Read Mizo Lushai TIRHKOHTE THILTIH 9 Bible Online

TIRHKOHTE THILTIH 9 - Mizo Lushai bible

TIRHKOHTE THILTIH 9

¹Saula erawh chuan Lalpa zirtîrte chu thah atân a la vau ta zêl a.

²Kawnga mite, a hmei a pa, a hmuh apiang mana, Jerusalem-a a rawn hruai theihna tûrin Damaska khaw sunagog hotute pêk tûr lehkha Puithiam lalber a va dîl a.

³Damaska pana a kal laiin, a thlen dâwn ruaiah, thâwklehkhatan vân aṭangin êng a vêlin a lo êng ta phut a.

⁴Leiah a tlu a; aw a hria a, “Saula, Saula, engati nge mi tihduhdah?” a rawn ti a.

⁵Ani chuan, “Lalpa, tu nge i nih?” a ti a. Aw chuan, “Isua, i tihduhdah hi ka ni e;

⁶tho la, khuaah lût la, i tih tûr an lo hrilh ang che,” a ti a.

⁷A kalpuite chu hrilhhai takin an ding a, aw chu an hre na a, tu mah an hmu si lo.

⁸Saula chu a lo tho va, a han meng a, eng mah a hmu thei ta lo va; tichuan, an kai a, Damaska-ah chuan an hruai lût a.

⁹Ni thum khaw hmu lovin a awm a, eng mah a eiin a in lo.

¹⁰Damaska-ah chuan zirtîr pakhat, Anania a awm a. Lalpa chu a hnênah a inlâr a, “Anani,” a ti a. Ani chuan, “Lalpa, heta hi ka awm,” a ti a.

¹¹Lalpa chuan, “Tho la, kawtthlêr, ‘ngîl,’ an tihah chuan kal la, Juda inah Tarsa khuaa mi Saula zawng chhuak rawh. Ani chu a ṭawngṭai mêk a,

¹²mi pakhat, Anania lo lûta, a mit tivâr tûra a chunga kut a nghat a hmu a ni,” a ti a.

¹³Anania erawh chuan, “Lalpa, chu mi chuan Jerusalem-a i mi thianghlimte nasa takin a tiduhdah tih mi tam takin mi hrilh a.

¹⁴Hetah pawh i hming lamtu zawng zawng man theihna thu puithiam lalte hnên aṭanga hmua lo kal a ni asin,” a ti a.

¹⁵Lalpa chuan, “Kal mai rawh, he mi hi Jentail-te, lalte leh Israel-te hnêna ka hming pu lûttu atâna ka mi ruat a ni asin.

¹⁶Ka hming avângin hrehawm engtia nasa nge a la tuar dâwn amah ka la hriattîr ang,” a ti a.

¹⁷Tichuan, Anania chu a chhuak a, inah chuan a va lût a, a chunga kut nghatin, “Unau Saul, i mit a vâr leh theih nân leh Thlarau Thianghlima i khah theih nân, i lo kalna kawnga i hnêna inlâr Lalpa Isua khân i hnênah mi rawn tîr a ni,” a ti a.

¹⁸Thâwklehkhatah a mit a vâr leh ta a. Tichuan, a tho va, baptisma a chang ta a.

¹⁹Chaw a ei a, a lo harh leh ta a. Damaska-ah chuan zirtîrte hnênah ni eng emaw zât a châm a.

²⁰Sunagog-ahte chuan Isua chu Pathian Fapa a ni tih a hril ṭan ta nghâl a.

²¹A thu sawi hria zawng zawngin mak an ti hle a, “He mi hi Jerusalem-a he Hming lamtute tiduhdahtu kha a ni lâwm ni? Puithiam lalte hnêna hruai atân he Hming lamtute man tumin hetah pawh a lo kal a ni lâwm ni?” an ti a.

²²Saula thu sawi chuan mi a hneh deuh deuh va, Isua chu Mesia a ni tih chiang takin a hrilh fiah ṭhin avângin Damaska-a Juda-te chu a tidang a, a tibuai zo ta a.

