Read Mizo Lushai KHUAA MITE HNENA TIRHKOH PAULA LEHKHATHAWN ROM 6 Bible Online

KHUAA MITE HNENA TIRHKOH PAULA LEHKHATHAWN ROM 6 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 6

¹Eng nge kan sawi tâk ang le? Khawngaihna chu a pun nasat theih nân kan sual lui zêl dâwn em ni?

²Dâwn suh e, keini sual thihsan tawhte chu sualah engtin nge kan la chên reng theih ang?

³Krista Isuaa baptisma chang apiangte chu a thihnaah baptis-in kan awm zêl tih in hre lâwm ni?

⁴Baptisma kan chanin a hnênah phûmin kan awm ve a, a thihna chu kan ṭâwmpui a ni; chutiang bawkin, Pain mitthi zîng ata ropui taka Krista chu a kaihthawh ang khân, keini pawh nun tharin kan lêng tawh ang.

⁵Keini pawh amah nên inzawma, a thih anga kan thih ve chuan, amah a tho leh ang bawkin amah nêna inzawmin keini pawh kaihthawhin kan awm ve ang.

⁶Sual bawiha kan awm tawh loh nân sual pu taksa hi tihlum tûrin, kan mihring hlui chu a hnênah khenbehin a awm tawh tih kan hre si a.

⁷Thi tawh chu sual lakah a fihlîm a ni.

⁸Tin, Krista hnêna kan thih ve tawh chuan, a hnênah kan nung ve bawk ang tih kan ring a ni.

⁹Krista chu mitthi zîng ata kaihthawhin a awm a, a thi leh dâwn tawh lo tih kan hria, thihna chuan a chungah thu a nei tawh lo.

¹⁰A thihna chu sual lama thih hlen vang vangna a ni a, a nunna chu Pathian hnêna nun hlenna a ni.

¹¹Chutiang bawkin nangni pawh sual lama thi tawhah inngai ula, Krista Isuaah Pathian lama nungah inngai rawh u.

¹²Tichuan, in tisa châkna zawmtîr tûr che uin in taksa thi theiah chuan sual hi lal suh se.

¹³In taksa pêng a enga mah thil ṭha lo tih nân sual hmantîr tawh suh u; mitthi zîng ata nung leh angin Pathian hnênah inhlân ula, in taksa pêngte pawh chu ama hnênah felna hriamhrei atân pe zâwk rawh u.

¹⁴Sual chuan in chungah thu a nei dâwn tawh si lo; Dân thuhnuaia awm lova, khawngaihna thuhnuaia in awm tawh zâwk avângin.

¹⁵Engtin nge ni ta ang le? Dân thuhnuaia awm lova, khawngaihna thuhnuaia kan awm tâk zâwk avângin kan sual zêl dâwn em ni? Sual zêl lul lo ve.

¹⁶Tu hnênah pawh a thu awih tûra in intukluh tawh chuan, a thu in awiha bawih chu in ni - sual bawihah a nih chuan thihna, thuawihna bawihah a nih chuan thiam channa a ni ang tih in hre lo vem ni?

¹⁷Sual bawih in ni tawh a; mahse, an hlan chhâwn che u Chanchin Ṭha zirtîrna thu in dawn chu thinlung takzeta in zawm avângin,

¹⁸sual bawih ata chu tihchhuah in ni a, dikna bawih in lo ni ta. Chuvângin, Pathian hnênah lâwmthu awm rawh se.

¹⁹In taksa chak lohzia hriain, mihring takin thu ka sawi a ni - in taksa pêngte chu tûn hmaa bawlhhlawh leh bawhchhiatna bawihah, bawhchhe tûrin in pe ṭhîn ang khân, tûnah zawng dikna bawihah thianghlima nung tûrin pe thung tawh rawh u.

²⁰Sual bawih in nih lai khân dikna lakah in fihlîm a.

²¹Tûna in zahpui tâk, thil in lo tih ṭhinte kha, in hlâwkpui em? Chûng chuan a tâwpah thihna a thlen si a.

²²Tûnah zawng sual lakah tihfihlîm in ni a. Pathian bawihah in luh tâk avângin chatuan nun chang tûra tihthianghlim in ni ta e.

²³Sual man chu thihna a ni si a; Pathian thilthlâwnpêk erawh chu kan Lalpa Krista Isuaah chuan chatuan nunna a ni.