Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 12 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 12 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 12

¹Unaute u, Thlarau lam thilpêk thu hi in hriat loh ka duh lo ve.

²Jentail mi in nih lai khân milem ṭawng thei hlei lo lamah an hruai bo ṭhîn che u tih in hria e.

³Chuvângin, hei hi ka hriattîr a che u: Pathian Thlarauvah chuan tu mahin, “Isua chu ânchhe dawngin awm rawh se,” an ti thei lo va, Thlarau Thianghlimah lo chuan, “Isua chu Lalpa,” an ti thei bawk hek lo.

⁴Tin, thilpêk chi hrang hrang a awm a, chûng chu Thlarau pakhata mi a ni.

⁵Rawngbâwlna chi hrang hrang pawh a awm a, Lalpa pakhat tân a ni;

⁶thiltihtheihna pawh chi hrang hrang a awm a, Pathian pakhat hnêna mi a ni, mi tin hnêna thiltihtheihna pe ṭhîntu chu.

⁷Sâwt tlânna tûrin mi tin hnênah Thlarau inhriattîrna chu a lo thleng ṭheuh va.

⁸Thlarau zârah mi ṭhenkhat hnênah thu fing sawi theihna pêk a ni a, mi dang hnênah chu Thlarau vêkah chuan thu hriat theihna pêk a ni a;

⁹mi dang hnênah chu Thlarauvah bawk chuan rinna pêk a ni a, chu Thlarau vêkah chuan mi dang hnênah tihdam theihna pêk a ni a,

¹⁰mi dang hnênah thil mak tih theihna pêk a ni a, mi dang hnênah thu hril theihna pêk a ni a, mi dang hnênah Thlarau dik leh dik lo hriat theihna pêk a ni a, mi dang hnênah ṭawnghriatloh chi hrang hrang pêk a ni a, mi dang hnênah ṭawnghriatloh hrilh fiah theihna pêk a ni.

¹¹Hêng zawng zawng hi Thlarau pakhat hnathawh vek a ni a, a duh ang takin mi tin hnênah thilpêk chi hrang hrang a pe a ni.

¹²Taksa hi pakhat a ni a, pêng tam tak a nei a; taksa pêng zawng zawng chu tam hle mah se, taksa pakhat a ni ang hian, Krista pawh chutiang chu a ni.

¹³Kan za-in Juda kan ni emaw, Grik kan ni emaw, bawih kan ni emaw, ni lo emaw, pumkhata awm tûrin Thlarau pakhata baptis kan ni a, Thlarau pakhat min intîr ṭheuh bawk a ni.

¹⁴Taksa hi pêng khat chauh ni lovin, pêng tam tak a ni zâwk a.

¹⁵Ke hian, “Kut ka nih loh avângin taksaa tel ka ni lo ve,” ti ta sela, chumi avâng chuan taksaa tel lo a ni chuang lo.

¹⁶Beng hian, “Mit ka nih loh avângin taksaa tel ka ni lo ve,” ti ta sela, chumi avâng chuan taksaa tel lo a ni chuang lo.

¹⁷Taksa pum pui hi mit ni ta vek sela, engtin nge ri kan hriat ang? Beng ni ta vek sela, engtin nge rim kan hriat ang?

¹⁸Pathianin pêng hrang hrang hi taksaah hian ṭûl a tihna apiangah a dah a ni.

¹⁹An vaiin pêng khat chauh ni ta sela, taksa a awm thei dâwn em ni?

²⁰Pêng hrang hrang tam tak awm mah se, taksa chu pumkhat a ni.

²¹Tichuan, mit hian kut hnênah, “Ka mamawh lo va che,” a ti thei lo; lu pawhin ke hnênah, “Ka mamawh lo va che,” a ti thei hek lo.

²²Taksa pêng chak lo zâwka langte hi an pawimawh zâwk a ni.

²³Kan taksa pêng hmuhsitawm deuhva kan ngaihte hi, chûng ngei chu kan ngai pawimawh a, nasa takin kan chei ṭhîn a, a lang mawi lote chu kan cheimawi zâwk ṭhîn a ni.

²⁴Kan pêng mawi zâwkte chu chei pawh a ngai hlei nêm. Pathianin taksa hi a rem khâwm a, sitawm deuhte chu a chawimawi zâwk a,

²⁵taksaah inhranna a awm lohva, a pêng hrang hrangte an inngaihtuah tawn theih nân a rem khâwm a ni.

²⁶Pêng pakhatin a tuar chuan pêng zawng zawngin an tuar ve vek a, pêng pakhat chawimawi a nih chuan pêng zawng zawng pawh an lâwm ve vek a ni.

²⁷Nangniho hi Krista taksa chu in ni a, a pêngte in ni ṭheuh bawk a ni.

²⁸Pathianin a kohhranah hêng mite hi a dah a: a pakhatnaah Tirhkohte, a pahnihnaah Zâwlneite, pathumnaah Zirtîrtute, a dawtah thil mak ti theite, a dawt lehah tihdamna thilpêk neite, mi ṭanpui peihte, rorêl thiamte, ṭawnghriatloh chi hrang hrang neite.

²⁹An za-in tirhkoh an ni vek em ni? An za-in zâwlnei an ni vek em ni? An za-in zirtîrtu an ni vek em ni? An za-in thil mak an ti thei vek em ni?

³⁰Tihdam theihna thilpêk an dawng vek lo va, ṭawnghriatlohvin an ṭawng vek lo va, a hrilh fiah theihna an dawng vek hek lo.

³¹Thlarau thilpêk pawimawh zâwkte chu dawn châk hle rawh u. Kawng ṭha ber ka han entîr ang che u.