Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 15 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 15 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 15

¹Unaute u, in hnêna Chanchin Ṭha ka rawn hril in lo pawm a, in innghah tâkna kha ka hriattîr leh che u a ni.

²Chanchin Ṭha ka hrilh che u ngei kha in pawm reng chuan chhandam in ni ang a, in pawm reng loh chuan in rinna chu a thlâwn a ni ang.

³Hêng hi ka thu dawn pawimawh ber ka hrilh chhâwn che u kha a ni; Krista chu Lehkha Thu ang zêlin kan sualte avângin a thi a,

⁴phûmin a awm a, Lehkha Thu angin ni thum ni-ah kaihthawh a ni a;

⁵Petera hnênah a inlâr a, Sâwmpahnihte hnênah pawh a inlâr a;

⁶chumi hnuah, ṭum khatah, unau zanga aia tam hnênah a inlâr leh a, chûng zînga a tam zâwk chu an la dam a, ṭhenkhat erawh chu an muhîl ta.

⁷Jakoba hnênah a inlâr leh a, chumi hnuah chuan tirhkoh zawng zawng hnênah a inlâr leh bawk a.

⁸A tâwp berah chuan, kei, a hun lova piang ang mai hnênah pawh a rawn inlâr a.

⁹Kei zawng, tirhkoh zînga tê ber ka ni, Pathian kohhran ka tihduhdah avângin tirhkohva vuah tlâk pawh ka ni lo.

¹⁰Nimahsela, Pathian khawngaihna avângin ka nih nih ka ni ta. A khawngaihna mi pêk hi a thlâwnin a awm lo ve, tirhkoh dangte aiin ka thawk nasa zâwk asin; nimahsela, keia thawh a ni lo va, ka hnêna awm Pathian khawngaihna thawh a ni zâwk.

¹¹Tichuan, kei pawhin, anni pawhin khati khân kan hril ṭhîn a, nangni pawhin chu ngei chu in ring ta a.

¹²Krista chu mitthi zîng ata kaih thawh a nih thu kan hril a, in zînga ṭhenkhatin engati nge mitthi thawhlehna a awm lo in tih theih?

¹³Mitthi thawhlehna a awm si loh chuan Krista pawh kha kaihthawh a ni lo vang.

¹⁴Krista kha kaihthawh a nih si loh chuan kan thu hril hi dâwt a ni ang a, dâwt ring lek in ni bawk ang.

¹⁵Pathianin Krista chu mitthi zîng ata a kaitho tih kan hril a, mitthi thawhlehna a awm si loh chuan Krista pawh kaihthawh a ni lo vang a, Pathian chungchâng thu-ah dâwt kan sawi a ni bawk ang.

¹⁶Mitthite kaihthawh an nih loh chuan, Krista pawh kha kaihthawh a ni bîk lo vang.

¹⁷Krista chu kaihthawh a nih si loh chuan in rinna hi eng mah a ni lo va, in sualnaah in la awm reng a ni ang.

¹⁸Chuti a nih chuan Kristaa muhîl tate pawh kha an boral ta a ni ang.

¹⁹Kristaa beisei kan neih hi tûn dam chhûng atân chauh ni ta se, mi zawng zawnga khawngaihthlâk ber kan ni ang.

²⁰Mahse, Krista chu mitthi zîng ata kaihthawh a ni takzet a ni, mitthite thawh hmahruaitu a ni.

²¹Mihring avângin thihna a lo awm a, mihring avâng vêkin thawhlehna pawh a lo awm a ni.

²²Adama-ah mi zawng zawng an thi ang khân, Kristaah mi zawng zawng tihnun leh an ni dâwn.

²³Amaherawhchu, mahni hun ṭheuhvah a ni ang. Thawh hmahruaitu Krista chu a tho hmasa a, a dawtah, a lo kal leh hunah, ama mite.

²⁴Chumi zawhah tâwpna chu a lo thleng ang. Rorêlna te, thuneihna te, thiltihtheihna zawng zawng te a tihbo hunah Pa, Pathian hnên ngeiah Ram chu a hlân ang.

²⁵Pathianin hmêlma zawng zawng a hneha, a ke hnuaia a dah vek hma chu Krista chuan ro a rêl dâwn si a.

²⁶Hmêlma hnuhnûng ber tihbova awm tûr chu thihna hi a ni.

²⁷Pathianin, “Engkim a ke hnuaiah a dah,” tih a ni. Heta, ‘engkim’ tihah hian, Krista ke hnuaia engkim dahtu Pathian chu a tel ve lo tih a lang chiang a.

²⁸A hnuaia engkim dah a nih hnuah, amah, Fapa ngei chu, a hnuaia engkim dahtu Pathian hnuaiah dah a ni ang a; Pathian chu engkima chungnung ber a ni tawh ang.

²⁹A nih leh, thawhlehna hi awm lo ni se, engah nge mitthi puala baptisma an chan ang? Mitthite kaihthawh an nih dâwn si loh chuan engati nge an puala baptisma an chan ṭhin?

