Read Mizo Lushai KHUAA MITE HNENA TIRHKOH PAULA LEHKHATHAWN ROM 9 Bible Online

KHUAA MITE HNENA TIRHKOH PAULA LEHKHATHAWN ROM 9 - Mizo Lushai bible

KHUAA MITE HNENA TIRHKOH PAULA LEHKHATHAWN ROM 9

¹Kristaah chuan thu dik tak ka sawi a ni; ka daw lo ve: Thlarau Thianghlim zârah ka chhia leh ṭha hriatna pawhin a hre chiang.

²Ka rilru nasa takin a hrehawm a, ka lungngaihna pawh a reh thei lo.

³Ka unaute, tisa lama ka chipuite aiah hian ânchhia dawngin Krista hnên ata tihhran ni ila ka ti hial ṭhîn.

⁴Israel mi an ni a, fa nihna te, ropuina te, thuthlung te, Dân te, rawngbâwl hna te, Pathian thutiam te an chang a.

⁵Thlahtute chu an pute an ni a, tisa lam chhui chuan Krista ngei pawh chu an chipui a ni; engkim chunga awm Pathian chu chatuana fakin awm rawh se. Amen.

⁶Pathian thu chu a thlâwn ta tihna zawng a ni hauh lo; Israela thlah zawng zawng Israel mi an ni vek lo ve.

⁷Abrahama thlah zawng zawng pawh a fate an ni vek hek lo. “Isaka-ah hian i thlahte chhui an ni ang,” Pathianin a tih zâwk kha.

⁸Tichuan, tisa lama a fate chu Pathian fate an ni chuang kher lo, Pathian thutiam avânga a fate erawh chu Abrahama thlah dik taka ngaih an ni.

⁹“Tûn ang hunah hian ka lo kal ang a, Sari chuan fapa a nei ang,” ti-a tiam a nih kha.

¹⁰Chu chang chu a ni hlei nêm: mi pakhat, min thlahtu Isaka lakah Rebeki chuan phîr a pai a,

¹¹naute pian hma, a chhia emaw, a ṭha emaw an tih theih hma khân Pathianin a duhzâwng angin pakhat zâwk a thlang a ni tih a lang:

¹²thiltih avâng ni lovin, a kotu duhzâwng avâng zâwkin Rebeki hnênah, “A upa zâwkin a naupang zâwk rawng a bâwl ang,” a tih kha.

¹³“Jakoba ka hmangaih a, Esauva erawh chu ka hua,” tih ziak a ni bawk.

¹⁴Chuti a nih si chuan eng nge kan sawi tâk ang? Pathianah dik lohna a awm em ni? Awm lo ve.

¹⁵Ani chuan, “Ka khawngaih apiang chu ka khawngaih ang a, zah ka ngaihna chung apiangah zah ka ngai ang,” tia Mosia hnêna a sawi kha.

¹⁶Chuvângin, mihring duh thu emaw, thiltih emaw ni lovin, Pathian khawngaihnaah a innghat zâwk a ni.

¹⁷Lehkha Thu-in Farawa hnênah, “He mi avâng ngawt hian ka tungding che a ni, nangmaha ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a.

¹⁸Tichuan, Pathian chuan a duh apiang a khawngaih ṭhîn a, a duh apiang pawh a tiluhlul ṭhîn a ni.

¹⁹“Chuti chu Pathianin engati nge mi a la dem cheu vang? A duhzâwng chu tu nge dodâl thei awm?” in ti a ni thei e.

²⁰Aw mihring, Pathian hnial veitu chu tu nge maw i nih le? Thilsiam chuan a siamtu hnênah, “Engati nge hetianga mi siam?” a ti ang em ni.

²¹Bellei tlang khat aṭangin bêl hlu deuh te, hlu lo deuh te siam tûrin bêlvawtu chuan bellei chungah thu a nei lo vem ni?

²²Chutiang chuan Pathianin a ti ṭhîn; a thinur leh a thiltihtheihna chu lantîr duh mah se, a thinurna dawngtu bêl, tihboral mai tûrte chu a dawh hrâm hrâm a;

²³tin, a khawngaihna bêl, a ropuina chang tûra a buatsaih keiniho hnênah hian ropuina nasa tak a rawn tilang thung a ni.

²⁴Juda-te zîng ata chauh ni lovin, Jentail-te zîng ata a koh chhuahte hi chutiang bêlte chu kan ni.

²⁵Hosea lehkhabuah hetianga a sawi kha: “Ka mi ni ngai lote chu ‘Ka mite,’ ka ti ang a, Hmangaihngailohvi chu ‘Hmangaihi,’ ka ti ang.

²⁶‘Ka mite in ni lo ve,’ an tihna hmunah ngei chuan Pathian nung fate vuah in ni ang,” tiin.

²⁷Isaia pawh khân Israel mite thu aupuiin, “Israel mite chu tuifinriat ṭiau zâtin tam mah sela, a bâng tlêm tê chauh chhandam an ni ang.

²⁸Lalpa chuan lei chunga a rorêlna tûr chu a hlen thuai dawn si,” a tih kha.

²⁹Isaia vêkin, “Engkim LALPA chuan a chi thlah min lo zuahsak suh sela chuan, Sodom khua ang kan ni tawh ang a, Gomora khua ang mai kan ni tawh ang,” tia a lo sawi lâwk ang khân.

³⁰Eng nge kan sawi tâk ang le? Jentail thiam chan tum lêm lote chu thiam chantîr an lo ni ta, rinna avânga thiam chantîrna chu.

³¹Dân zâwma thiam chan tum Israel-te zâwk chuan Dân ang chuan thiam an chang zo ta lo.

³²Eng vâng nge ni? Rinna lova thiltiha hmuh an tum vâng a ni a, Tlûkna lungah chuan an tlu ta a ni.

³³“Ngai teh, Zion-ah chuan inchhuiha tlûkna lung, Insuta tlûkna lungpui ka dah a, Tu pawh amah ring apiang chu An mualpho lo vang,” tih ziak ang khân.