Read Mizo Lushai KHUAA MITE HNENA TIRHKOH PAULA LEHKHATHAWN ROM 1 Bible Online

KHUAA MITE HNENA TIRHKOH PAULA LEHKHATHAWN ROM 1 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 1

¹Paula, Isua Krista bawih, tirhkoh atâna koh, Pathian Chanchin Ṭha hril tûra tihhrana chuan:

²chu Chanchin Ṭha chu Pathianin a zâwlneite hmangin a lehkha thianghlimah a lo tiam tawh a.

³A Fapa, kan Lalpa Isua Krista thu chu tisa lam chhui chuan Davida thlaha piang a ni a,

⁴thianghlimna thlarau lamah erawh chuan; mitthi zîng ata ropui taka kaihthawh a nihna chuan Pathian Fapa a nihzia a tilang chiang a;

⁵amah avâng chuan Pathianin hnam tin zînga mite ringa awihtîr tûrin tirhkoh nihna chanvo min hlân a ni.

⁶Nangni pawh chutianga Krista mite ni tûra koh in ni si a.

⁷Pathianin a duh tak, a mi thianghlim ni tûra a koh Rom khuaa mite chibai ka bûk a che u. Pathian kan Pa leh Lalpa Isua Krista hnên ata khawngaihna leh remna in hnênah awm rawh se.

⁸Ringtu in nih thu ram tina a than tâk huai huai avângin Isua Krista zârah nangmahni avângin Pathian hnênah lâwmthu ka sawi hmasa a ni.

⁹Ka ṭawngṭainaahte chuan ka hre reng ṭhîn che u a, tih tak meuhva a Fapa Chanchin Ṭha rawng ka bâwl Pathian chu mi hriatpuitu a ni.

¹⁰A remtih zâwng a nih chuan tûn ṭumah tal ka rawn tlawh theihna tûr che uin Pathian ka dîl ṭhîn a ni.

¹¹In ngheh lehzual nân thlarau lam thilpêk dawntîr tûr che uin hmuh che u ka chak êm êm a ni,

¹²kei leh nangni hi rinnaa kan inchâwm tawna, kan inṭanpui tawn theihna tûrin.

¹³Unaute u, rawn tlawh che u ka tum fo va; mahse, rem lohna a awm leh ṭhîn a ni tih in hriat ka duh a ni. Jentail dang zînga ka hmuh ṭhin angin in zîngah pawh rah hmuh ve ka beisei.

¹⁴Grik mite leh Awze mite, mi fing leh mi mâwlte hnênah bat ka nei a;

¹⁵chuvângin, a ni, nangni Rom khuaa awmte hnênah pawh Chanchin Ṭha hi hril ka châk êm êm ni.

¹⁶Chanchin Ṭha hi ka zahpui si lo va, tu pawh a ring apiangte chhandam nâna Pathian thiltihtheihna a ni si a; Juda-te tân a ni phawt a, Jentail-te tân pawh a ni leh a.

¹⁷Hetah hian rinna avâng chauhva Pathianin mi thiam a chantîr dân a lo lang ta a ni, “Rinna avânga thiam chang chu a nung ang,” tih ziak ang khân.

¹⁸Vân ata Pathian thinurna chu mihring, an sakhaw ngaihsak lohna leh suahsualna avânga thutak dodâl tlattute chungah chuan a lo lang a ni.

¹⁹Pathian chanchin hriat theih tûr chi chu mihringte hnênah a lang reng a, chu chu Pathian ngeiin a tihlan a ni.

²⁰A nihna, mita hmuh theih loh, a chatuan thiltihtheihna leh a Pathianzia chu khawvêl siam tirh ata a thil siamahte chuan chiang taka hmuh theihin a lang a. Phatna tûr rêng an nei lo.

²¹Pathian zawng an hria a ni; Pathian ang erawh chuan an chawimawi lo va, lâwmthu pawh an hrilh hek lo; an ngaihtuahna a khawlo zo va, an rilru lawilo tak chu a thim zo ta a ni.

²²Fing an inti nâ a, an â hle si a ni.

²³Thi thei lo Pathian ropuina chu thi thei mihring te, sava te, ke pali nei te leh rannung lim ang lekah an chantîr a.

²⁴Chuvângin, an thinlung châkzâwng thil bawlhhlawhte ti tûrin Pathianin a hawisan a, zahpuiawm takin an awm ta a ni.

²⁵Pathian thutak aiin dâwt an thlang a, a siamtu chu biak aiin a siama chu biain a rawng an bâwl ta zâwk a. A siamtu chu chatuana fakin awm rawh se. Amen.

²⁶Chûng avâng chuan a ni Pathianin zahthlâk taka an hur phalin a hawisan tâk ni; an hmeichhiate chu an awm dân phung pêlin an khawsa a;

²⁷an mipate lah hmeichhe hman dân pangngai bânsanin, hurin an inît tawn a, mipa leh mipa mawi lo takin an khawsa a. Anmahni taksa ngeiah an sual rah chu an hmu a ni.

²⁸Tichuan, Pathian hriatna dik chu an thlah tâk avângin an ngaihtuahna khawlo tak anga awm tûrin Pathianin a hawisan a, an tih loh tawp tûr pawh an ti ta a ni.

²⁹Dik lohna chi tinrêngin an lo khat ta a, sualna te, duhâmna te leh suahsualna te, îtsîkna te, tual thah te, in erna te, inbumna te leh inhuatna tein an khat a.

³⁰An inrêl a, an insawichhia a, Pathian an hua a, an intivei a, an chapo va, an uang a, thil ṭha lo thar an chîng chhuak zêl a; an nu leh pate an zah lo va,

³¹pawisak an nei lo va, lainatna lah an nei hek lo.

³²Chutiang thil titute chu Pathianin a ruat ang ngeia thi tlâk an ni tih hre reng chungin, an ti lui zêl a, a ti vete pawh an ngaisâng lehnghâl a ni.