³⁰Eng vângin nge keini pawh hi dârkâr tin thih hlauhthâwnawma kan awm?

³¹Unaute u, kan Lalpa Krista Isuaa ka chhuan êm che u avângin, ni tin thihna ka hmachhawn tih ka hrilh che u a nih hi.

³²Mihring tih dân angin Efesi khuaa sakawlhte kha sual ka nih chuan ka tân eng nge sâwt ang? Mitthite kaihthawh an nih dâwn loh chuan, “I eiin i in ang, natûkah kan thi mai dâwn si a,” an tih ang hian i awm ve mai ang u hmiang.

³³Hruai bovin awm suh u, “Ṭhian sualin nungchang ṭha an tikhawlo ṭhîn,” tih a ni.

³⁴Harh fîm ula, thil sual ti tawh suh u. Ṭhenkhat chuan Pathian hriatna rêng in neih loh hi, hei hi in zahna tûrin ka sawi a ni.

³⁵‘Engtin nge mitthite chu kaihthawh an nih ang? Eng ang taksa nge an put ang?’ tiin in zâwt a ni thei e.

³⁶Chu chu zawhna âtthlâk tak a ni. Leia chi in tuh pawh hi a thih zet loh chuan a ṭo ngai hlei nêm.

³⁷Buh chi emaw, thil dang chi emaw in tuh a ni thei e, in chi tuh chu a kûng lo la awm tûr chu a ni lo va, a fang mai a la ni.

³⁸Pathianin a duh angin kûng a siamsak a, thlai chi hrang hrangin kûng chi hrang hrang an nei a ni.

³⁹Tisa zawng zawng hi tisa chi khat a ni hek lo, mihring tisa a dang a, ran tisa a dang a, sava tisa a dang a, sangha tisa pawh a dang a ni.

⁴⁰Vân taksa a awm a, lei taksa pawh a awm bawk a; vân taksa ropui dân leh lei taksa ropui dân pawh a inang lo.

⁴¹Ni hian ama ropuina a nei a, thlain ropuina hran a nei a, arsi pawhin ropuina hrang a nei, arsi hrang hrang ropui dân pawh a inang lo.

⁴²Mitthi thawhlehna pawh chutiang bawk chu a ni ang. Ṭawih thei kha phûm a ni a, ṭawih thei lova kaihthawh a ni ang a,

⁴³hmuhsitawm tak kha phûm a ni a, ropui taka kaihthawh a ni ang; chak lo tak kha phûm a ni a, thiltithei taka kaihthawh a ni ang.

⁴⁴Kan phûm kha mihring lam taksa a ni a, kaihthawha awm tûr chu thlarau lam taksa a ni. Mihring lam taksa a awm chuan thlarau lam taksa pawh a awm ang.

⁴⁵Lehkha Thu chuan, “Mihring hmasa ber Adama chu mi nung a lo ni ta a,” a ti a; Adama hnuhnûng ber chu nunna petu Thlarau a ni.

⁴⁶Thlarau lam a hmasa lo va, mihring lam a awm hmasa a, chumi hnuah thlarau lam a lo awm chauh a ni.

⁴⁷Mihring hmasa chu leia siam, leia mi a ni a, mihring pahnihna chu vâna mi a ni.

⁴⁸Leia siamte chu leia siama ang kha an ni a, vâna mite erawh chu vâna mi ang kha an ni.

⁴⁹Leia siama ang kha kan nih angin vâna mi ang kha kan la ni ang.

⁵⁰Unaute u, tisa leh thisen hian Pathian ram chu a luah thei lo va, ṭawih thei hian ṭawih thei lo chu a luah dâwn lo tih ka sawi a ni.

⁵¹Thu ril ka hrilh dâwn che u hi: Kan za-in kan muhîl vek lo vang a; nimahsela, tawtawrâwt hnuhnûng ber rîk hunah chuan thâwklehkhatah, mitkhapkâr lovah tihdanglam kan ni vek ang. Tawtawrâwt chu a lo rîk hun chuan mitthite chu ṭawih thei lova kaihthawh an ni ang a, keini pawh tihdanglam kan ni ang.

⁵²

⁵³Ṭawih thei hi ṭawih thei lovah a chang ang a, thi thei hi thi thei lovah a chang tûr a ni.

⁵⁴Chutianga ṭawih thei hi ṭawih thei lova a chana, thi thei hi thi thei lova a chan hunah chuan he Lehkha Thu: “Thihna chu hnehnain a lem zo ta.

⁵⁵Aw thihna, khaw nge i hnehna chu? Aw thihna, khawiah nge i tûr chu?” tih hi a lo thleng tawh ang.

⁵⁶Thihna tûr chu sual hi a ni a, sual thiltihtheihna chu Dân hi a ni.

⁵⁷Mahse, kan Lalpa Isua Krista zâra hnehna min petu Pathian hnênah lâwmthu awm rawh se.

⁵⁸Chutichuan, unau duh takte u, tihchêt rual lohvin ding nghet ula, in thawhrimna chu a thlâwn dâwn lo tih hriain Lalpa hna ṭhahnemngai takin thawk rawh u.