Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 14 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 14 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 14

¹Hmangaihna hi ûm zêl rawh u; thlarau lam thilpêkte chu dawn châk zêl bawk ula, thu hril theihna neih phei chu châk lehzual rawh u.

²Ṭawnghriatlohva thu sawitu chuan mi dang hnêna sawi lovin Pathian hnêna sawi a ni a, tu man a thu sawi awmzia an hre thei lo, Thlarauvah thurûk a sawi a ni.

³Thuhriltu erawh chuan mite hnênah thu a sawi a, a tisâwt a, a fuih a, a thlamuan ṭhîn.

⁴Ṭawnghriatlohva thu sawitu chuan ama tâna sâwt tûr a sawi ṭhîn a, thuhriltu erawh chuan kohhran tâna sâwt tûr a sawi ṭhîn.

⁵Ṭawnghriatloh nei vek ula ka ti hle, thu hril theihna phei chu nei vek ula ka ti lehzual a ni. Kohhran hlâwkpui tûra hrilh fiahsaktu an awm si loh chuan ṭawnghriatloh neite ai chuan thuhrilna neite chu an ṭangkai zâwk a ni.

⁶Unaute u, tûnah in hnênah lo kal ila, ṭawnghriatlohvin thu rawn sawi ta ila, thu ka puang emaw, ka hriattîr che u emaw, ka hril emaw, ka zirtîr che u emaw a nih si loh chuan in tân a hlâwk dâwn em ni?

⁷Ri thei, nunna nei lo, hêng phênglâwng leh ṭingṭangte pawh hi awmze nei lova an tum chuan eng hla nge an sak tu nge hre thei ang?

⁸Tawtawrâwt pawh mumal neia an ham loh chuan tu nge râl do tûrin insiam ang?

⁹Chutiang bawkin ṭawnghriatlohva in thu sawi chu hriat mai theih a nih si loh chuan tu nge hrethiam ang? Ṭawng mai mai in ni ang asin.

¹⁰Khawvêlah hian ṭawng chi hrang hrang a tam hle a ni thei e, awmze nei lo pakhat mah a awm lo.

¹¹A thu sawi awmzia ka hriat si loh chuan ani chu ka tân ram dang mi ang a ni dâwn a, kei pawh a tân ram dang mi ka ni bawk ang.

¹²Tichuan, thlarau thilpêk dawn châk zêl ula, Kohhran tihphuisuina tûr thlarau thilpek in ngah theih nân zawng rawh u.

¹³Chuvangin, ṭawnghriatloh neite chuan a hrilh fiah theihna dîl rawh se.

¹⁴Ṭawnghriatlohva ka ṭawngṭai chuan ka thlarau chu a ṭawngṭai ngei na a, ka ngaihtuahna erawh chu ka hmang lo.

¹⁵Engtin nge ni ta ang le? Thlarauvin ka ṭawngṭai ang a, ngaihtuahna hmangin ka ṭawngṭai bawk ang. Fakna hla pawh thlarauvin ka sa ang a, ngaihtuahna hmangin ka sa bawk ang.

¹⁶Thlarauvin lâwmthu sawi ta ila, ringlote ṭhutnaa ṭhute chuan i thu sawi awmzia an hre dâwn si lo va, engtin nge i lâwmthu sawiah ‘Amen,’ an tih theih ang?

¹⁷I lâwmthu sawi ṭawngṭaina chu a ṭha hle a ni thei e; mahse, mi dang a tisâwt si lo.

¹⁸Nangni aia ṭawnghriatloh ka hman tam zâwk avângin Pathian chungah ka lâwm hle a ni;

¹⁹mahse, Kohhran inkhâwmnaah chuan mi dang zirtîr nân ṭawnghriatlohva thu sîngkhat sawi aiin ngaihtuahna hmanga thu panga lek sawi ka duh zâwk.

²⁰Unaute u, naupang takin thil ngaihtuah suh u; sual lamah chuan nausên ang ni ula, ngaihtuahnaah erawh chuan puitling takin awm rawh u:

²¹“ ‘Ṭawnghriatloh hmang mite hmuiin He mite hnênah hian thu ka sawi ang a, Chuti pawhin an ngaithla lo vang,’ Lalpan a ti,” tiin Lehkha Thu-ah te ziak a ni.

²²Chutichuan, ṭawnghriatloh hi ringlo mite tân chhinchhiahna a ni a, ringtute tân zawng a ni ve lo; chutiang bawkin thu hril hi ringtute tân chhinchhiahna a ni a, ringlote tân zawng a ni ve lo.

²³Kohhran pum pui inkhâwmnaah in vaiin ṭawnghriatlohvin thu lo sawi ta ula, la hre lote emaw, ringlo emaw lo lut ta sela, in â ta emaw an ti dâwn lâwm ni?

²⁴In za-in thu lo hril ta ula chu, ringlo emaw, hre lo emaw lo lût ve te chu in thu chuan a khawih ang a, an sualzia a hriattîr ang.

²⁵An thinlunga thurûkte chu tihlan a ni ang a, Pathian chibai bûkin an bawkkhup ang a, “In zîngah Pathian a lo awm takzet a ni,” tiin an puang zâwk ang.

²⁶Unaute u, inkhâwmnaah hla nei te, zirtîrna nei te, thu puan tûr nei te, ṭawnghriatlohva ṭawng ṭûl te, hrilhfiahna nei te in awm si chuan engtia tih tûr nge ni ang? Kohhran siam ṭha zâwnga tih tûr a ni.

²⁷Ṭawnghriatlohva thu in sawiin mi pahnih pathum bâkin thu sawi suh se, a indawtin sawi sela, pakhatin hrilh fiah rawh u,

²⁸hrilhfiahtu an awm loh chuan inkhâwmnaah chuan ngawi mai sela, a fâlin Pathian hnênah sawi rawh se.

²⁹Thu hril pawh pahnih pathum chauhvin hril sela, mi dangin chîk takin lo ngaithla rawh se.

³⁰A ngaithlatute zîngah thu puan tûr nei an awm chuan a sawi hmasatu chu ngawi rawh se.

³¹A indawtin thu hril ṭhîn ula; tichuan, mi tinin zir tûr in nei thei ang a, mi tin in thlamuan thei ang.

³²Thuhriltute thuhril theihna thlarau chu an thuhnuaiah a awm a ni;

³³Pathian chu buaina Pathian a ni lo va, remna Pathian a ni zâwk. Kohhran tina Pathian mi thianghlimte tih dân angin,

³⁴Kohhran inkhâwmnaah hmeichhiate chu ngawi reng rawh se, thu an sawi ve phal a ni lo ve. Dân buin a sawi angin thu an zâwm zâwk tûr a ni.

³⁵Thil hriat duh an neih chuan in lamah an pasalte zâwt rawh se. Hmeichhe tân Pathian kohhran inkhâwmnaa thu sawi hi a zahthlâk si a.

³⁶Pathian thu hi nangmahni aṭanga chhuak em ni? A nih leh, in hnênah chauh em ni a lo thlen?

³⁷Tu pawhin zâwlnei emaw, thlarau mi emaw nia an inngaih chuan in hnêna ka lehkha hi Lalpa thupêk a ni tih lo hre rawh se.

³⁸Tu pawhin an pawisak loh chuan ngaihsak suh u.

³⁹Chutichuan, ka unaute u, thu hril hi châk hle ula, ṭawnghriatlohva thu sawi pawh khap suh u.

⁴⁰Amaherawhchu, engkim fel tak leh awmze nei taka tih tûr a ni.