Read Mizo Lushai TIRHKOHTE THILTIH 7 Bible Online

TIRHKOHTE THILTIH 7 - Mizo Lushai bible

TIRHKOHTE THILTIH 7

¹Puithiam lalber chuan, “Hêng thu hi a dik em?” a ti a.

²Ani chuan, “Ka unaute leh ka pute u, ngaithla rawh u. Kan pu Abrahama chu Haran khuaa a awm hma, Mesapotamia rama a awm lai khân, ropuina Pathian chu a hnênah a inlâr a.

³I ram leh i laichînte hi chhuahsan la, ram ka la kawhhmuh tûr che lamah kal rawh,’ a rawn ti a.

⁴Tichuan, Kaldai ram ata a chhuak a, Haran-ah awmhmun a khuar a. Chuta ṭang chuan a pa thih hnuah tûna in awmna ramah hian Pathianin a pêm luhtîr a.

⁵Pathian chuan ram luah tûr hniak khat pawh a pe lo va; mahse, Abrahama chu fa nei lo a ni chungin, amah leh a thlahte hnênah he ram hi pêk a tiam a.

⁶Pathianin hetiang hian a hrilh a ni, ‘I thlahte chu mi ramah an la mikhual ang a, kum zali lai mi bawihah awmin tihduhdah an ni bawk ang.

⁷Bawiha siamtu tûr hnam chu keimah ngeiin ka la ngaihtuah ang a, chumi hnuah an chhuak ang a, he hmunah hian ka rawng an la bâwl ang,’ a ti a.

⁸Pathianin a hnênah serh tan thu kha a thlung a. Chutiang tak chuan fapa Isaka a neih khân, a ni riat ni-ah a serh a tansak a. Isaka chuan fapa Jakoba a nei a, Jakoban fapa sâwm leh pahnih, thlahtute kha, a nei a.

⁹“Tin, thlahtute khân Josefa chu an îtsîk a, Aigupta ram lamah an hralh a; nimahsela, Pathian a hnênah a awm a,

¹⁰hrehawm a tuar zawng zawng ata chu a chhan chhuak zêl a. Aigupta rama lal Farawa mit hmuha mi fing tak leh duhawm tak a nihtîr a; Farawa chuan Aigupta ram chungah leh a chhûngkaw chunga hotu-ah a siam ta a.

¹¹Tin, Aigupta leh Kanan ram pumah ṭâm a lo tla a, an tuar na hle a; kan pute chuan ei tûr an nei ta lo va.

¹²Jakoban Aigupta ramah buh a awm tih a hriat chuan, kan pute chu a tîr chhuak a, chu chu an kal hmasak ber a ni.

¹³An kal vawi hnihnaah Josefa chu a unaute hnênah a inhriattîr a, Farawa pawhin Josefa chhûngte chu a hre ve ta a.

¹⁴Tichuan, Josefa chuan a pa Jakoba leh a unaute zawng zawng a kohtîr a, an vaiin sawmsarih leh panga lai an ni a.

¹⁵Jakoba te chu Aigupta ramah an chhuk a, ani leh kan pute chu an thi a.

¹⁶An ruang chu Sekem khaw thlengin an rawn zâwn a, Abrahaman Sekem khuaa Hamora fate laka tangka suma a lei thlânah an phûm ta a.

¹⁷Abrahama hnêna Pathian thutiam kha a thlen dâwn lai chuan kan mite chu Aigupta-ah chuan an pung chak hle a, an tam ta êm êm mai a.

¹⁸Aigupta ramah chuan lal dang, Josefa hre lo a lo lal ta a.

¹⁹Chu mi chuan kan chite chu vervêk takin a bei a, kan pute chu a tiduhdah a, an fa sênte thi tûrin a paihtîr zêl a.

²⁰Chumi lai chuan Mosia a lo piang a, nausên duhawm bîk tak mai a ni a, anmahni inah thla thum an awmpui a;

²¹an in ata an dah chhuah hnu chuan Farawa fanuin a chhar a, ama fa atân a nei ta a.

²²Mosia chu Aigupta ram finna zawng zawng a zirtîr a; tichuan, thu sawi thei tak leh thil ti thei tak a lo ni ta a.

²³Mosia chuan kum sawmli a nih kum khân, a unau Israel fate chu tlawh ṭûlin a hre ta a.

²⁴A va tlawh chuan an zînga pakhat chu Aigupta miin a lo tiduhdah lai a hmu a, a chhan a, a phuba a lâksak a, a tiduhdahtu chu a that ta a.

²⁵Mosia chuan ama kutin Pathianin anmahni a chhanhim dâwn tih a unauten an hria emaw a ti a; nimahsela, an lo hre si lo.

²⁶“A tûkah chuan mi pahnih insual lai a rawn hmu a, ṭhelh tumin, ‘Pute u, unau in ni alâwm, engati nge in insual tâk mai?’ a ti a.

²⁷A ṭhenawm bei hmasatu zâwk chuan Mosia chu a nam kiang a, ‘Kan chunga hotu-ah leh rorêltuah tuin nge siam che?

²⁸Nimina Aigupta mi i thah ang khân mi thah ve i tum a ni maw?’ a ti a.

²⁹Chu thu avâng chuan Mosia chu a tlân bo va. Midian ramah a va châm ta reng a, chutah chuan fapa pahnih a nei a.

³⁰“Tin, kum sawmli a vei hnuin Sinai thlalêrah hnimbuka meialh zîngah Vântirhkoh a hnênah a inlâr a.

