Ani chu an that a, amah zuitute zawng zawng chu an darh vek a, eng mah an ni ta lo va.

³⁷Chumi hnu chuan, chhiarpui lai khân, Galili rama mi Juda kha a lo kal leh a, ani pawhin mipui a hîp leh hle a. Nimahsela, ani pawh an that a, amah zuitu zawng zawng pawh an darh leh ta vek bawk a.

³⁸Chuvângin, tûnah hian ka ti a che u, he mite hi khawih suh ula, awmtîr mai mai rawh u. Hêng an thiltih tum leh an thiltihte hi mihring tihchhuah mai a nih chuan a tâwp leh mai ang.

³⁹Pathian tihchhuah a nih erawh chuan in tiboral thei lo vang; Pathian dodâl in lo ni hlauh dah ang e,” a ti a.

⁴⁰Tichuan, a thu chu an zâwm a, tirhkohte chu an ko va, an vua a, Isua hminga thu sawi tawh hauh lo tûrin thu an pe a, an chhuah ta a.

⁴¹Chutichuan, chu Hming avânga mualpho tuar tlâka ruat an nih avângin, lâwm êm êm chungin Sanhedrin ata chu an chhuak a.

⁴²Ni tin, Tempulah leh in lamah Isua kha Mesia chu a nih thu hril leh zirtîr an bâng chuang lo.