Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 3 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 3 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 3

¹Unaute u, thlarau mite hnêna sawi angin in hnênah thu ka sawi thei lo va; tisa mi, Krista rinnaa nausênte hnêna sawi angin ka sawi zâwk ṭhin kha.

²In la ei theih loh avângin chaw rum ni lovin, hnute tuiin ka châwm ṭhîn che u a; tûn thleng pawhin in la ei theih loh hi.

³In la tisa mi hle a ni. In zîngah inîtsîkna leh inerna a awm chhûng chuan tisa mi, mihring taka la khawsa in ni tihna a ni lo vem ni?

⁴In zîngah, “Kei Paula pâwl ka ni, kei chu Apolova pâwl ka ni,” tite in la awm chhûng chuan in tisa mi hle tihna a ni lo vem ni?

⁵A nih leh Apolova chu tu nge a nih? Paula pawh chu tu nge a nih? In rin theihna tûra rawngbâwltu mai an ni asin; chu pawh chu Lalpan a pêk ang zêlin an thawk a ni.

⁶Keiin ka phun a, Apolovan tuiin a châwm a; nimahsela, Pathianin a ṭhantîr a ni.

⁷A ṭhantîrtu Pathian chauh lo chu, a phuntu leh tuia châwmtu chu eng mah an ni lo.

⁸A phuntu leh tuia châwmtu chu hna thuhmun thawk an ni. An thawhrim dân athuin lâwmman an hmu ve ve ang.

⁹Pathian tâna thawk dûn kan ni si a, nangni hi Pathian thlawhhma chu in ni e. Pathian in sak chu in ni bawk.

¹⁰Pathianin khawngaihna min pêk hmangin, in satu themthiam remhre tak angin a lungphûm ka phûm a, chumi chungah chuan mi dangin an rawn sa a; amaherawhchu, an sak dân hmangah fîmkhur ṭheuh rawh se.

¹¹Lung rem tawh sa lo chu tu man lungphûm dang an phûm thei ta lo, chu lungphûm chu Isua Krista hi a ni.

¹²Chumi chungah chuan miin rangkachakin emaw, tangkaruain emaw, lungmantamin emaw, thingin emaw, hnimin emaw, buhpâwlin emaw in sa sela,

¹³mi tin hna thawh ṭhat leh ṭhat loh dân a la lang fiah ang; Krista ni chuan a la tilang dâwn si a, meia a inlâr dâwn avângin. Mei chuan mi tin hnathawh chu a fiah ṭheuh vang.

¹⁴Tu in sak pawh a kan loh chuan, chu mi chuan lâwmman a hmu ang a;

¹⁵tu in sak pawh a kan chuan, chu mi chuan a chân ang, amah tak erawh chu chhanhim a ni hrâm ang, mei kan hnu ang maiin.

¹⁶Pathian chênna in chu in ni tih leh Pathian Thlarau nangmahniah a chêng reng tih in hre lo vem ni?

¹⁷Mi tu pawhin chu in chu an tihkhawloh chuan, Pathianin anni chu a tikhawlo ve ang; Pathian chênna in chu a thianghlim si a, chu in chu in ni e.

¹⁸Tu man mahni inbum suh se. In zînga tu pawh he khawvêl ngaiha fing nia a inhriat chuan, a lo fin tak tak theih nân â phawt rawh se;

¹⁹he khawvêl finna hi Pathian ngaihin âtthlâk a ni si a. “Ani chuan mi fingte chu anmahni fin vervêknain a âwk a,” tih ziak a ni si a.

²⁰“Lalpa chuan mi fingte ngaihtuahna chu engmah lo mai a ni tih a hria,” tih a ni bawk.

²¹Chuvângin, tu man mihringte hi chhuang suh se, engkim hi in ta vek a ni si a;

²²Paula emaw, Apolova emaw, Kifa emaw, khawvêl emaw, nunna emaw, thihna emaw, tûn hun emaw, nakin hun emaw, azain in ta a ni.

²³Nangni pawh Krista ta in ni a, Krista pawh chu Pathian ta a ni.