³¹Mosian a thil hmuh chu mak a ti êm êm a; fiah tumin a va hnaih a, Lalpa awin,

³²‘Kei hi i pute Pathian, Abrahama te, Isaka te, Jakoba te Pathian chu ka nih hi,’ a rawn ti a. Tichuan, Mosia chu a khûr a, a fiah ngam ta lo va.

³³Lalpa chuan a hnênah, ‘I pheikhawk kha phelh rawh, i dinna kha hmun thianghlim a ni.

³⁴Aigupta rama ka mite an tihretheihzia ka hmu reng a, an rûm pawh ka hre reng a, anmahni hruai chhuak tûrin ka lo chhuk ta a ni. Hawh teh, Aigupta ramah ka tîr ang che,’ a ti a.

³⁵“Chu Mosia, ‘hotu-ah leh rorêltuah tuin nge siam che,’ tia an hnara ngei chu, Pathianin hotu leh chhanchhuaktu atân hnimbuka a hnêna inlâr vântirhkoh hmangin a rawn tîr ta a ni.

³⁶Ani chuan anni chu a hruai chhuak a, Aigupta ramah te, Tuipui Senah te, thlalêrah te kum sawmli chhûng lai thil mak leh chhinchhiahnate tiin a hruai a.

³⁷Chu Mosia chu Israel fate hnêna, ‘Pathianin keimah ang in unaute zînga mi zâwlnei a la siamsak ang che u,’ titu kha a ni.

³⁸Amah chuan thlalêra pung khâwm zîngah Sinai tlânga amah betu vântirhkoh chu a lo chhâwn a, kan pute hnêna thu sawi ṭhîna, min pêk chhâwn tûr thu nungte pawh dawngtu a nih kha.

³⁹Kan pute chuan a thu an zâwm duh lo va, an hnâwl a, Aigupta lama kîr leh an duh a.

⁴⁰Arona hnênah, ‘Kan hma hruaitu atân pathiante min siamsak teh khai; he Mosia, Aigupta ram ata min hruai chhuaktu lah hi engtin nge a awm tâk pawh kan hre si lo,’ an ti a.

⁴¹Chutichuan, bâwngno lim an siam a, chu milim hnênah chuan inthawina an hlân a, anmahni kutchhuak chu an hlimpui ta a.

⁴²“Tichuan, Pathianin anmahni a hawisan a, vâna arsite an biak theihna tûrin a kalsan a, zâwlnei Lehkhabua: ‘Israel chhûngte u, kum sawmli chhûngin thlalêrah khân inthawina ran mi hlân em ni?

⁴³Moleka puan in in zâwn a, In Pathian Refana arsi lemte in siam a. Chûng lemte chu chibai in bûk a, chuvângin, Babulon piah lamah ka tântîr ang che u,’ tih ziak ang khân.

⁴⁴“Kan pute chuan thlalêrah khân Pathian chênna puan in an nei a, Mosia hnêna Pathianin siam dân tûr a hrilh laia a lem a entîr ang taka siam a ni.

⁴⁵Chu ngei chu kan puten an chhawm zêl a, Pathianin kan pute hmaa Jentail-te a hnawh chhuaha, Josua hova Kanan ram an luh khân an luhpui a, Davida hun thleng khân a awm ta reng a.

⁴⁶“Davida chuan Pathian duhsakna a dawng a, Jakoba Pathian tân in sak phalna a dîl a.

⁴⁷Nimahsela, Solomona zâwkin in chu a saksak ta a.

⁴⁸Amaherawhchu, Chungnungbera zawng kuta sak inahte a awm ngai lo, zâwlneiin:

⁴⁹Lalpan, ‘Vân ka ṭhutthlêng a ni a, lei ka ke nghahchhan a ni. In eng ang nge mi saksak anga, ka chawlhhmun pawh khawiah nge?

⁵⁰Hêng thil zawng zawng hi ka kuta ka siam a ni lo vem ni?’ tia a sawi ang khân.

⁵¹“Mi tihmawh, serh tan lohho ang mai, thinlung sak leh beng tululte u; Thlarau Thianghlim in dodâl fo va, in pute ang bawkin nangni pawhin in ti ṭhîn.

⁵²In puten zâwlneite zîngah tu nge an tihduhdah loh? Mi fel tak, lo kal tûra thu hrilhlâwktute kha an that a, tûnah nangniho hi, chu mi fel tak mantîrtu leh thattute chu in ni.

⁵³Vântirhkohte pêk Dân dawngtu, zâwm duh si lote u,” a ti a.

⁵⁴Chûng thu chu an hriatin an thin a khei ta hle a, a chungah thinurin an ha an ṭhial a.

⁵⁵Nimahsela, Stefana chu Thlarau Thianghlimin a khat a, vân lam a thlîr reng a, Pathian ropuina leh Pathian ding lama Isua ding a hmu a.

⁵⁶“Ngai teh u, vân inhawng ka hmu a, Pathian ding lama Mihring Fapa ding pawh ka hmu,” a ti a.

⁵⁷Chutichuan, ring takin an au va, an beng an hup a, Stefana chu an beih rawn a,

⁵⁸khua ata chu an nam chhuak a, lungin an dêng ta a. Thuhretute chuan an puante chu tlangvâl pakhat, Saula an tih, ke bulah chuan an dah a.

⁵⁹Stefanan, “Lalpa Isu, ka thlarau la ang che,” tia Lalpa a koh lai chuan lungin an dêng ruih ruih a.

⁶⁰A ṭhingṭhi a, ring takin, “Lalpa, he an thiltih sual mawh hi anmahni phurhtîr suh ang che,” a ti a. Chu thu chu a sawi zawh chuan a muhîl ta a.