Read Mizo Lushai KHUAA MITE HNENA TIRHKOH PAULA LEHKHATHAWN ROM 5 Bible Online

KHUAA MITE HNENA TIRHKOH PAULA LEHKHATHAWN ROM 5 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 5

¹Tichuan, rin vânga thiam kan chan tâk avângin, kan Lal Isua Krista zârah Pathian nên inremin kan awm ta.

²Amah avâng vêk chuan tûna kan awmna, khawngaihna hnuaiah hian, rinnain kan lût ta a, Pathian ropuina kan la ṭâwm tûr beiseina avângin kan lâwm bawk a ni.

³Chu bâkah kan hrehawmnaah pawh kan lâwm zêl a ni; hrehawmna chuan chhelna a hring ṭhîn a,

⁴chhelna pawh chuan nghehna a hring a, nghehna chuan beiseina a hring tih kan hre si a.

⁵Chu beiseina chuan min tibeidawng lo va. Thlarau Thianghlim min pêk hmangin kan thinlungah hian Pathian chuan a hmangaihna chu a rawn leih ta si a.

⁶Eng mah ti thei lo kan nih lai khân a hun takah Krista chu mi sualte tân a lo thi ta si a.

⁷Mi fel tâna thih chu tu tân pawh a har hle ang, mi ṭha tân erawh chuan thih ngam an awm mial mahna.

⁸Amaherawhchu, Pathianin min hmangaihzia a lanna chu - mi sual kan nih reng laiin Krista kan tân zu thi a!

⁹A thisen avâng chuan Pathianin thiam min rawn chantîr ta a; thinurna lak ata chu ama zârah min va chhan chhuak dâwn êm!

¹⁰Hmêlma kan nih lai maha a Fapa thihna azâra Pathian nên kan inrem tawh si chuan, Pathian nêna inrema kan awm hnu phei chuan, Krista nunna avângin chhandam kan va ni dâwn tehlul êm!

¹¹Chu chauh chu a ni lo, tûna inremna min petu kan Lalpa Isua Krista zârah chuan Pathianah kan lâwm bawk a ni.

¹²Khawvêlah hian mi pakhat avângin sual a lo lût a, sual avâng chuan thihna a lo awm ta a. Tichuan, khawvêl mihring zawng zawng hi thihna chuan a fan chhuak ta a ni, mi zawng zawngin thil sual an tih avângin.

¹³Dân a awm hma pawhin khawvêlah sual a awm tawh; mahse, Dân a awm loh avângin sual chu suala ngaih a ni lo.

¹⁴Nimahsela, Adama hun aṭanga Mosia hun thlengin, mi zawng zawng chungah Adaman Pathian thupêk awih lova thil sual a tih tâk anga sual ti ve lote chungah pawh thihna chuan thu a nei a. Adama chu lo kal tûra nên tehkhin a ni.

¹⁵Nimahsela, Pathian thilthlâwnpêk chu Adama sual nên chuan inang lo tak a ni - kha mi pakhat sual avâng khân mi tam tak an thi a: Pathian khawngaihna leh mi pakhat, Isua Krista avânga a thilthlâwnpêk chu tam takin an dawng thung a ni.

¹⁶Pathian thilpêk leh mi pakhat sual chu inang lo tak a ni sual pakhat avângin thiam loh channa a lo awm a; amaherawhchu, sual tam tak avângin khawngaiha thiam channa a lo awm ta.

¹⁷Mi pakhat, mi mal sualna avânga khawvêlah hian thihnain ro a rêl ta a nih si chuan, mi pakhat bawk, Isua Krista avângin, Pathian khawngaihna nasa tak leh a thilthlâwnpêk thiam channa dawngtute chuan, nun changin ropui takin ro an rêl ngei ang.

¹⁸Tichuan, mi pakhat sual avângin mi zawng zawng thiam loh chantîr an ni a, chutiang bawkin mi pakhat dik avângin mi zawng zawng thiam changin an nung thei ta a ni.

¹⁹Mi pakhat thu awih lohna avâng khân mi tam tak mi sual an ni ta a, chutiang bawkin mi pakhat thuawihna avângin mi tam tak mi dik an ni ang.

²⁰Sual a lan chian lehzual theih nân Dân a lo awm a; nimahsela, sual a nasat poh leh khawngaihna a nasa lehzual ṭhîn a.

²¹Tichuan, sual chuan thihnain ro a rêl a; kan Lalpa Isua Krista zâra chatuan nun kan neih theih nân Pathian khawngaihna chuan thiam chantîrnain ro a rêl ta a ni.