Read Mizo Lushai KHUAA MITE HNENA TIRHKOH PAULA LEHKHATHAWN ROM 8 Bible Online

KHUAA MITE HNENA TIRHKOH PAULA LEHKHATHAWN ROM 8 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 8

¹Chutichuan, tûnah zawng Krista Isuaa awmte tân chuan, thiam loh chantîrna rêng a awm tawh lo.

²Krista Isuaa nunna Thlarau dân chuan sual leh thihna dân ata chu min tichhuak tawh si a.

³Tisa a chak loh avânga Dânin a tih theih hauh loh chu Pathianin a rawn ti ta; mihring tisa sual ang puin, a Fapa ngei chu sual thawi nân Pathianin a rawn tîr a, tisaa sual awm chu thiam loh a chantîr ta;

⁴tisa dâna awm tawh lo, thlarau dâna awm tawh keimahniah hian Dânin a phût chu hlena a awm theih nân.

⁵Tisa dâna awmte chuan tisa lam thilte an duh a, thlarau dâna awmte erawh chuan Thlarau lam thilte an duh ṭhîn.

⁶Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni.

⁷Tisa duhzâwng chuan Pathian a do va, Pathian Dân a zâwm si lo va, zawm pawh a zâwm thei hek lo:

⁸chuvângin, tisa duhzâwng anga awmte chuan Pathian an tilâwm thei lo.

⁹Pathian Thlarau chu in hnêna a chên chuan tisa mi in ni tawh lo va, Thlarau mi in ni tawh zâwk a ni. Tu pawh Krista Thlarau nei lo chu ama mi an ni lo.

¹⁰Tin, Krista chu nangmahnia a awm chuan in taksa chu sual vânga thi ni mah se, thiam chantîr in nih tawh avângin in thlarau erawh chu a nung a ni.

¹¹Mitthi zîng ata Isua kaithotu Thlarau chu nangmahnia a awm chuan, mitthi zîng ata Krista kaithotu chuan nangmahniah a thlarau chêntîrin, in taksa thi thei chu a tinung ang.

¹²Chuvâng chuan, unaute u, bat kan nei, tisa dâna tisa taka nung tûr chuan a ni lo.

¹³Tisa dâna in awm chuan in thi ngei ang: amaherawhchu, in taksa châk zâwng thil sual tihte Thlarauva in tihhlum chuan in nung ang.

¹⁴Pathian Thlarau hruaia awm apiangte chu Pathian fate an ni e.

¹⁵In Thlarau dawn chu bawih anga hlauva awmtîr leh tûr che u ni lovin, fa-a siam tûr che u Thlarau a ni zâwk e; chuvâng chuan, “Abba, Ka Pa” tiin kan au chhuak ṭhîn a ni.

¹⁶Chu Thlarau ngei chuan keimahni thlarau nên inkawpin, Pathian fate kan nih min hriattîr a.

¹⁷Pathian fate kan nih chuan a roluahtute kan ni, Krista tuarna kan ṭâwmpui si chuan a ropuina pawh kan ṭâwmpui ngei dâwn a ni.

¹⁸Tûna tuarnate hi nakîna kan tân ropuina tihlan tûr nên chuan tehkhin thamah ka ruat si lo.

¹⁹Thil siam zawng zawngte chuan Pathianin a fate a tihlan hun an nghâkhlel êm êm a ni.

²⁰Thil siamte chu anmahni duh vâng ni lovin, a siamtu thu avângin chhiatna tâwk tûra tih an ni; amaherawhchu, beisei tûr a la awm;

²¹thil siamte chuan chhiatna bawih ata tihchhuaha awmin Pathian fate zalênna ropui chu an ṭâwm ve dâwn a ni.

²²Thil siam zawng zawng chu tûn thlengin nau vei rûm angin an rûm tih kan hria.

²³Chu chang a ni lo, keini Thlarau rah hmasa dawngtute ngei pawh hi, a fa-a min siam hun, kan taksa tlanna tûr chu, nghâkhlelin kan rûm a ni.

²⁴Chu beiseina avâng chuan chhandam kan ni si a; amaherawhchu, hmuh tawh reng beiseina chu beiseina a ni lo ve. A hmuh tawh reng chu tu nge la beisei fo?

²⁵Kan hmuh loh chu kan beisei erawh chuan kan nghâk fan fan ṭhîn a ni.

²⁶Chuvângin, Thlarau pawh chuan kan chak lohnaah min pui ṭhîn. Engtia ṭawngṭai tûr nge tih pawh kan hre si lo va. Thlarau chuan rûm sawi hleih theih lohvin min ṭawngṭaisak ṭhîn a ni.

²⁷Mi thinlung enfiahtu Pathian chuan, Thlarau sawi tum chu eng nge ni tih a hria; Thlarau chuan Pathian duhzâwng ang zêlin min ṭawngṭaisak si a.

²⁸Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria;

²⁹a hriat lâwkate chu ama Fapa ang taka awm tûrin a ruat lâwk si a; tichuan, Fapa chu unau tam tak zînga fa u ber a lo ni tawh ang.

³⁰Tin, a ruat lâwkate chu a ko va, a kohvate chu thiam a chantîr a, thiam a chantîrte chu a ropuina a chantîr bawk a.

³¹Chûng thu-ah chuan eng nge kan sawi tâk ang? Pathian kan lama a ṭan chuan tuin nge min do thei ang?

³²Ama Fapa ngei pawh zuah lova, kan zaa tâna petu chuan engkim a thlâwnin min pe tel lo vang em ni?

³³Pathian mi thlante chu tu nge hêk ngam ang? Pathian chu thiam chantîrtu a ni si a.

³⁴Tu-in nge thiam loh chantîr ang? Krista Isuan maw? Ani chu kan tân a thi chauh pawh ni lovin, a tholeh a, Pa Pathian ding lama awmin min sawisaktu a ni a.

³⁵Krista hmangaihna ata chu engin nge min ṭhen thei ang? Hrehawmnain emaw, mangannain emaw, tihduhdahnain emaw, ṭâmin emaw, saruaknain emaw, khandaihin emaw min ṭhen thei dâwn em ni?

³⁶“Nangmah avângin nilêngin thah mai hmabâkin kan awm a, berâm talh tûr anga dah kan ni,” tih ziak ang khân.

³⁷Thei suh e! Chûng zawng zawngah chuan min hmangaihtu avângin ropui taka ngamtu kan ni.

³⁸Eng mahin - thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te,

³⁹sânna te, thûkna te, thil siam dang rêng rêng te pawhin, kan Lalpa Krista Isuaa awm Pathian hmangaihna ata chu min ṭhen thei lo vang tih ka hre chiang a ni.