Read Mizo Lushai KHUAA MITE HNENA TIRHKOH PAULA LEHKHATHAWN ROM 12 Bible Online

KHUAA MITE HNENA TIRHKOH PAULA LEHKHATHAWN ROM 12 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 12

¹Chuvângin, unaute u, Pathian khawngaihna avâng hian, inthawina nung leh thianghlim, Pathian lawm tlâk ni tûrin, in taksa chu a hnêna hlân tûrin ka ngên a che u, chutiang chu in rawngbâwl dân tûr tak a ni e.

²Tûnlai khawvêl awm dân ang hi ṭâwm suh u; in nun phung chu, in rilru tihthara awmin, tihdanglam ni vek rawh se; tichuan, Pathian duhzâwng, ṭha leh lawm tlâk leh ṭhat famkim chu in hrethiam thei ang.

³Pathian mi pêk khawngaihna avâng hian in zînga tu mah inngaihlu lutuk lo tûrin ka ngên a che u. Pathianin mi tin hnêna rinna a pêk ang zêlin mahni phu tâwk rilru pu rawh u.

⁴Taksa pum khatah pêng hrang tam tak kan nei a, pêng zawng zawngin thawh hrang an nei ṭheuh;

⁵chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni.

⁶Khawngaihna min pêk ang zêlin thilthlâwnpêk hrang hrang kan dawng ṭheuh a ni; thu hril lam a nih chuan, kan rinna ang zêlin hril ila,

⁷rawngbâwl lam a nih chuan, ṭhahnemngai takin bâwl ila, zirtîr lam a nih chuan zirtîr ila;

⁸mi thlamuan tûr a nih chuan theihtâwp chhuah ila; petu chuan phal takin pe sela, rorêltu chuan taima takin rêl sela, puih ngai puitu chuan hlim takin pui rawh se.

⁹Hmangaihna chu vervêkna tel lovin ni rawh se. Sual chu hua ula, a ṭha chu pawm tlat rawh u.

¹⁰Unau inlainat angin inlainat tawn ula, inchawimawi tawn uar rawh u.

¹¹Inthlahdul hauh lovin rilru phûr takin Lalpa rawng chu bâwl rawh u.

¹²Beiseina chuan tilâwm che u sela, tihduhdah in tuar pawhin chhel takin tuar ula, eng lai pawhin ṭawngṭai rawh u.

¹³Unau tlachhamte chu chhawmdâwl ula, mikhual lawm chîng rawh u.

¹⁴A tiduhdahtu che u chu malsâwm ula, ânchhia lawh suh u.

¹⁵Lâwmte chu lâwmpui ula, ṭapte chu ṭahpui rawh u.

¹⁶Angkhat vekin inen ula, intivei suh u, mi tête pâwl zâwk rawh u.

¹⁷Sual chu sual vêkin thungrûl lo ula, mi zawng zawng ngaiha mawi ngaihtuah zâwk rawh u.

¹⁸Nangni chuan in theihtâwpin mi zawng zawng nên inrem tum rawh u.

¹⁹Duh takte u, phuba la suh ula, Pathian thinurna kian zâwk rawh u. “ ‘Phuba rêng rêng keima lâk tûr a ni, keiman ka thungrûl ang,’ Lalpan a ti,” tih ziak a ni si a.

²⁰Chuvângin, i hmêlma a rilṭâm chuan ei tûr pe rawh, a tuihâl chuan in tûr pe rawh; chutianga i tih chuan a zak êm êm dâwn a ni.

²¹Sual ngam chein awm suh la, ṭhatnain sual chu ngam zâwk rawh.