Read Mizo Lushai KHUAA MITE HNENA TIRHKOH PAULA LEHKHATHAWN ROM 11 Bible Online

KHUAA MITE HNENA TIRHKOH PAULA LEHKHATHAWN ROM 11 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 11

¹A nih leh, Pathian chuan a mite chu a paih thla kan ti dâwn em ni? Paih thla suh e. Kei ngei pawh Israel mi, Abrahama thlah, Benjamin hnam ka ni si a.

²Pathianin a mi hriat lâwkate chu a paih thla lo ve. Elija chanchin Lehkha Thua chuang kha in hre lo vem ni? Ani chuan Israel mite chungthu Pathian hnênah a thlen a:

³“Lalpa, i zâwlneite an tihlum a, I maichâmte an tichim a, Keimah chauh hi ka la awm a, Kei pawh mi tihhlum an tum a ni,” tiin.

⁴Pathianin engtin nge a chhân kha? “Baala hmaa ṭhingṭhi ngai lo mi sângsarih keima tân ka la zuah reng a ni,” tiin a chhâng a nih kha.

⁵Tûnah pawh chutiang bawk chuan Pathianin a khawngaihna avânga a thlan chhuahte chu tlêm tê chauh an ni.

⁶A khawngaihna avânga thlan chhuah an nih chuan, an thiltih vâng a ni thei lo; chuti ni se khawngaihna chu khawngaihna a ni thei lo vang.

⁷Engtin nge ni ta ang le? Israel-te chuan an zawn chu an hmu lo va, Pathian thlan tlêm tê chauhvin an hmu, mi dang zawng zawng chu an chawlawl zo vek ta a ni.

⁸“Pathianin vawiin thlengin rilru muthlu a pe a, hmu thei lo mit leh hre thei lo beng nên,” tih ziak ang khân.

⁹Tin, Davida chuan, “An ruai siam chu an tân thang leh fal ni sela, Tlûkna leh thungrulhna ni rawh se!

¹⁰An hmuh theih loh nân an mit chu thim sela, Rit phurin kûl reng rawh se,” a ti bawk a.

¹¹A nih leh an tlûk avângin an chhe hlen dâwn em ni? Chhe hlen suh e, an tlûk avângin Jentail-te hnênah chhandamna a lo thleng a, Israel-te awh tûra lo thleng a ni.

¹²Tichuan, an tlûkna mah khawvêl tihhausakna a niha, an tlâkhniamna mah Jentail-te hausakna a nih bawk si chuan, an lo tel kim hun chuan eng ang tak ni ang maw!

¹³Nangni Jentail-te hnênah thu ka sawi a nih hi. Kei hi Jentail tâna tirhkoh ka nih avângin ka rawngbâwl hna hi ka ngai ropui a ni;

¹⁴ka chipuite ka thîktîr che u a, a ṭhen tal ka chhandam theihna tûrin.

¹⁵Anmahni paihthlâkna mah khawvêl hi Pathian ṭhiana siam lehna a nih si chuan, anmahni lawm luh lehna chu thihna ata nun lehna a ni dâwn lâwm ni?

¹⁶Chhang hmeh lai hlâwm ata sawh thlâk hmasak ber chu serh thianghlim a nih chuan, a hlâwm pum pawh serh thianghlim a ni; tin, thing pawh a zung a thianghlim chuan a zârte pawh a thianghlim a ni.

¹⁷Oliv thingzâr ṭhenkhat chu sât thlain, nangni oliv suakte chu oliv kûngah chuan zawm in ni a; zung ṭha chu in ṭâwm ve ta a.

¹⁸Zâr dangte lakah chuan inchhuang mah ula, a zung châwmtu in ni lo, a zungin a châwm zâwk che u a ni.

¹⁹Tin, nangin, “Zawma ka awmna tûr zârte chu sah thlâk a ni alâwm,” i ti ang e.

²⁰I ti dik e; an rin loh avângin sah thlâk an ni a, nang chu i rin avângin zawm i ni. Chapo mai teh suh, hlau zâwk rawh.

²¹Pathianin zâr takte chu a zuah si loh chuan nang pawh a zuah bîk lo vang che.

²²Pathian ṭhatzia leh a ṭihbaiawmzia hi ngaihtuah teh; tlute tân a ṭihbaiawm a, a ṭhatnaa i awm reng chuan, nanga tân zawng a ṭha a ni; i awm reng loh chuan nang pawh sah thlâk i ni ve mai ang.

²³Tin, anni pawh ring lova an awm reng loh chuan zawmin an awm leh ang, Pathianin anni chu a zawm leh thei si a.

²⁴Nang oliv suak ata sah chhûm mah, pianphung pângngai ang lova oliv thing ṭhaa zawm i nih si chuan, oliv zâr dik tak chu oliv thing dikah chuan zawm a va awlsam zâwk dâwn êm!

²⁵Unaute u, he thurûk hi in hriat loh ka duh si lo; chutilo chu, fing tâwk in lo inti dah ang e; Jentail-te an tel kim hma chu Israel mi ṭhenkhatte chungah chawlawlna a lo thleng rih a ni, tih hi.

²⁶Chumi hunah chuan a ni, Israel mi zawng zawng chhandam an nih dâwn ni. “Zion aṭangin Chhandamtu chu a lo chhuak ang a, Jakoba hnên ata suahsualna a ti bo vang.”

²⁷‘Chu chu an hnêna ka thuthlun tûr chu a ni, An sualte ka lâk bo hunah chuan,’ tih ziak ang khân.

²⁸Chanchin Ṭha an hnâwl avângin Juda-te chu Pathian hmêlma an ni a; nangni chan a ṭhat phah a; mahse, Pathianin a thlan avângin thlahtute azârah a ṭhian duh takte an ni tho.

²⁹Pathianin mal a sâwm tawh leh a thlan tawh chu sût leh theih a ni lo.

³⁰Hmânah chuan Pathian thu in awih lo va, tûnah zawng annin an awih loh avângin a khawngaihna in dawng ta a;

³¹chutiang bawkin, tûnah nangnin khawngaihna in dawn avângin, anni pawhin khawngaihna an dawn ve theih nân tûnah hian an awih rih lo a nih hi.

³²An zavaia chungah a khawngaihna a lantîr duh avângin Pathian chuan mi zawng zawng awih lohnaah a khung khâwm a ni.

³³Pathian hausakzia, a finna leh a hriatna chu a va thûk êm! A rorêl dân chu hriat phâk rual loh, a kawngte chu chhui theih rual loh a ni!

³⁴“Lalpa rilru chu tu nge hriaa, tu nge a remruatsaktuah ṭang tawh?

³⁵A rulh leh tûra a hnêna thil pe tu nge awm ngai le?”

³⁶Thil zawng zawng hi amah aṭanga lo awm, amah avâng leh ama tâna awm a ni. A hnênah chatuanin ropuina chu awm rawh se; Amen.