²³Ni rei tak chhûng chu Saula thah tumin Juda-te an inrâwn khâwm ṭhîn a.

²⁴Amah an phiar tih Saulan a lo hria a. Thah tumin chhûn leh zân kulh kawngkaahte an châng reng a.

²⁵Nimahsela, a zirtîrten ani chu an hruai a, zânah kulh bang pâwnah bâwmin an thlâk thla ta a.

²⁶Tin, Saulan Jerusalem a lo thlen chuan zirtîrte zînga tel a tum a, anni erawh chuan zirtîr a nih ve an ring thei lo va, an za-in an hlau hle a.

²⁷Nimahsela, Barnaba chuan tirhkohte hnênah a kalpui a, kalkawnga Lalpa a hmuha, Lalpan amah a biak thu te, Damaska-a Isua hminga huai taka thu a hril chanchin te a hrilh hlawm a.

²⁸Tichuan, Saula chu Jerusalem-ah chuan an zîngah a chêng ve ta a. Lalpa hmingin huai takin thu a hril ṭhîn a.

²⁹Grik ṭawng hmang Juda-te hnênah pawh thu a sawi a, a hnial a, anni chuan thah an lo tum ta mai a.

³⁰Unauten chu chu an hriatin Kaisari khuaah an hruai chhuk a, Tarsa khuaah an kaltîr ta daih a.

³¹Judai ramah te, Galili ramah te, Samari ramah te, ram pumah kohhran mite chu muang takin an awm a, an intinghet deuh deuh va, Lalpa ṭih takin an khawsa a. Thlarau Thianghlimin a thlamuan a, an lo pung ta telh telh a.

³²Petera khaw fang chuan Luda khuaa mi thianghlimte a zu tlawh a.

³³Chutah chuan mi pakhat Ainia, a zen avânga kum riat lai khuma mu tawh a hmu a.

³⁴Petera chuan a hnênah, “Aini, Isua Krista chuan a tidam a che, tho la, i khum kha siam fel rawh,” a ti a. Tichuan, a tho ta nghâl a.

³⁵Luda leh Saron phaia awm zawng zawngten Ainia chu an hmu a, Lalpa lam an hawi ta hlawm a.

³⁶Tin, Joppa khuaah zirtîr pakhat, Tabiti a awm a, a Grik hming chu Dorki a ni, chu chu sazukla tihna a ni. Thil ṭha ti leh retheite thil pe-a inhmang zo mi a ni.

³⁷Chûng lai chuan a dam lo va, a thi ta mai a. An bual fai a, pindan chungnungah an zalh a.

³⁸Luda chu Joppa khaw kiang lawka awm a ni a. Luda khuaah Petera a awm tih zirtîrten an hriat chuan, “Khawngaih takin lo kal thuai teh,” tia ngên tûrin a hnênah mi pahnih an tîr a.

³⁹Tichuan, Petera chu a tho va, an rual chuan a kal ve ta nghâl a. A va thlen chuan pindan chungnungah an hruai chho va, hmeithai zawng zawng chu a kiangah an ding a, an ṭap a. Dorkiin a dam laia kawr leh thawmhnaw dang a siamsakte chu an entîr a.

⁴⁰Petera chuan an vaiin a chhuahtîr vek a, ṭhingṭhiin a ṭawngṭai a, ruang lam chu a hawi a, “Tabit, tho rawh,” a ti a. Tichuan, Tabiti chu a lo meng a, Petera chu a hmu a, a ṭhuchhuak ta a.

⁴¹Petera chuan a ban a, a kai tho va, mi thianghlimte leh hmeithaite chu a ko va, damin an hnênah a hruai ta a.

⁴²Chu chu Joppa khaw pum puiin an hria a, mi tam takin Lalpa an ring ta a.

⁴³Petera chu Joppa-ah chuan ni rei tak a châm a, savun siamtu Simona inah a thleng a.