Read Mizo Lushai KHUAA MITE HNENA TIRHKOH PAULA LEHKHATHAWN ROM 10 Bible Online

KHUAA MITE HNENA TIRHKOH PAULA LEHKHATHAWN ROM 10 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 10

¹Unaute u, ka chipuite chu chhandam ni se tih hi ka duhthusâm leh Pathian hnêna ka dîl ber ṭhin a ni.

²Pathian tân ṭhahnem an ngaih nasatzia ka hria, hre chiang lovin ṭhahnem an ngai a ni.

³Pathianin mi thiam a chantîr dân chu an hrethiam lo va, anmahni kawng an zawh tlat a, Pathianin thiam a chantîr dân hnuaiah an intulût duh lo.

⁴A ring apiangte thiam chantîra an awm theihna tûrin, Krista chu Dân tibângtu a ni si.

⁵Mosia chuan Dân zawm avânga thiam chan chungchâng thu heti hian a ziak: “Dân zâwmtu chu a nung ang,” tiin.

⁶Rinna avânga thiam chan chungchâng thu erawh chu, “ ‘Tu nge vânah lâwn ang?’ (Chu chu chung lam ata tu nge Krista hruai chhuk ang, tihna a ni) emaw,

⁷‘Tu nge leilâwtah chhuk ang?’ (chu chu, mitthi khua ata tu nge Krista hruai chhuak ang, tihna a ni) emaw, in rilruin ti suh u,” a ti a.

⁸“Thu chuan a hnaih a che, i kâah leh i thinlungah a awm,” a ti zâwk a ni. ‘Thu’ tih chu rinna thu kan hril hi a ni.

⁹I kâin Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandam i ni ang.

¹⁰Thinlunga ring chu thiam chantîr an ni a, kâa ṭan chu chhandam an ni bawk a.

¹¹Lehkha Thu-in, “A ring chu tu mah an mualpho lo vang,” a ti a ni.

¹²Juda nih emaw, Grik nih emaw danglamna a awm chuang lo; Lalpa pakhat chu an zaa Lalpa a ni a; amah lamtu apiangte tân chuan engkim a ngah a ni.

¹³“Tu pawh Lalpa hming lam apiang chhandam an ni ang,” tih a ni si a.

¹⁴An rin lohva chu engtin nge an lam theih ang? An hriat lohva chu engtin nge an rin theih ang? Hrilhtu an awm si loh chuan engtin nge an hriat ang?

¹⁵Tirh an nih si loh chuan tu nge hril ang? “Thil ṭha chanchin rawn hriltute ke chu a va mawi êm!” tih ziak ang khân.

¹⁶Nimahsela, Chanchin Ṭha chu an za-in an awih vek lo. Isaia ngei pawhin, “Lalpa, kan thu sawi tuin nge ring?” a ti si a.

¹⁷Tichuan, rinna chu thu hril an hriat avângin a lo awm a, thu hril chu Isua Krista thu hi a ni.

¹⁸A nih leh, an bengin an hre ngai lo vem ni? Hria e a! “An thâwm chu ram tinah a thang a, an thu chu kâwlkil thlengin a thang chhuak ta,” tih a ni.

¹⁹A nih leh Israel miten an hre ve lo vem ni? “Chi-a sawi tham lohte chu ka thîktîr ang che u a, Chi fing lote avângin ka tithinur dâwn che u a ni,” tiin Mosia chuan a sawi hmasa a.

²⁰Isaia chuan a sawi huai lehzual a: “Mi zawng lote chuan mi hmu a, Mi lam lote hnênah ka inhriattîr a,” a ti a.

²¹Israel-ho chungchâng thu-ah erawh chuan, “Mi tihmawh leh hel hmangho tân Nilêngin ka bân ka phar ṭhîn,” a tih kha.