Read Mizo Lushai TIRHKOHTE THILTIH 8 Bible Online

TIRHKOHTE THILTIH 8 - Mizo Lushai bible

TIRHKOHTE THILTIH 8

¹Saula pawh chuan Stefana thah chu a remti ve rêng a. Chumi ni aṭang chuan Jerusalem-a kohhran chu nasa takin an tiduhdah ta a. Tichuan, tirhkohte chauh lo chu Judai leh Samari ram khaw tinah an darh ta vek a.

²Pathian ngaihsak ṭhenkhatten Stefana chu an phûm a, nasa takin an ṭah a.

³Saula erawh chu kohhranho nuai bo tumin inahte a lût a, a hmei a pain a hnûk chhuak a, tân inahte a khung a.

⁴Tin, a darhte chu hmun tinah an kal a, Chanchin Ṭha an hril zêl a.

⁵Filipa chu Samari khawpuiah a chhuk a, an hnênah Krista thu a hril a.

⁶Mipuiten Filipa thu sawi an hriata, a thil mak tihte an hmuh chuan a thusawite chu an bengkhawn tlâng hle a.

⁷Ramhuai bawlhhlawhte chu ring taka auvin mi tam tak kawchhûng ata an lo chhuak a, zeng leh kebai tam tak pawh tihdam an ni a.

⁸Chu khua chu an lâwm ta êm êm a.

⁹Chu khuaah chuan mi pakhat, Simona an tih, dawithiam a awm a. Mi ropui tak niin a insawi a, Samari mite chuan a dawi chu mak an ti êm êm a.

¹⁰Mi zawng zawngin, a lian a têin a thu chu an bengkhawn hle ṭhîn, “He mi hi Pathian thiltihtheihna, ‘Ropui,’ an tih kha a nih hi,” an ti a.

¹¹A mitdawivaih thiam chu hun rei tak mak ti taka a lo siam tawh avângin a thu chu an ngaichâng ṭhîn a ni.

¹²Pathian ram Chanchin Ṭha leh Isua Krista hming Filipan a hril chu an rin tâkah chuan, a hmei a pain baptisma an chang ta hlawm a.

¹³Simona meuh pawhin a ring ve ta a, baptisma a chang a, Filipa chu a kawp ta tlat a, chhinchhiahna leh thil mak ropui tak a tihte chu a hmu a, mak a ti êm êm ṭhîn a.

¹⁴Jerusalem-a tirhkoh awmte chuan Samari khaw miten Pathian thu an awih ta tih an hriat chuan an hnênah Petera leh Johana an tîr a.

¹⁵Anni chu an zu kal a, Thlarau Thianghlim an dâwn theih nân an ṭawngṭaisak a.

¹⁶An zînga tu mahin Thlarau Thianghlim chu an la dawng rih lo; Lalpa Isua hmingin baptisma an chang chauh a la ni si a.

¹⁷Tichuan, tirhkohten an lu chungah kut an nghat a, Thlarau Thianghlim an dawng ta a.

¹⁸Tirhkohten an chunga kut an nghahin Thlarau Thianghlim pêk an ni tih Simona chuan a hmuhin pawisa pêk a tum a,

¹⁹“Hetiang thiltihtheihna hi mi pe ve rawh u, an chunga kut ka nghahna apiangin Thlarau Thianghlim an dawn ve theih nân,” a ti a.

²⁰Nimahsela, Peteran a hnênah, “I tangka nên hian boral rawh u: Pathian thilthlâwn pêk tangka suma lei i tum avângin.

²¹I rilru put dân Pathian mit hmuhah a dik lo va, hêng thilah hian tel vena leh chanvo i nei ve lo.

²²Amaherawhchu, i sual hi sim la, Lalpa hnênah ṭawngṭai la, i ngaihtuahna sual hi a ngaidam mial mahna che.

²³Awhna rilru chhe tak i pu a, sualin a phuar tlat che tih ka hmu a ni,” a ti a.

²⁴Simona chuan, “I thil sawite chu eng mah ka chunga a lo thlen loh nân nangnin Lalpa hnênah mi dîlsak rawh u,” a ti a.

²⁵Chutichuan, Lalpa thu chu an hriattîra an sawi hnu chuan, Petera leh Johana chu Jerusalem lamah an haw leh ta a. An haw pah chuan Samari rama khaw tam takah Chanchin Ṭha an hril a.

²⁶Lalpa tirh vântirhkohvin Filipa chu a bia a, “Tho la, Jerusalem aṭanga Gaza khaw zuk chhun, chhim lam thlalêr kal tlang kawngah khuan kal rawh,” a ti a.

²⁷Tichuan, a tho va, a kal ta a. Tin, Ethiopia rama mi pakhat an lalnu Kandaki hnuaia mi tilreh lal tak, a sum zawng zawng enkawltu chu Jerusalemah Pathian be tûrin a han kal a;

²⁸a haw lamah chuan tawlailîra ṭhu chungin zâwlnei Isaia lehkhabu a chhiar a.

²⁹Thlarauvin Filipa hnênah, “Tawlailîr saw pan la, va pawh rawh,” a ti a.

³⁰Tichuan, Filipa chu a va tlân a, mi tilrehin zâwlnei Isaia lehkhabu a chhiar chu a ngaithla a, “I chhiar chu a awmzia i hria em?” a ti a.

³¹Ani chuan, “Tu ma mi hrilh fiah lohvin engtin nge ka hriat ang?” a ti a. Filipa chu a bula ṭhu-a chuang ve tûrin a sâwm a.

³²Lehkha Thu a chhiar lai chu hei hi a ni: “Berâm talh tûr angin ani chu an hruai a, Berâmno a hmul mêttu hmaa a ngawi reng angin, Ani pawhin a ka a âng lo,

³³Tihmualpho a ni a, dik lo taka rêlsak a ni, A thlahte chanchin tuin nge la sawi ang? Khawvêl aṭangin a nun an lâksak ta si a,” tih hi.

³⁴Mi tilreh chuan Filipa hnênah, “Zâwlnei hian tu thu nge a sawi, ama thu nge mi dang thu? Mi hrilh teh,” a ti a.

³⁵Filipa chuan Lehkha Thu aṭang chuan sawi ṭanin, Isua chanchin a hrilh ta a.

³⁶Chutia kalkawnga an kal lai chuan tui awmna an thleng a, mi tilreh chuan, “En teh, heta hi tui a awm a, baptisma ka chan engin nge dâl?” a ti a.

³⁸Tichuan, tawlailîr chu a tiding a, Filipa leh mi tilreh chu an pahnihin tuiah chuan an chhuk a; Filipa chuan a baptis ta a.

³⁹Tui ata an lo chhuah chhoh chuan Lalpa Thlarauvin Filipa chu a la bo ta a. Mi tilreh chuan a hmu ta lo va; nimahsela, hlim takin a kal ta zêl a.

⁴⁰Filipa chu Azota khuaah miin an lo hmu a, Kaisari khua a thlen hma chu khaw tinah a kal a, Chanchin Ṭha a hril zêl a.