Read Mizo Lushai KHUAA MITE HNENA TIRHKOH PAULA LEHKHATHAWN ROM 16 Bible Online

KHUAA MITE HNENA TIRHKOH PAULA LEHKHATHAWN ROM 16 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 16

¹Kan farnu, Foibi, Kenkriai kohhrana rawngbâwltu hi,

²Lalpa hminga mi thianghlimte tih âwm rênga lo lâwm tûr leh, puih a ngaihna apianga lo pui tûrin ka duh che u a ni. Amah pawh hi mi tam tak puitu a lo ni ṭhîn a, kei ngei pawh hi mi pui a ni.

³Priski leh Akuila, Krista Isuaa ka hnathawhpuite kha, chibai ka bûk e.

⁴Anni chuan ka nun chhanhim nân thih pawh an huam kha; kei chang ni lovin, Jentail kohhran zawng zawng pawh an chungah an lâwm a ni.

⁵An ina kohhran inkhâwmho kha chibai ka bûk e. Ka duh tak Epainata, Asia rama Krista ring hmasa bera kha, chibai ka bûk e.

⁶Mari, in tân rim taka thawktu kha, chibai ka bûk e.

⁷Andronika leh Junia, ka chipui leh ka tânpuite kha, chibai ka bûk e; anni chu tirhkohte zînga hmingthang tak an ni a, kei aia Krista ring hmasa an ni.

⁸Ampliata, Lalpaa ka duh tak kha, chibai ka bûk e.

⁹Kristaa ka thawhpui Urbana leh ka duh tak Stakua kha chibai ka bûk e.

¹⁰Kristaa mi tak, Apelia kha chibai ka bûk e. Aristobula chhûngte chibai ka bûk e.

¹¹Ka chipui Herodiana kha chibai ka bûk e. Narkisa te chhûng zînga mi Lalpaa awmte kha chibai ka bûk e.

¹²Trufaini leh Trufosi, Lalpaa thawk rim ṭhînte kha, chibai ka bûk e. Duh tak Persi, Lalpa tâna rim taka thawk ṭhîn kha, chibai ka bûk e.

¹³Lalpa hnaa mi langsâr tak Rufa leh a nu, ka nu ve bawk kha, chibai ka bûk e.

¹⁴Asunkrita te, Flegona te, Hermea te, Patroba te, Herma te, an hnêna unau awmte nên, chibai ka bûk e.

¹⁵Filologoa leh Juli nên, Nirea leh a farnu nên, Olumpa nên, an hnêna mi thianghlim awm zawng zawng nên chibai ka bûk e.

¹⁶Fawh thianghlimin inchibai tawn ula, Krista kohhran hian chibai kan bûk bawk a che u.

¹⁷Unaute u, zirtîrna thu in dawn kalh zâwnga in zînga inṭhenna leh tlûkna chawk chhuaktute lakah fîmkhur ula, anni chu hawisan tûrin ka ngên a che u.

¹⁸Chutiang mite chuan kan Lalpa Krista rawng an bâwl lo va, mahni pumpui rawngbâwl mai an ni. An ṭawng hmang thiam leh kam ṭhatin mi mâwlte chu an bum ṭhîn.

¹⁹Chanchin Ṭhaa in nghehzia hi mi tin hriat a ni; chuvângin, kei pawh in chungah ka lâwm a ni. Thil ṭha lama finga, sual lama in fihlîm ka duh a ni.

²⁰Remna Pathian chuan Setana chu in ke hnuaiah a rahbehtîr thuai dâwn che u a ni. Kan Lalpa Isua Krista khawngaihna chu in hnênah awm rawh se.

²¹Ka hnathawhpui Timothea leh ka chipui Lukia te, Jasona te, Sosipatera te hian chibai an bûk a che u.

²²Kei, Tertia, he lehkha ziaktu hian, Lalpa hmingin chibai ka bûk a che u.

²³Ka thlen in-pa, kohhran inkhâwm thlengtu Gaia hian, chibai a bûk a che u. Khaw sum enkawltu Erasta leh a unaupa Kuarta pawhin chibai an bûk a che u.

²⁴Kan Lalpa Isua Krista khawngaihna chu in zaa hnênah awm rawh se. Amen.

²⁵Pathian chu i chawimawi ang u; Ani chuan Isua Krista thu, Chanchin Ṭha kan hrilh leh tûn hnua thu ril inthup lo inpuang ta ang hian, in rinnaah nghet takin a dintîr thei che u a ni.

²⁶Tûnah zawng chu thu inthup ṭhîn chu Zâwlneite Lehkhaah a lo lang a, tu pawhin an rina an awih theihna tûrin, chatuan Pathian thupêk anga hnam tin zînga hriattîr a ni ta.

²⁷Pathian awm chhun, finga chu, Isua Krista avângin chatuanin ropui rawh se. Amen.