Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 11 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 11 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 11

¹Keiin Krista ka entawn ang hian nangni pawhin mi entawn ve rawh u.

²Engkimah mi hriat reng ṭhin avâng leh pawm zêl tûr thu ka hrilh che u ang taka in awm avângin ka fak a che u.

³Hei hi in hriat ka duh: Mipa tawh phawt lu chu Krista a ni a, hmeichhe lu chu mipa a ni a, Krista lu chu Pathian a ni.

⁴Mipa, lukhum khum chunga ṭawngṭai emaw, thu hril emaw apiang chuan an lu an timualpho a ni;

⁵hmeichhia, lukhum khum lova ṭawngṭai emaw, thu hril emaw apiang pawhin an lu an timualpho a ni, chutiang chu meh kâwn nên thuhmun reng a ni.

⁶Hmeichhiain lukhum a khum duh loh chuan mêt law law rawh se. Amaherawhchu, hmeichhe tân lu meh leh ziah kâwn a zahthlâk si chuan lukhum khum rawh se.

⁷Mipa erawh chu Pathian anpui leh ropuina tilangtu a nih avângin lukhum khum tûr a ni lo; hmeichhia erawh chu mipa ropuina tilangtu a ni.

⁸Mipa hi hmeichhia aṭanga siam a ni lo va, hmeichhia erawh chu mipa aṭanga siam a ni.

⁹Mipa hi hmeichhe tâna siam a ni lo va, hmeichhia erawh chu mipa tâna siam a ni.

¹⁰Tichuan, vântirhkohte avângin hmeichhiain an lu-ah mipa thuneih chhinchhiahna an khum tûr a ni.

¹¹Nimahsela, Lalpaah chuan hmeichhia hi mipa tel lo chuan an awm thei lo va, mipa pawh hmeichhe tel lovin an awm thei hek lo.

¹²Hmeichhia hi mipa aṭanga siam a ni ang bawkin, mipa hi hmeichhe laka piang a ni si a; nimahsela, engkim hi Pathian aṭanga chhuak vek a ni.

¹³Ngaihtuah teh mah u, hmeichhia lukhum khum lova Pathian hnêna ṭawngṭai chu a âwm rêng rêng em ni?

¹⁴Mipain sam sei a neih chuan a tân thil zahthlâk a ni tih in rilru pianpui pawhin in hre lâwm ni?

¹⁵Hmeichhiain sam sei a neih erawh chuan amah chawimawitu a ni, a sam chu amah khuh nân pêk a ni si a.

¹⁶Eng pawh ni sela, hei hi in hnial a nih pawhin, keinin emaw, Pathian kohhranten emaw chutiang kawngah dân kan nei lo ve.

¹⁷He zirtîrna zawm thu-ah erawh hi chuan ka fak thei lo va che u, in inkhâwm hi ṭhatpui ahnêkin in chhiat phah zâwk si a.

¹⁸A hmasa berin, Kohhranho in inkhâwmnaah inṭhenna a awm ṭhîn tih ka lo hria a, rin pawh ka ring deuh bawk a ni.

¹⁹In zînga mi dik takte an lan chian theih nân, ngaih dân hrang nei an awm chu a âwm rêng a ni.

²⁰Hei vâng hian in inkhâwmna chu Lalpa Zanriah kîlna chi a ni lo;

²¹mi tinin mahni zanriah tûr in rawn keng a, mahniin in ei a, ṭhenkhat an ril a ṭâm a, ṭhenkhat an rui a.

²²Chutianga ei leh inna tûr mahni in in nei ṭheuh a ni lâwm ni? A nih leh, Pathian Kohhran hmusitin nei lote chu tihzah in tum em ni? Eng nge ka sawi tâk ang? Ka fak dâwn che u em ni? He thu-ah hi zawng ka fak thei lo va che u.

²³Ka thu hrilh chhâwn che u hi, Lalpa hnên ata ka dawn asin; khatia, mantîra a awm zâna, Lalpa Isuan chhang a lâka, lâwmthu a sawi zawha, a phela,

²⁴“Hei hi ka taksa a ni, in tân a ni e, mi hriat reng nân heti hian ti ṭhîn rawh u,” a tih kha.

²⁵Chutiang bawkin, an ei zawhah, no pawh chu a la a, “He no hi ka thisena thuthlung thar chu a ni, in in apiangin mi hriat reng nân ti ṭhîn rawh u,” a tih kha.

²⁶Chu chhang chu in eia, no chu in in apiangin, a lo kal leh hma loh zawng, Lalpa thihna chu in puang ṭhîn a ni.

²⁷Chuvângin, tu pawh tlâk lo chunga Lalpa chhang hi eia, a no hi in apiang chuan Lalpa taksa leh thisenah thiam loh an chang ang.

²⁸Tichuan, mi tin mahni infiah ṭheuh sela, chutiangin chhang chu eiin no chu in rawh se.

²⁹A ei leh intu chuan Lalpa taksa awmzia a hriat loh chuan mahni chunga rorêlna thlen tûrin a eiin a in a ni.

³⁰Hemi avâng hian in zînga tam tak in chak lovin in bawrhsâwm a, in muhîl a ni.

³¹Mahni inenfiah hmasa ṭhîn ila chuan rorêlsakin kan awm lo tûr.

³²Rorêlsaka kan awm pawhin, khawvêl mite nên thiam loh kan chan ve loh nân Lalpan min thunun ṭhîn a ni.

³³Chutichuan, ka unaute u, Lalpa Zanriah kîl tûra in inkhâwmin innghâk ṭhîn rawh u.

³⁴Rilṭâm an awm chuan inah ei zet rawh se; tichuan, in inkhâwm chu thiam loh in chan phah dâwn lo nia. Thil dang erawh chu ka lo kal hunah ka rawn tifel ang.