Read Mizo Lushai KHUAA MITE HNENA TIRHKOH PAULA LEHKHATHAWN ROM 15 Bible Online

KHUAA MITE HNENA TIRHKOH PAULA LEHKHATHAWN ROM 15 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 15

¹Keini mi chak zâwkte hian mahni lâwmna zawng lovin, chak lo zâwkte chu an chak lohnaah kan ṭanpui tûr a ni.

²Intihsâwt tawn nân mahni vêngte tilâwmin an tâna ṭha tih i tum ṭheuh vang u.

³Krista pawhin mahni lâwmna a zawng si lo, “Nangmah chêksawlhtute chêksawlhna chu ka chungah a tla ta,” tih ziak ang khân a tuar zâwk a ni.

⁴Lehkha Thua lo ziak tawh rêng rêng chu min zirtîr tûra ziak a ni, thu ziak aṭanga chhelna leh thlamuanna kan dawn azâra beiseina kan neih theih nân.

⁵Tin, chhelna leh thlamuanna petu Pathian chuan, Krista Isua thu angin rilru hmunkhat puttîr che u sela,

⁶thinlung hmun khat pua thukhat vuain, kan Lalpa Isua Krista Pa leh Pathian chu in fak za thei dâwn nia.

⁷Pathian ropuina tûrin Krista chuan a lâwm che u ang khân inlâwm tawn rawh u.

⁸Ka hrilh a che u, Pathian rinawmzia tihchian nân thlahtute hnêna a thutiam hlenin, Krista chu serh tanho rawngbâwltuah a lo awm a.

⁹Jentail-te pawhin a khawngaihna avânga Pathian an chawimawi theihna tûrin: “Tichuan, Jentail-te zîngah ka fak ang chia, I hming fakin ka zai ang,” tih ziak ang khân.

¹⁰Hetiang hian a ti bawk, “Jentail-te u, a mite nên lâwm rawh u.”

¹¹Hetiang pawh hian a ti: “Jentail zawng zawngte u, Lalpa chu fak rawh u, Ama mite zawng zawng pawhin fak rawh se.”

¹²Isaia pawhin heti hian a ti: “Jesaia zung zâm chu a awm ang a, Jentail-te lal tûrin a lo chhuak ang. Amahah Jentail-te chuan an beiseina an nghat ang.”

¹³Thlarau Thianghlim thiltihtheihna azârah beiseinaa in khah theihna tûrin, beiseina hnâr Pathian chuan in rin avângin lâwmna leh thlamuanna tinrêngin vûr che u rawh se.

¹⁴Ka unaute u, nangniho hi ṭhatnaa khat, finna tinrêng ngaha, inzirtîr tawn thei tûr in nih ka ring tlat a;

¹⁵amaherawhchu, thil ṭhenkhat hriat nawntîr tûr che uin ka rawn ziak tho va. Jentail-te tâna thawk tûra Pathianin Krista rawngbâwl hna mi rawn hlan hi chhuangin ka ziak huai hle nghe nghe a.

¹⁶Jentail-te chu Thlarau Thianghlima Pathian hnêna lawm tlâka inthawina atân hlan tûrin Chanchin Ṭha hril hi ka puithiam hna a ni si a.

¹⁷Krista Isuaah chuan Pathian rawng ka bâwl hi ka chhuang hle a ni.

¹⁸Jentail-te awihtîr tûra thu leh thiltihte, chhinchhiahna leh thil mak tihtheihnate leh Thlarau Thianghlim thiltihtheihnatea Kristan keimah hmanga a thiltihte lo chu eng mah ka sawi ngam si lo. Jerusalem aṭangin Illurikon leh a chhehvêl thlengin Krista Chanchin Ṭha chu hmun tinah ka hril vek tawh.

²⁰Mi dang lungphûm chunga rem chho ka nih loh nân, Krista la hriat lohna hmun apiangah Chanchin Ṭha puan hi ka duh dân a ni si a:

²¹“A chanchin la hril ngai lohnaa mite chuan An hmu ang a, La hre ngai lote chuan an hria ang,” tih ziak ang khân hril ka tum zâwk ṭhîn a ni.

²²Chuvâng chuan a ni, in hnêna lo kal ka ṭhulh leh ṭhin ni.

²³Tûnah erawh chuan hêng lai ramah hian kalna tûr ka nei ta lo va; kum tam tak chhûng rawn tlawh che u ka châk tawh bawk nên;

²⁴Spain ram kal pahin lo kal ka inbeisei a, nangni nên inpâwl kham tê tê ila, kal ka tumna lama mi thlah ka beisei bawk a ni.

²⁵Tûnah tak hi chuan mi thianghlimho rawngbâwl tûrin Jerusalem khuaah ka kal rih dâwn.

²⁶Makedonia leh Akaia rama mite chuan phal takin Jerusalem khuaa mi thianghlimho zînga retheite tân thawhlâwm an thawh a.

²⁷Phal taka ti an ni; amaherawhchu, an lakah bat an nei ve rêng a ni; Jentail-ten an thlarau lam thilte an ṭâwmpui chuan, khawvêl lam thilah anmahni chhawmdâwl ve thung âwm rêng an ni.

²⁸Chu chu ka tiha, thawhlâwm chu an hnêna ka hlan fel hnuah, nangmahni tlawhin Spain ramah ka kal zêl ang.

²⁹Tin, in hnêna ka lo kal hun chuan Krista malsâwmna famkim nên ka lo kal ang tih ka hria.

³⁰Unaute u, kan Lalpa Isua Krista leh Thlarau Thianghlim zâra in hmangaihnain Pathian hnêna mi ṭawngṭaipui ngat ngat tûrin ka ngên a che u.

³¹Judai rama ring lote laka ka him theih nân te, ka rawngbâwlna hi Jerusalem-a mi thianghlimte tân thil lâwmawm tak a nih theih nân te,

³²rilru hlim taka ka lo kal theiha, Pathianin rem a tih chuan kan intihharh tawn theih nân te mi ṭawngṭaisak rawh u.

³³Remna Pathian chu in zaa hnênah awm rawh se. Amen.