Read Mizo Lushai KHUAA MITE HNENA TIRHKOH PAULA LEHKHATHAWN ROM 13 Bible Online

KHUAA MITE HNENA TIRHKOH PAULA LEHKHATHAWN ROM 13 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 13

¹Mi tinin an chunga rorêltute thu an awih tûr a ni. Pathian ruat lohvin rorêltu an awm thei lo; tûna rorêltute pawh hi Pathian ruat an ni asin.

²Tichuan, rorêltu dodâl chuan Pathian ruat a dodâl a ni; dodâltu chuan ama chungah hremna a thlentîr ang.

³Rorêltu chu thil ṭha titu tân a hlauhawm lo, thil sual titu tân erawh chuan a hlauhawm a ni. Rorêltu hlau lova awm i duh em? Thil ṭha ti la, a fak i hlawh ang.

⁴I ṭhatna tûra Pathian rawngbâwltu a ni si a. Thil sual i tih erawh chuan hlau rawh, khandaih chu a keng mai mai lo a nia. Pathian rawngbâwltu a ni a, thil sual titute chunga Pathian hremna kengkawhtu a ni.

⁵Chuvângin, hrem hlauh vâng mai ni lovin, i chhia leh ṭha hriatna avâng pawhin a thu i zâwm tûr a ni.

⁶Chutiang a nih avâng chuan chhiah pawh in chawi ṭhîn; thuneitute chuan an hna ṭha taka an thawh chuan Pathian rawng an bâwl a ni si a.

⁷Pêk tûra ruat apiangte hnênah pe ula, lei man pêk tûr a nih leh pe ula, chhiah chawi tûr a nih leh chawi ula, ṭih tûr chu ṭih ula, pawisak tûr chu pawisa rawh u.

⁸Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan Dân a zawh famkim tawh a ni.

⁹Hêng, “Uire suh, tual that suh, ru suh; awt suh” tih leh thupêk dang rêng rêngte hi, “Nangmah i inhmangaih angin i vêngte i hmangaih tûr a ni,” tih hian a khai khâwm vek si a.

¹⁰Hmangaihnain vêngte a tikhawlo ngai lo va; chuvângin, hmangaihna hi Dân zawh famkimna a ni.

¹¹Tûnlai thil awmzia hi in hria e; muhîl thawhharh a hun takzet tawh a, tûnah chuan kan rin tirh lai ai khân chhandam kan nihna tûr ni chu a hnai zâwk tawh a ni.

¹²Zân hi a ral lek lek tawh a, khua a vâr dâwn ta; chhûn ênga awmte angin mawi takin khawsa ila, thim thiltih chu paihin, êng thuamin i inthuam ang u.

¹³Zu in buai leh ruia awm lovin, hur leh inngaih hmanga awm lovin, insual leh inîtsîka awm hek lovin.

¹⁴Lalpa Isua Krista chuan inthuam zâwk ula, in tisa châkna puitlin tum rêng rêng suh u.