Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 16 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 16 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 16

¹Mi thianghlimte tâna thawhlâwm thu-ah chuan Galatia rama kohhrante ka hrilh angin ti ve ang che u.

²Pathianni apiangin in zînga tu pawhin malsâwmna in dawn ang zêlin dah khâwl ṭheuh ula, ka lo kal hunah thawhlâwm khawn a ngaih loh nân.

³Ka lo kal hunah in thil pêkte chu Jerusalem-a kalpui tûrin in mi rinzâwngte chu lehkha keng chuan ka kaltîr ang.

⁴Ka kal ve a ṭûl chuan kan kal ho dâwn nia.

⁵Makedonia ram ka fan hnuin ka rawn tlawh ang che u; Makedonia ram fan a ṭûl tho si a.

⁶In hnênah rei tak ka châm mai thei, thlasik chhûng zawng pawh a ni mai thei e; tin, nangnin ka kal leh zêlna tûrah pawh min pui dâwn nia.

⁷Tûna kal paha hmuh zawk che u mai chu ka duh tâwk lo va, Lalpan rem a tih chuan rei tak in hnêna châm theih ka inbeisei a ni.

⁸Efesi khuaah hian Pentikos ni thlengin ka châm rih ang.

⁹Dodâltu tam tak awm mah se, hetah hian hlâwk taka rawngbâwl theihna remchâng a inhawng reng a ni.

¹⁰Tin, Timothea hi in hnên a lo thlen hunah, in zîngah inthlahrung lovin awmtîr ang che u, keimah ang bawka Lalpa hna ṭhahnemngai taka thawktu a nih hi.

¹¹Chuvângin, tu man lo ngainêp suh u. Ka hnênah hlim taka a lo kîr leh theih nân lo ṭanpui ang che u; unau dang ruala a lo thlen ka beisei a ni.

¹²Unaupa Apolova erawh chu unau dangte ruala in hnêna lo kal tûrin ka ngên chiam a; mahse, tûnah chuan a duh rih lo tlat a, hun remchâng dangah a lo la kal ngei ang.

¹³Inring rengin awm ula, rinnaah ding nghet ula, huai tak leh chak takin awm rawh u.

¹⁴In tih apiang chu hmangaihnaa tih ni zêl rawh se.

¹⁵Stefana te chhûng kha Akaia rama ring hmasa an ni a, mi thianghlimte rawngbâwl hnaah an inpe zo tih in hria e;

¹⁶chutiang mite leh an thawhpuite leh an rawngbâwlpuite thu chu zâwm zêl rawh u.

¹⁷Tin, Stefana te, Fortunata te, Akaika te lo kal hian mi tilâwm hle a ni; anni hian in awm loh pawh lang lovin mi siam a,

¹⁸in rilru an tiharh ang khân kei pawh mi tiharh a, hetiang mite hi ngaihlu rawh u.

¹⁹Asia ram kohhrante hian chibai an bûk a che u. Akuila leh Priskili leh an ina kohhran inkhâwmte hian Lalpa hmingin chibai an bûk mawlh mawlh a che u.

²⁰Unau zawng zawngte pawh hian chibai an bûk a che u; fawh thianghlimin inchibai tawn rawh u.

²¹Hei hi, kei Paulan, keima kut ngeia chibai ka bûkna che u a nih hi.

²²Tu pawh, Lalpa hmangaih lo chu ânchhe dawngin awm rawh se. Lalpa chu a lo kal e.

²³Kan Lalpa Isua Krista khawngaihna chu in hnênah awm rawh se.

²⁴Krista Isuaah chuan ka hmangaihna in zaa hnênah awm rawh se.