Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 1 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 1 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 1

¹Paula, Krista Isua tirhkoh ni tûra Pathian duhzâwng anga koh leh, kan unaupa Sosthena chuan,

²Korinth khuaa Pathian kohhran awm, mi thianghlim ni tûra koh, Krista Isuaa tihthianghlim leh hmun tina kan Lalpa Isua Krista, (anni leh keini Lalpa) hming lam zawng zawng chibai kan bûk e.

³Pathian kan Pa leh Lalpa Isua Krista hnên ata khawngaihna leh remna in hnênah awm rawh se.

⁴Pathianin Krista Isuaa khawngaihna a pêk che u avâng hian in chungthu-ah ka Pathian hnênah eng lai pawhin lâwmthu ka sawi ṭhîn.

⁵Amahah chuan kawng tinrêngin tihhausak in ni a, thu-ah leh hriatna tinrêngah in ṭhang zêl a,

⁶Krista thu kan hril khân nangmahniah zung a kai nghet ta a;

⁷tichuan, kan Lalpa Isua Krista lo lan in nghah chhûng hian thlarau lam thilpêk eng mah in tlachham lo va.

⁸Kan Lalpa Isua Krista nia sawisêlbova awm tûrin a tâwp thlengin a tinghet ang che u.

⁹A Fapa, kan Lalpa Isua Krista pâwlnaa ko lûttu che u Pathian chu a rinawm a ni.

¹⁰Unaute u, kan Lalpa Isua Krista hmingin ka ngên a che u, in zîngah inṭhenna awm lovin thukhat vua ula, rilru thuhmun leh ngaih dân hmun khat neiin awm khâwm rawh u.

¹¹Ka unaute u, in zîngah inngeih lohna a awm tih Kloii chhûngten mi rawn hrilh a.

¹²Chu chu ka han sawi ang e: “Kei Paula pâwl ka ni, kei Apolova pâwl ka ni, kei Kifa pâwl ka ni, kei Krista pâwl ka ni,” mi tinin in tih hi.

¹³Krista chu ṭhenin a awm em ni? In tân Paula chu khenbeh a ni em ni? A nih loh leh Paula hmingin baptisma in chang em ni?

¹⁴Krispa leh Gaia lo chu in zîngah tu mah ka baptis loh avângin ka lâwm a ni.

¹⁵Tuten emaw ka hminga baptisma chang angin an sawi dah ang che u.

¹⁶Stefana chhûngte pawh ka baptis tak e. Chûng mite tih loh chu mi dang ka baptis emaw ka hre lo.

¹⁷Krista chuan baptis tûrin mi tîr lo va, Chanchin Ṭha hril tûrin mi tîr zâwk a ni si a. Thufing hmanga hril tûrin mi tîr lo, chutilo chu Krista kraws hi engmah lovah an ngai dah ang e.

¹⁸Kraws thu chu boral mêkte tân chuan thu âtthlâk a ni, keini chhandam mêkte tân erawh chuan Pathian thiltihtheihna a ni.

¹⁹‘Mi fing finna ka tiboral ang a, Mi thiam thiamna chu ka hnâwl bâwk ang,’ tia ziak a ni.

²⁰Mi fing chu khawiah nge? Dân hremi chu khawiah nge? Tûnlai thila hnial thiam chu khawiah nge? Pathianin khawvêl finna hi thil âtthlâkah a siam ta a ni lâwm ni?

²¹Pathian finna chu hei hi a ni, khawvêlin finna hmanga Pathian an hriat theih loh hnuin, kan thu hril âtthlâk hmanga ringtute chhandam hi: chu chu Pathian lâwmzâwng tak a ni si a.

²²Juda-te chuan chhinchhiahna thil mak an phût kher a. Grik-te lahin finna ngawt an zawng a;

²³Keini erawh chuan Krista khenbeh thu kan hril a ni, chu chu Juda-te tân chuan dâltu a ni a, Jentail-te tân thil âtthlâk a ni.

²⁴Nimahsela, Juda pawh ni se, Grik pawh ni se, kohte tân chuan Krista chu Pathian finna leh thiltihtheihna a ni.

²⁵Pathian âtna chu mihring finna aiin a fing zâwk a, a chak lohna pawh mihring chakna aiin a chak zâwk si a.

²⁶Unaute u, a koh dân che u hi ngaihtuah teh u, in zînga tam tak hi tisa lama mi fing in ni lo va, mi thiltithei tak pawh in ni lo va, mi ropui chhûng zînga mi pawh in ni hek lo.

²⁷Nimahsela, Pathian chuan khawvêl mite ngaiha thil âte chu mi fingte tihmualpho nân a thlang a, khawvêla thil chak lote chu thil chakte tihmualpho nân a thlang bawk a;

²⁸tin, thil awm sate paihthlâk nân khawvêl thil mâwl leh hmusitawmte, thil awm lote nên lam Pathianin a thlang a.

²⁹Chuvângin, Pathian hmaah chuan tu mah inchhuang thei an awm lo vang.

³⁰Nangni zawng, Pathian zârah, Krista Isuaah chuan in awm ta a; ani chu Pathian hnên ata kan tân finna te, thiam chantîrna te, tihthianghlimna te leh tlanna te a lo ni ta a;

³¹tichuan, an ziak angin, “Chhuan tûr duh chuan Lalpa chu chhuang rawh se.”