Read Mizo Lushai TIRHKOHTE THILTIH 6 Bible Online

TIRHKOHTE THILTIH 6 - Mizo Lushai bible

TIRHKOHTE THILTIH 6

¹Chûng laia zirtîrte an pun zêl lai chuan an ni tin thil semah an hmeithaite an ngaihthah bîk tiin Grik ṭawng hmang Juda-te chu Hebrai-hote chungah an phunnawi a.

²Sâwmpahnihte chuan zirtîrhote chu an ko khâwm vek a, “Pathian thu hril thlahthlama ni tin khawsakna lam kan buaipui hi a dik lo vang.

³Chutichuan, unaute u, in zînga mi hming ṭha, Thlarau Thianghlima khat, mi pasarih thlang ula, an hnênah hêng hna hi kan hlân ang e;

⁴keini erawh chu ṭawngṭai leh thu rawngbâwlah kan inpumpêk tlat ang e,” an ti a.

⁵Chu thu chuan mipui zawng zawng chu a tilâwm a; tichuan, Stefana, ringtu nghet tak leh Thlarau Thianghlima khat leh Filipa te, Prokora te, Nikanora te, Timona te, Parmena te, Nikola, Juda saphun, Antiokei khuaa mite an thlang a.

⁶Chûng mite chu tirhkohte hmaah an dintîr a, tirhkohte chuan an lu chunga kut nghatin an ṭawngṭai a.

⁷Tichuan, Pathian thu chu a darh zêl a, Jerusalem-ah chuan zirtîr an pung nasa êm êm a, puithiamte zînga mi tam tak pawhin Rinna chu an pawm ve ta a.

⁸Stefana chu Pathian khawngaihna leh thiltihtheihnain a khat a, mi zîngah thil mak leh chhinchhiahna ropui tak tak a ti ṭhîn a.

⁹Nimahsela, Kurini khua leh Aleksandria khua ata Juda ṭhenkhat ‘Sal chhuak pâwl’ Sunagog an tiha tel ve ṭhînte leh Kilikia ram leh Asia rama Juda-te an lo thawk a, Stefana chu an rawn hnial a.

¹⁰A finna leh a sawipuitu Thlarau chu an hnial hneh si lo va.

¹¹Tichuan, “Mosia leh Pathian pawi a sawi kan hria,” ti tûrin mite an tham a.

¹²Mipuite leh upate leh Dân zirtîrtute chu an fuihpawrh a, Stefana chu an bei a, an man a, Sanhedrin hmaah an hruai ta nghâl a.

¹³Hretu der an rawn thawhpui a, chûng chuan, “He mi hian kan Tempul thianghlim leh kan Dân hi a sawichhiat a bâng duh lo.

¹⁴‘Nazaret Isuan kan Tempul hi a ṭhiat ang a, Mosia Dân min pêkte hi a tidanglam vek dâwn,’ a tih kan hria a ni,” an ti a.

¹⁵Rorêltute zawng zawng chuan Stefana chu an en ṭhuap a, a hmêl chu vântirhkoh hmêl angin an hmu a.